Thôn 4, xã Phước Cát 2 ngai ma nkuăl Cát Tiên 40km, đah bơi tât 50 rnăk, 160 nŭih rnoi mpôl đê̆. Lah kon du ƀon ngai, đảng viên Điểu K'Kiệp mro rvê ăp nau jêr, nau mô dơi tâm nau rêh ndrel nau tuch tăm bah kônh wa. Ntơm năm 2016, rnôk râng ƀư Kruanh Ban nau kan mặt trận thôn 4, nô hŏ ƀư ueh nau kan tâm nthoi đah ăp gưl uỷ Đảng, n'gâng kan ndrel ƀon lan, rƀŏng tât nau ndâk njêng nau rêh ueh lơn.

 Ngăn lah, Điểu K’Điệp hŏ ndrel ma cán bộ thôn ƀư nau kan tâm rgop nkoch mbơh, bonh đă ân tâm di, mro tât ăp ngih gay ma mbơh ntrong kan, nau ntrŭnh bah Đảng, pháp luật bah Ngih dak gay kônh wa gĭt ndrel ƀư. Nkre, gĭt nau mĭn, nau ŭch bah kônh wa gay năn đă, mbơh ma gưl uỷ, n’gâng kan. Điểu K’Điệp mbơh, ŭch ƀon lan rnơm ndrel ƀư tĭng ri săk nơm ân geh leo trong lor:

“Gâp nkoch mbơh ân kônh wa pah kan văng sa, rgâl tơm tăm mpa rong. Kơt lah tơm điều, lah păng ranh ri nơm ân rgâl, yơn mô dơi rgala lĕ du tŏ. Lah tăm du sa ri nơm rgâl du sào dơm, yor lah rgâl lĕ ri moh ndơ ma sa. Jêh ri lŏ kŏ ndri đŏng, nkoch ân kônh wa bu tuh bu sa ba yơn ƀư lŏ ri ân geh tâm ban. Hôm nau deh kon ri nơm kŏ nkoch ƀư nau deh nse ân tâm di, deh ntơm du hê tât 2 hê kon, mô dơi deh âk kon tal 3”.

Rgâl nau mĭn ntơm bah nau kan jê̆, nau rêh kônh wa rnoi mpôl đê̆ tâm thôn 4, xã Phước Cát 2 hŏ geh nau rgâl ngăn, ăp nau mâl geh jut jăng. Rnôk aơ ăp ngih kŏ gơih pah kan, ƀư tĭng nau kan mhe tâm tuch tăm. Nau geh bah ƀon lan kŏ nar lơn ma rgâl. Ăp trong hăn ri ueh, aih, ăp ngih mro kloh, ueh, ndrung rong geh pă ntŭk ƀư kloh rjăp...

Văng sa đăp mpăn, kônh wa ndâk, mât ăp nau vay ơm bah rnoi nơm. Ăp rmôt chĭng gong, njroh mprơ, rmôt pah play bu klô, pah play bu klô, bu ur bah thôn 4 râng ngăn ndrel geh âk nau dơi tâm ăp rnôk tâm rlong bah xã, bah nkuăl ƀư. Nô Điểu K’Điệp, nkoch:

‘Kônh wa ta aơ rmôt chĭng gong geh đŏng, rmôt njroh mprơ geh đŏng, tanh sah đŏng, jêh ri âk ngăn nŭih blau tanh sah. Gâp nkoch nau ân kônh wa lơi dĭng lơi ôh nau ơm, ân mât ueh. Nau vay ơm bah nơm ri nơm ân mât ân ueh”.

 Tĭng wa Đường Bình Độ, Kruanh Uỷ ban MTTQ xã Phước Cát 2, thôn 4 lah nkual jru, nkuăl ngai, trong hăn tâm ƀah, nau rêh văng sa hôm âk nau jêr. Rnôk aơ thôn hŏ geh âk nau hun hao đăp mpăn mpeh ăp ding, tâm nê nau ueh ngăn lah ndâk njêng ƀon lan mhe ndrel n’huch ach o nâp nâl. Nŭih ƀon lan hŏ blau nau nsrôih rklaih hao jêng ndâk njêng nau rêh ueh ndrel hơm răm. Nau geh kơt aơ lah nau rgop kơl âk ngăn bah đảng viên mom Điểu K’Điệp, Kruanh ban ƀư nau kan mặt trận thôn:

 ‘Nkoch trêng, rgŏ jă kônh wa ƀon lan ƀư tĭng ueh ăp nau ntrŭnh bah ngih dak lah nau ueh, mpeh nau hun hao văng sa ri tâm âk năm rlau aơ, kônh wa tâm thôn 4 mro nsôih pah kan jan sa, nau rêh văng sa geh n’hao prêh, nau kan rnoi mpôl kŏ geh ntrŭnh ƀư. Tâm âk năm rlau aơ, săk gâp nơm mro nsôih bonh đă kônh wa ƀư ueh mpeh nau kan, nau ƀư ndâk njêng ƀon lan mhe ndrel ma ăp nau kan yor xã ndrel nkuăl rgŏ jă”.

Đah ăp nau rgop ngăn tâm nau ndâk njêng ƀon lan, nô Điểu K’Điệp hŏ geh UB MTTQ Việt Nam n’gor Lâm Đồng rnê prêh ndrel pă bằng khen lah Kruanh ban nau kan mặt trận nkuăl rnoi mpôl đê̆ geh nau blau lvang năm 2016-2021./.