Nchrăp ƀư trong cao tốc Buôn Ma Thuột – Khánh Hòa hăn rlău nkuâl Krông Pắk, n’gor Dak Lak geh jong 33 km, lĕ rngôch rnoh  hvi neh  đă  ntrơn du lah 255 ha bah rlău 2.000 rnăk ƀon lan. Nơm geh nău tâm ban ŭch âk bah ăp rơh kơn ƀon lan, lơn lah ăp đảng viên, jêng pah kan đă ntrơn du dơi ƀư lôch dŭt ơm rđĭl đah ăp nkuâl êng ƀa ƀă ta Dak Lak.

Wa Y Dẫn Êban (Nuĭh Rđe) lah đảng viên sinh hoạt ta Chi bộ thôn Đoàn Thành 2, xã Hòa Đông, nkuâl Krông Pắk, n’gor  Dak Lak.  Tết mhe aơ,  rnăk dŭt rhơn  nơm geh  ăp ntil ndơ tuch tăm jŭr geh,  rnoh khlay hao lơn lah  dơn rnoh prăk âk  3,4 rmen  prăk bah đă  ntrơn du rong neh an ƀư trong cao tốc Khánh Hòa – Buôn Ma Thuột. Bah rnoh prăk dja, păng rngleh êng bơi 500 rkeh prăk rvăt ndeh ô tô dŏng an rsong hăn, rlău 2,9 rmen prăk hôm ƀa ƀă ntuh kơl rvăt 2 ha neh tăm  cà phê tâm rlŭ tơm sầu riêng njêng tơm geh wăng sa an let năp tay. Nău rvăt ndeh n’hanh plơ̆  ntuh kơl tay mir  hŏ dơi lĕ ma  rnăk mĭn na nê̆ n’hanh tâm ban ŭch rnôk gĭt dơi neh n’hanh tơm  tăm geh sŏk mplơ̆ gay ƀư trong.  Đảng viên Y Dẫn nkoch:

“Rnăk gâp geh lĕ rngôch 8,4 sào neh tăm cà phê, sầu riêng, tiêu n’hanh du đêt tơm sa play, ăp năm rĭng geh 300 rkeh prăk. Rnôk geh  trong nchrăp tâm  năm 2021, yor  gâp lah đảng viên, n’hanh ăp nuĭh tâm rnăk lah đảng viên da dê jêng dŭt ŭch tĭng trong nchrăp ƀư trong bah ngih dak, mpôl hên nchih kơp n’hanh dơi ngih dak trok tâm, mpŏng lah  ôi tay klak rnôk geh trong ri nău rsong hăn dơh soih  lơn, tâm  rsong tăch rgâl uĕh lơn”.

          Rnăk đảng viên Y Ngắt Niê ta xã Ea Yông, nkuâl Krông Pắk geh rlău 500 m2 neh n’hanh rlău 70 tơm  cà phê gŭ  tâm ntŭk đă ntrơn du rong neh ƀư trong cao tốc Khánh Hòa – Buôn Ma Thuột. Nô an gĭt, bah rnoh neh n’hanh tơm tăm  dja,  rnăk dơn geh  rlău 120 rkeh  prăk trok tâm neh đă ntrơn du. Lĕ  rngôch rnoh prăk  dŏng  tâm nău plơ̆ ntuh kơl  tay an nău kan tuch tăm, rgâl mhe jay rot jay jong ơm.  Rnăk wâl  lah ngoăy tâm ăp  rnăk dâk leo lor  bôk năp  ta xã Ea Yông tĭng jăp  nchih kơp, weh ntrŏng, n’hanh tĭng jăp  trong dơn ndơ trok tâm  ơm jao an neh. Đảng viên Y Ngắt lah:

“Geh trong nchrăp kuăl jă jao an neh gay ƀư trong cao tốc Khánh Hòa – Buôn Ma Thuột ri rnăk gâp hŏ tâm ban ŭch đŏng, dơn prăk trok  tâm đă  ntrơn du.  Yor he  lah đảng viên jêng ntik n’hao  nuih n’hâm dâk hăn lor bôk năp gay kônh wa  uănh tâm nê n’hanh ƀư tĭng gay geh njăr trong uĕh, rsong hăn dơh soih  tâm let năp tay. N’hanh gâp kuăl jă  kônh wa kiău ma  geh neh đă ntrơn du gay ƀư trong ri ngăch tâm ban ŭch dơn prăk  trok tâm  n’hanh ndơ̆ jao neh  n’hanh khân păng dŭt rhơn nđơr, tâm ban ŭch ntrơn du”.

          Nchrăp ƀư trong cao tốc Khánh Hòa – Buôn Ma Thuột, gâl  bôk năp  hăn rlău nkuâl Krông Pắk geh rnoh jong 33,3 km, rnoh hvi  neh đă  ntrơn  du gay ƀư trong rlău 255 ha. Rlău 2.000 rnăk ƀon lan mpeh 8 xã geh neh sŏk mplơ̆. UBND nkuâl hŏ ƀư  9 tơ̆ trok  tâm,  lĕ rngôch rnoh prăk rlău 344 rmen prăk. Lĕ rngôch rnoh hvi  neh đă  ntrơn du ta nkuâl hŏ dơi jao an ăp nuĭh tơm  ƀư trong.   

           Tĭng wa Phạm Văn Hà – Groi kruanh UBND xã Hòa Đông, neh ta nkuâl Krông Pắk lah nsum  n’hanh xã Hòa Đông lah êng lơn âk  lah neh bazan, dŭt  tâm di đah  tăm cà phê, tiêu, lơn lah  sầu riêng an nsĭt rnoh khlay wăng sa âk. Ăp ha mbra an nsĭt geh bah 800 - 1,2 rmen prăk/năm. Bol  nsĭt geh wăng sa hôm âk, yơn rnôk  geh trong nchrăp sŏk mplơ̆  neh  dŏng ƀư  trong cao tốc, nuĭh ƀon lan dŭt tâm ban ŭch  tĭng, dâk hăn lor bôk năp  tâm nău kan dja  lah ăp đảng viên tâm nê geh âk đảng viên lah nuĭh rnoi mpôl  đê̆ ta xã. Wa Phạm Văn Hà lah: 

          “Tâm rnoh 152 rnăk ta xã Hòa Đông geh neh trong cao tốc hăn rlău, ri geh bơi  du n’gul rnoh rnăk lah  nuĭh rnoi mpôl  đê̆, n’hanh geh âk rnăk lah cán bộ, đảng viên. Ŭanh nsum ăp  rnăk cán bộ, đảng viên ri hŏ hăn dâk lor bôk năp tâm pah kan ndơ̆ jao  neh gay dŏng an ƀư  trong. Ntĭt kơt rnăk wa Y Dẫn, rnăk  dja geh rnoh  neh hvi bơi 1ha neh đă ntrơn du, dŭt nsrôih nchih kơp, dơn prăk. Ăp đảng viên êng ƀa ƀă tâm ban kơt nê đŏng”

          Đah trong rƀŏng “đảng viên hăn lor  ƀon lan kơt tĭng bah kơi" bah ăp đảng viên ta xã Hòa Đông n’hanh Ea Yông mpeh nkuâl Krông Pắk, n’gor Đắk Lắk, pah kan đă ntrơn du rong neh an ăp tơm  nuĭh ƀư trong cao tốc Khánh Hòa - Buôn Ma Thuột hŏ dơi tĭng ƀư dŭt ơm rđĭl đah ăp nkuâl êng ƀa ƀă  ta Dak Lak.