Bộ Công Thương mhe n’gluh an dŏng nău ntrŭnh mpeh nău tĭng ƀư ăp trong nkra đăp mpăn geh tơm ndơ tăch rvăt kêng dŭt năm năm 2023 n’hanh rnôk Tết Nguyên đán Giáp Thìn 2024. 10 khay aơ, lĕ rngôch rnoh geh tăch chrai ndơ n’hanh nsĭt geh bah rvăt dŏng ndơ hao 9,4% rđĭl đah ndrel khay dja năm 2022.

Bộ Công Thương năl lah, tâm let năp tay, ntŭk tăch rgâl lam ntŭr neh mbra hôm rgoh n’gơ. Gay đăp mpăn tâm ban geh ndơ tăch rvăt khlay, đăp mpăn rnoh khlay ndơ kêng dŭt năm 2023 n’hanh rnôk Tết Nguyên đán Giáp Thìn năm 2024, Bộ Công Thương dăn đă Sở Công Thương ăp n’gor, nkual ƀon têh mpeh Trung ương, ăp đơn vị, Hiệp hội ndơ tăch ơm geh trong nchrăp ƀư njêng, tăch rgâl, ăp trong nkra  joi tơm pă ndơ tăch n’hanh nkra ăp nău tât ndal bah ntŭk tăch rgâl, lor nchrăp geh trong mât đăp mpăn tơm  ndơ tăch rvăt, đăp mpăn rnoh khlay ndơ, mô an geh nău mô tŏng ndơ tăch, tăch pruăt tơm ndơ tăch hao khlay ndal ndơ tăch tâm rnôk kêng dŭt năm n’hanh Tết Nguyên đán.