Groi Kruanh N’gâng kan ntĭm nti Hoàng Minh Sơn an gĭt, năm bah năp lĕ geh nău rvê đah mô tŏng ndrôm sam ƀŭt giáo khoa jrô 4, jrô 8 n’hanh 11. Nkô̆ nău du gâl yor ăp ntŭk năm aơ săch ndrôm sam ƀŭt mbrơi, du gâl yor nău uănh an rnoh khlay bah ăp ntŭk. Yơn lah tât aƀaơ, ăp ntŭk lĕ uănh an tŏng ăp. Kruanh N’gâng kan ntĭm nti lĕ âk rơh pah kan đah kruanh Nhà xuất bản giáo dục Việt Nam gay ndrel dôh rklaih tâm dak, nchrăp an in ndrôm sam ƀŭt n’hanh ntơm lĕ jêh in ndrôm sam ƀŭt giáo khoa ăp năm bah năp:

          “Êng đah ndrôm sam ƀŭt giáo khóa jrô 4, jrô 8 n’hanh jrô 11-lah ndrôm sam ƀŭt mhe, aƀaơ lĕ ƀư ntơm ndranh n’hanh ƀư in geh nklăp 80%. Hôm nklăp 20% tĭng ăp ntŭk lĕ mbơh tŏng ăp gay Nhà xuất bản giáo dục Việt Nam ƀư trong nchrăp in. N’hanh mbra in jêh gay ngăch an năm nti mhe, tŏng ndrôm sam ƀŭt an ăp jrô 4, 8, 11. Kơt nĕ mbra jêh tŏng ăp an phổ thông”.

Đah nău nchih ndrôm sam ƀŭt giáo khoa, nău ntrŭnh tâm rgop ndrôm sam ƀŭt giáo khoa, nchih rgum, tăch, in ndrôm sam ƀŭt giáo khoa lah nău ntrŭnh têh lĕ dơi n’gluh an ta Nghị quyết 88 năm 2014 bah Quốc hội. Quốc hội khóa 14 geh nghị quyết mrô 122 nĕ lah rnôk ƀư tĭng nchih rgum ndrôm sam ƀŭt giáo khoa tĭng trong kon nuĭh tâm rgop geh du môn nti na nê̆ lĕ jêh đêt ngăn ndrôm sam ƀŭt giáo khoa dơi năl, uănh an mô mbơh ƀư nchih rgum ndrôm sam ƀŭt giáo khoa dŏng tơm prăk ngih dak môn nti nĕ. Aƀaơ lĕ rngôch ăp môn nti geh ndrôm sam ƀŭt giáo khoa. Groi kruanh n’gâng kan Hoàng Minh Sơn mbơh:

“Rơh aơ lĕ rngôch ăp jrô lĕ dơi uănh an (1/12 jrô) geh 3 kôp ndrôm sam ƀŭt giáo khoa. N’gâng kan ntĭm nti mbra ƀư tĭng rjăp Nghị quyết bah Quốc hội-Nghị quyết 122. Êp tât mbra uănh năl tay n’hanh uănh an 3 ndrôm sam ƀŭt-3 ndrôm sam ƀŭt jrô dŭt năm lah jrô 5, 9, 12”.

Rơh rƀŭn tal 35 bah Ủy ban Thường vụ Quốc hội dôl ƀư ta Hà Nội lĕ uănh nđôi bôk nău way kan “Nău ƀư tĭng Nghị quyết mrô 88 Quốc hội khóa 13 n’hanh Nghị quyết mrô 51 Quốc hội khóa 14 mpeh rgâl bôk nău kan, ndrôm sam ƀŭt giáo khoa ntĭm nti phổ thông”. Ủy ban Thường vụ quốc hội đă N’gâng kan ntĭm n’hanh nti an ƀư nchih rgum du ndrôm sam ƀŭt tŏng ăp bah jrô 1 tât 12 geh 137 bôk ndrôm sam ƀŭt.

Jêh uănh nđôi an saơ, bôk nău ntĭm nti phổ thông 2018 dơi ndâk ƀư uĕh, rjăp, lĕ rgâl bah nău ntĭm nti an nchrŏng hun hao nău rêh, nău blău kon hŏk, năl na nê̆ 05 nău rêh n’hanh 10 nău blău dŭt khlay, n’gâng tơm an hun hao đah kon hŏk phổ thông. Nkô̆ nău ndrôm sam ƀŭt giáo khóa tĭng nău ŭch geh bah bôk nău ntĭm nti phổ thông mhe. Nău nchih rgum ndrôm sam ƀŭt giáo khoa lĕ dơi rgŏ jă âk nuĭh way kan, nuĭh khoa học, nai gĭt blău, nsing nơm, blău ơm tât râng.

Nău rgâl mhe bôk nău ntĭm nti, ndrôm sam ƀŭt giáo khoa lah nău ƀư khlay, geh nău uănh tât dŭt âk bah nuĭh ƀon lan ntoh măt n’hanh nuĭh ƀon lan. Tĭng ăp đại biểu, bôk nău ntĭm nti phổ thông geh pháp lệnh lah di, yơn bôk nău knŭng ntrŭnh nsum nău wât. Ndrĭ yơn nkô̆ nău wât phổ thông dŭt khlay, an geh nău mât uănh rjăp bah ngih dak. Yor nê an ôp djăt geh nău rgâl khlay gay bôk nău kan dŏng di trong. Wa Đỗ Văn Chiến-Kruanh Ủy ban Trung ương Mặt trận Tổ quốc đă:

“Nău an ƀư dâl lah an geh trong uănh nđôi rjăp bah nău nchih rgum, in, dŏng n’hanh he an n’hŭch rnoh khlay ndrôm sam ƀŭt tâm di đah nău geh bah nuĭh ƀon lan aƀaơ. Nuĭh ƀon lan hôm đă ndrôm sam ƀŭt giáo khoa aƀaơ an Ngih dak mât uănh rnoh khlay. Nkra rgâl he an rƀŏng tât. Yor lah an rgâl moh ndơ an ăp nuĭh jêr jŏt ri gâp an lah “rplay sam ƀŭt” lah jŏ jong ngăn. Dăn đă bah mpôl groi nđôi lah tĭng tâm nău ƀư aƀaơ đŏng lah mô ri an geh mĭn njêng jru rblang tâm di”.

Kruanh Quốc hội đă ndăn an sam ƀŭt ntĭm mpeh trong mkra an rnoh khlay ndrôm sam ƀŭt, uănh năl dŭt n’hâm ndrôm sam ƀŭt giáo khoa, tŏng ăp groi nđôi rjăp prăk nkra njêng, n’huch prăk tăch ta n’gul, n’hŭch rnoh tăch gay n’hŭch rnoh khlay prăk ndrôm sam ƀŭt giáo khoa. Kruanh Quốc hội đă ƀư tĭng rjăp tĭng nkô̆ nău Nghị quyết 88 Quốc hội mpeh rgâl mhe bôk nău ndrôm sam ƀŭt giáo khoa phổ thông.

“Nghị quyết 88 nkoch: N’gâng kan ntĭm nti an ƀư nchih rgum lah du ndrôm sam ƀŭt giáo khoa tŏng ăp bah jrô 1 tât jrô 12 geh 137 bôk nău sam ƀŭt. Ăp rmôt kan, êng êng dơi ntrŭt nsôr râng nchih rgum ndrôm sam ƀŭt giáo khoa ngoăy mô dah du đêt bôk ndrôm sam ƀŭt tĭng nău dơi, mô kâp nchih rgum tŏng ăp du ndrôm sam ƀŭt giáo khóa. Tĭng nghị quyết 88 lah kơt nĕ. Nghị quyết 122 lah mkra nu nău rnôk nĕ lah ăp ndrôm lĕ geh ntŭk tăch n’glôn jêh hôm ma tơm prăk mô tŏng ri ŭch dơn lah mô hŏ nchih rgum ndrôm sam ƀŭt nĕ. Nghị quyết 122 mô djôt dơn n’hanh mô rgâl an nghị quyết 88. Yor nê nău ngăn aƀaơ tâm lvang groi nđôi ntĭm gâp saơ dŭt dơi uănh, he mĭn njêng tay.

Y Sưng/dịch