N’gul năm bah năp, rnăk wa Lê Huy Dũng, ta nkuăl têh Lộc Thắng, nkuăl Bảo Lâm, n’gor Lâm Đồng tŭp tâm nău mô geh jay gŭ. 5 nuĭh tâm rnăk wâl 3 bông nuĭh tâm leo hăn manh jay gŭ lôch nar, nău rêh dŭt jêr jŏt. Nkô̆ nău lah du mlâm jay dơm bah rnăk wâl jŭr djơh jêng lĕ rơih jăng. Tâm rnôk ƀư ăp sam ƀŭt gay ƀư jay mhe ri n’gâng kan ƀon lan ta ntŭk mô an sam ƀŭt yor lĕ rngôch rnoh neh bah rnăk wâl wa geh tâm dăp rgum khoáng sản. Wa Lê Huy Dũng, nkoch:

Dăn đă Chính phủ an sam ƀŭt pơk lhoi, mô lah nkra di, mô dah rgâl gay kônh wa mpôl hên dơi geh nău rêh đăp mpăn pah kan. Ngăn ngên geh neh ma mô dơi ƀư jay, mô geh jay ri mpôl hên mô gĭt m’hâm ƀư, pơng dŭt jêr jŏt n’hanh ŏk r’ah.

Rnăk wa Phạm Thị Năm, ta phường Lộc Tiến, nkual ƀon têh Bảo Lộc, n’gor Lâm Đồng geh tâm nău tâm ban. Jay gŭ, neh tuch tăm bah rnăk wâl dôl dŏng đăp mpăn, tâm di, geh tâm nkual ƀon lan gŭ âk tât ndal geh “mô an” mô dơi tâm pă ăp kon mô lah nchăm ngân hàng manh prăk ntuh kơl. Wa Phạm Thị Năm an gĭt:

Phường Lộc Tiến bah mpôl hên geh âk rnăk dŭt âk kon, rêh nsum 3-4 rơh yơn mô dơi tâm pă neh an kon luh gŭ êng. Âk rnăk ŭch hun hao wăng sa, ŭch manh prăk ngân hàng mô dơi manh yor kol Dăp rgum. Lơn lah, aƀaơ âk jay ƀon lan lĕ jŭr djơh hô yơn ŭch nkra mô dơi đŏng.

Tĭng nău ntrŭnh 866 lơ 18/7/2023 bah Thủ tướng Chính phủ mpeh nău uănh an dăp rgum sroh joi, ƀư, nkrêt njêng n’hanh dŏng ăp ntil khoáng sản rnôk năm 2021-2030, uănh tât năm 2050, ta n’gor Lâm Đồng geh rlău 70.000ha geh dăp rgum rŭn in, khuch tât rmưn rnăk đah bơi 100.000 nuĭh. Tĭng wa Võ Ngọc Hiệp, Groi kruanh UBND n’gor Lâm Đồng, nău dăp rgum khoáng sản rŭn in tât nkual ƀon lan gŭ mô knŭng ƀư rluk rlăk, ƀư jêr tât nău ƀư tuch tăm n’hanh nău rêh bah nuĭh ƀon lan ma hôm ƀư ăp đồ án dăp rgum hun hao wăng sa rêh jêng bah n’gor geh nsrŭng.

Gay đăp mpăn nău hun hao nâp nâl ri an uănh mĭn tay edôh rklaih jêr jŏt tâm nău rŭn in ƀư dăp rgum ƀư, sroih joi khoảng sản. Lĕ rngôch rlău 50% rnoh neh ta nklang nkuăl Bảo Lâm, du gưl bah Bảo Lộc ta nklang nkual, jêh nĕ ăp nău nchrăp ƀư ntuh kơl nsum, âk nkual hun hao... geh tâm nkual dăp rgum sroh joi, ƀư, nkret njêng khoảng sản. Aƀaơ lĕ rngôch ăp nău ƀư geh nsrŭng, n’ăp nkual ƀon têh, nkual ƀon lan gŭ, rnôk ndâk ƀư ntŭk gŭ mhe.

Saơ kloh nău jêr bah Dăp rgum khoáng sản tĭng nău ntrŭnh 866, tâm rơh pah kan rnôk dŭt khay 8/2024 ta n’gor Lâm Đồng, Thủ tướng Chính phủ Phạm Minh Chính lĕ ntĭm rđău N’gâng kan Tài nguyên n’hanh Môi Trường ndăn kơp uănh n’hanh dôh rklaih. Thủ tướng Chính phủ Phạm Minh Chính, nkoch kloh:  

Aơ lah kol luật, yor rĭ N’gâng kan tài nguyên n’hanh Môi trường an rgum, ndơ̆ an nkra Luật Khoáng sản, ngăn lah ăp nău mô dăch đah nău ngăn ma bah năp đaơ he ƀư. Aƀaơ mô hŏ dơi ƀư khoáng sản ri an bu dŏng neh ta khoáng sản ma ƀư, an tuch tăm, ma rêh, hôm rnôk ƀư khoáng sản ri mĭn bah kơi. Ta aơ, djăt dăp rgum khoáng sản hôm lah khĭt dơm, kơt nĕ nuĭh ƀon lan rêh đah moh ndơ? nĕ lah ăp nău mô di đah nău ngăn.

Đah ntĭm rđău bah Thủ tướng Chính phủ, nuĭh ƀon lan n’gor Lâm Đồng dôl dŭt kâp ăp ngih pah kan geh tât ngăch dôh rklaih ăp nău mô tâm di ta dăp rgum khoáng sản gay đăp mpăn nău rêh, hun hao wăng sa rêh jêng./.