VOV4.M’nông – Plơ̆ tay nău kan jêh ăp nar rlu tết nguyên đán, ăp nghệ sỹ, diễn viên bah đoàn ca múa nhạc dân tộc n’gor Dak Lak lŏ mô ru đah nar nti an ăp nău mprơ mhe. Wa Y Kê Niê, Kruanh đoàn an gĭt, rnôk bah năp tết, lĕ đoàn an âk mông nar n’hanh soan nti an 2 nău njroh mprơ wơt năm mhe n’hanh măng lôch năm. Êng đah ăp năm, yor khuch bah srê jêng bôk nău njroh mprơ geh đêt ta Ntŭk văn hóa n’gor n’hanh dơi pơk sŏng dăng tâm ăp kênh tivi n’hanh Youtube. Jêh tết, lĕ đoàn mbra ƀư nar rdâk nkra ăp nău njroh mprơ têh rhŏ an njroh mprơ gưl n’gor n’hanh hăn tât ăp ntŭk rhŏ an nuĭh ƀon lan rnôk nu nău srê Covid-19 dơi uănh nđôi.

“Lor lah nchrăp an ăp nar lễ, nkah gĭt bah n’gor n’hanh neh dak. Bah năp tết lĕ ƀư hôm n’hanh aƀaơ tết jêh ri mbơh ƀư tay. Lah tâm nău chôt srê mô dơi ƀư ti rhôp rup ăp nău njroh mprơ n’hanh pơk ăp trong nkoch mbơh nău, ăp trang mạng xã hội tă bah kênh bâh nău kan gay ăp nuĭh ƀon lan, n’hanh băl mpôl lam ntŭr neh dơi uănh nđôi, djăt”.

Hôm ta Gia Lai, Rmôt nkoch trêng hăn ăp ntŭk bah Đoàn ca múa nhạc tổng hợp Đam San (tâm n’gâng kan Văn hóa- Thể thao n’hanh pâl nđaih Gia Lai) hăn kan đah âk nău ƀư nkoch trêng, njroh mprơ rhŏ ƀon lan ta ntŭk. Bah năp đaơ, ăp năm, Rmôt lĕ ƀư hang rhiăng rơh nkoch trêng hăn ăp ntŭk, dŭt âk ta ăp nkual jru ngai, nkual rnoi mpôl đêt ta n’gor Gia Lai. Yơn lah, năm 2021 mhe rlău, yor srê Covid-19, n’hŭch rgum âk nuĭh, jêng rmôt bah yuh rgâl trong nkoch trêng đah trong ƀư quay tay rup, mbơh tâm ăp mạng xã hội facebook, Yotube tĭng ăp nkô̆ nău êng êng. Nău aơ nkre kơl đăp mpăn nău kan n’hanh nkô̆ nău nkoch trêng dơh tât đah âk kônh wa. Yuh H’Blup lah cán bộ bah Rmôt nkoch trêng hăn ăp ntŭk bah Đoàn ca múa nhạc tổng hợp Đam San an gĭt:

“Mpôl hên ăp nuĭh lah cán bộ văn hóa, ƀư kan nkoch trêng hăn ăp ntŭk. Mpôl hên tâm rgop đah bôk nău njroh mprơ, gay kônh wa djăt jêh du nar pah kan ŏk r’ah. Tă bah nĕ, mpôl hên tâm rgop ăp nău ntrŭnh bah Đảng, nău kơl, pháp luật bah Ngih dak. Bah nĕ, an kônh wa dơi wât Đảng n’hanh Ngih dak dŭt uănh tât, mât uănh nău rêh bah kônh wa. Bah meng nĕ, nkoch trêng an khân pơng wât, dêr nău mô uĕh kơt tih nău rêh jêng kon nuĭh, mô ƀư khuch tât săk nơm n’hanh kônh wa tâm ƀon”.

Bah ntơm rdâk ƀư, wơt năch plơ̆ đah du đêt năm mbơh uĕh tâm rơh Têts Dương lịch 2022, rnôk aơ âk doanh nghiệp   lữ hành lĕ lôch jêh, pơk tăch ăp tour pâl nđaih tâm dak rhŏ năch rơh Tết Nguyên đan. Ăp ntŭk tât di rnoh an njrăng n’gang srê Covid-19, ntŭk ntô âk ntŭk tât ndrel đah bri dak uĕh răm, rlong ƀư ngăn ăp nău uĕh văn hóa, tâm di âk ntŭk an năch lah ăp nău ntoh lư bah ăp bôk nău ƀư tour tâm rơh Tết Nguyên đán năm aơ.

 Năm aơ, n’gor Lâm Đồng geh nău ŭch wơt rlău 5 rkeh năch. Tĭng trong nchrăp năm 2022, Lâm Đồng nsrôih jêng ntŭk tât “Đăp mpăn, ndơ geh n’hanh geh êng”, geh 5 rkeh nuĭh năch gŭ, 150.000 nuĭh năch dak bah dih, rnoh nar gŭ rĭng geh 2 nar. Gay geh nău ŭch aơ, n’gor Lâm Đồng ndâk njêng trong nchrăp bôk nău ƀư đah âk trong mkra. Na nê̆, ndâk njêng ndơ pâl nđaih mhe geh pâl nđaih phit klach ta n’glău Tuyền Lâm, Bri ngih dak Bidoup Núi Bà; rdâk ƀư tay lễ hội văn hóa way ơm bah ƀon lan rnoi đêt; pâl nđaih mât uănh săk soan, pâl nđaih Camping, glamping ta nkual ƀon têh Đà Lạt; hăn uănh, jêng ăp trong pâl nđaih nkô̆ nău êng nkual Tây Nguyên. Tâm ban ma nĕ, Lâm Đồng n’hao nkoch trêng, ntrŭt ngăch mpla nsơ rup ndah pâl nđaih đah ăp trong na nê̆ kơt bôk nău kan “Pơh lễ têh pâl nđaih năm 2022 Đà Lạt-ntŭk rlu rlău”; mbơh ƀư ndâk njêng nkual ƀon têh Đà Lạt jêng nkual ƀon têh thông minh tâm nău pâl nđaih; tâm rgop ƀư mpla nsơ bôk nău kan ntrŭt ngăch pâl nđaih.

Wa Đặng Gia Duẩn-Groi Giám đốc N’gâng kan văn hóa Thể thao n’hanh Pâl nđaih n’gor Dak Lak-an gĭt: Nchrăp, rnoh bu năch tât tâm rơh Tết Nguyên đán mbra geh 30.000 nuĭh yơn tĭng tâm ăp nău ntrŭnh njrăng n’gang srê Covid-19 bah trung ương n’hanh n’gor”. Ăp ntŭk tăch rgâl pâl nđaih, nu nău pâl rlưn, hăn nsong pâl nđaih ta ăp nkual, ntŭk pâl nđaih ta Dak Lak dôl ndâk ƀư trong nchrăp, nchrăp ăp nău ƀư, bôk nău kan rhŏ Tết Nguyên đán năm 2022. Bah năp Tết Nguyên đan Nhâm Dần, N’gâng kan Văn hóa, Thể thao n’hanh Pâl nđaih lĕ ƀư hăn uănh nđôi ăp ntŭk đăp mpăn n’hanh trong nchrăp rhŏ an năch tĭng trong nchrăp, rlău ma nĕ, ntŭk hôm ƀư rmôt hăn uănh, boăt nthoi đah nău kan pâl nđaih n’gor Khánh Hòa n’hanh nkual ƀon têh Đag Nẵng gay wăch rgum, jă năch tât Dak Lak n’hanh ƀư an ăp doanh nghiệp uănh ndâk ƀư ăp ndơ, ntŭk tât uănh nsong mhe gay wăch rgum năch pâl nđaih tât đah ăp ntŭk. Dak Lak mbơh ƀư ndâk njêng lôch ăp (4 nar/3 măng, 3 nar/2măng, 2 nar/du măng...) tŏng ăp đăp mpăn rhŏ an năch tâm yan srê Covid-19.

N’hêl na nê̆ an saơ Covid-19 khuch tât âk nău bên dŏng bah kon nuĭh, tâm nĕ geh pâl nđaih. Nău ma âk nuĭh uănh ngăn lah m’hâm ƀư nkre dơi ŭch pâl nđaih, khâl uănh ăp ntŭk, nkre pâl rlưn jêh âk nar chôt srê đah âk nău khuch hê nkre đăp mpăn săk soan, đăp mpăn an săk nơm n’hanh nsum mpôl. Âk năch lĕ joi tât Măng Đen, nkuăl Kon Plông, n’gor Kon Tum tâm rơh nkao mai anh đào dang. Nău nĕ du tơ̆ tay mĭn lah, pâl nđaih uĕh nđĭr, pâl nđaih đăp mpăn nău săch bah năch tâm lvang aƀaơ, lơn lah tâm rơh Tết Nguyên đán Nhâm Dần 2022 aơ. Tâm trong rƀŏng nsum nĕ, Kon Tum geh dŭt âk nău dơi hun hao, lor lah wơt rnoh năch tâm n’gor n’hanh ăp n’gor dăch. Đah ntŭk ntô uĕh, âk ndơ pâl nđaih kloh nđĭr, ndơ pâl nđaih văn hóa, năch tât đah Kon Tum nkre geh âk nău dơi ƀư ngăn, lăp he tâm ntŭk ntô bri dak nkre đăp mpăn bah năp chôt srê Covid-19 n’hanh uĕh an săk soan.

Hội nhà báo Kon Tum an gĭt: Hội Báo Xuân Nhâm Dần-năm 2022 mbra dơi ƀư bah nar 10 tât 13/2022, đah bôk nău “Rhơn đảng quang vinh, rhơn năm Nhâm Dần 2022” ta Bảo tàng-Thư viện n’gor Kon Tum. Hội Báo Xuân năm aơ mpla nsơ, nkoch ndrôm sam ƀŭt báo Xuân nchih mpeh Đảng quang vinh, mpeh nău geh wăng sa-rêh jêng bah n’gor nơm, bah neh dak rlău du năm chôt srê covid-19 geh âk jêr jŏt, ntŭl rlong, njuăl tât ăp rơh kơn nuĭh ƀon lan mpeh năm 2022 đah âk nău răm n’hanh mpŏng uĕh ta ăp nău kan bah nău rêh. Nkre, ta Hội Báo Xuân Nhâm Dần n’gor mpla nsơ, nkoch ndơ OCOP n’hanh du đêt ndơ lŏ mir ntoh lư bah n’gor. Hội Báo Xuân Nhâm Dần năm 2022 lah rơh rgum rƀŭn văn hóa bah ăp nuĭh ƀư báo tâm n’hanh bah dih n’gor;  di an nuĭh ƀư báo tâm mâp, tâm nđŭr đah kruanh n’gor, ăp n’gâng kan, nău kan, ƀon lan n’hanh băl răk mpeh trong kan báo chí. Tă bah aơ rdâk nsôr nuih n’hâm mĭn ƀư mhe, geh nuih n’hâm an nuĭh nchih báo nar lơ geh âk tác phẩm báo chí uĕh, rgop âk lơn an nău hun hao bah n’gor, neh dak.

Nuĭh rblang: Y Sưng Phêja