VOV4.M’nông:   Âk nău kan wăng sa bah n’gor Dak Lak lĕ ntơm hun hao dăng plơ̆ tay jêh jong khay geh khuch bah srê Covid-19. Ăp doanh nghiệp ta n’gor Dak Lak dôl nsrôih ntrôl dăng tăch rgâl rnôk srê nar lơ dơi ntrôl rŭch. Âk n’hâm soan mhe dôl dơi geh an lvang hao jêng mhe bah n’gor.

Tâm nkual tĭng gưl n’hanh tâl dŭng ndơ bah ngih măy nkra njêng bia Sài Gòn Dak Lak-Công ty Cổ phân bia Sài Gòn miền Trung, ăp phung pah kan dôl ndăn ƀĭt joet ăp ndeh măy mŏk gay dăp, rdêng ăp ndơ lĕ dơi tâl jêh, ndơ̆ tây ntŭk prăp. Ăp mpôr ndeh tâm nthoi hăn trêng tâm ngih măy an saơ nkra njêng ta aơ lĕ rdâk hao tay jêh 2 năm geh khuch yor srê Covid-19. Nô Lại Thế Nguyên, phung pah kan bah ngih măy bia Sài Gòn Dak Lak an gĭt, bah jêh Tết Nguyên Đán 2022, ăp nău ƀư bah Ngih măy lĕ rdâk hao tay geh 80% ngăch dăng, phung pah kan lĕ plơ̆ tay pah kan nâm ơm n’hanh lĕ rngôch cán bộ phung pah kan tâm công ty dôl sŏk soan tâm rlong, nsrôih jêh rlău trong nchrăp n’gluh an bah Công ty.

“Oh nô phung pah kan ndrel lĕ rngôch cán bộ phung pah kan bah công ty nsrôih ƀư uĕh naư kan bah Tổng công ty n’gluh an kơt rnoh ndơ bah Công ty. Nsrôih năm aơ mbra jêh nău kan n’hanh geh rnoh ndơ uĕh lơn năm e”.

Công ty TNHH nchoăn rdêng ô tô An Phước dôl kan dŭt n’hâm bah 130 bôk ndeh geh aƀaơ.

Công ty TNHH nchoăn rdêng ô tô An Phước, Dak Lak lĕ rlet rlău trong jêr jŏt ngăn, đah 107 rbăn tấn ndoh ndơ lĕ dơi rdêng tâm 3 khay bôk năm. Wa Phạm Đông Thanh, Kruanh Công ty TNHH nchoăn rdêng ô tô An Phước, Dak Lak an gĭt: aƀaơ Công ty lĕ geh 100% dŏng bah rmôt ndeh. Ndrel đah ăp sam ƀŭt nchăm ndơ tât bah ăp nuĭh truyền thông, Công ty lĕ dơi dơn âk sam ƀŭt nchăm ndơ bah ăp nuĭh dơi geh êng. Wa Thanh an lah, săk rnglăy aơ yor mpôl kruanh công ty lĕ mkra uĕh nău jêr mô hao prăk rdêng ndơ yơn hôm e đăp mpăn nău geh bah Công ty tâm rnôk rnoh khlay xăng n’hanh âk prăk ntop êng mô rlu hao:

“Mpôl hên n’gluh an trong ƀư, joi âk nuĭh pă an gay dơi pă an ndơ an doanh nghiệp gay pah kan nâm ơm. Rlău ma nĕ mpôl hên geh n’gluh an ăp trong ƀư gay ntêm nkrem pring xăng, lơn lah mpôl hên nsrôih tâm rgop ndoh ndơ gay dêr nău tâm rlong dơm. Rnoh bêng ndoh ndơ hăn 2 trong mbra nsrôih geh hao âk ngăn gay dêr nu nău hoach roh pring xăng”.

Hăn rlău ăp nar khay jêr jŏt ngăn, nău rêh jêng kon nuĭh ta Dak Lak aƀaơ ntơm ntoh n’gôr plơ̆ tay. Rup ndah chôt srê lĕ mô hôm khuch rvê rnôk lĕ rngôch kon hŏk lĕ tât ngih sam ƀŭt, ăp Ngih dak si rdâng săm lôch uĕh nău kan n’hanh mbrơi mbrơi plơ̆ tay đah nău kan bah ăp ntŭk ntĭm nti. Tâm mông nar nĕ, nău kan pâl nđaih dơi ntrop tay n’hâm soan dâk hao... Wa Nguyễn Thụy Phương Hiếu, Groi Kruanh N’gâng kan văn hóa Thể thao n’hanh Pâl nđaih n’gor Dak Lak an gĭt, nău dâk hao tay bah nău kan pâl nđaih Dak Lak dơi nsing tâm trong ƀư nkoch, mpla nsơp pâl nđaih ta ntŭk du trong ngăch, săk rnglăy ta ăp trong nkoch mbơh. Nsing tâm nău tâm rgop, pơk hvi ăp ntil pâl nđaih n’hanh nsing tâm nău nsrôih n’hao uĕh tăch rgâl, ƀư mhe ndơ pâl nđaih bah tĭng doanh nghiệp:

“Gâp ƀư pah kan nkoch trêng tâm 2 năm mhe rlău hôm dŭt âk n’hanh dŭt dăng jêng dơi lah năch pâl nđaih khân pơng lĕ uănh saơ rup ndah bah Dak Lak n’hanh khân pơng joi ntŭk geh rup ndah bah nơm gay rnôk khâl pơng geh ndơ ri khân pơng săch tât đah Dak Lak jêng rơh Tết n’hanh rơh rlu Lễ giỗ Tổ Hùng Vương bu tât dŭt âk n’hanh aƀaơ lĕ geh nău rdâk hao plơ̆ tay đah rnoh năch n’hanh ăp doanh nghiệp ri dŭt nsrôih tâm nău joi năch boăt nthoi đah ăp ntŭk. Gay hao âk năch dak bah dih tât đah Dak Lak ri he kan ndrel dăng lơn đah Khánh Hòa, Đà Nẵng”.

Ăp nar sông sa bah dih dơi ƀư ta ăp nkual, ntŭk pâl nđaih dôl lah nău săch bah ăp mpôl pâl nđaih tât đah Dak Lak

Gay ƀư tĭng nău rƀŏng rdâk hao wăng sa-rêh jêng năm 2022-2023, mhe rlău Ủy ban Nhân dân n’gor Dak Lak lĕ an bôk nău kan rdâk hao tay n’hanh hun hao wăng sa-rêh jêng năm 2022-2023, tâm nĕ rƀŏng tât nău ŭch rdâk hao ngăch ăp nău ƀư nkra njêng, tăch rgâl ta n’gor, ntrôl ăp nău ƀư hao jêng; kơl lor du đêt năy kan khlay, đăp mpăn ƀư tĭng ăp rnoh an hun hao wăng sa-rêh jêng lĕ n’gluh an. Wa Nguyễn Đình Trung, Ủy viên trung ương Đảng, Bí thư N’gor ủy Dak Lak an gĭt:

“N’gor dôl ƀư nău dăp rgum n’gor kơt dăp rgum rgâl dŏng neh, dăp rgum ăp nkual hun hao. Đăp mpăn uĕh nâp, n’hêl na nê̆ đah nău ngăn rnôk nuĭh ntuh kơl tât đah n’gor khân pơng geh nkô̆ gay mĭn njêng n’hanh bu uănh n’hanh ntrŭnh ntuh kơl. Nău tal 2 tay lah tâm rgop đah ăp nuĭh tâm nău nkra njêng aơ lah nău kan bah n’gor, n’gor an dâk ƀư nău tâm rgop đah ăp nuĭh tâm ăp nău nkra njêng. Nău tal 3 lah nău tăch ndơ kơt hăn ndrel đah công nghiệp nkret njêng têh n’hanh ăp nău mpeh ntung trong. Lam tâm nău dơi kan kơt nău tơm bah ƀon lan, n’gor mbra nta nơih uĕh ngăn”.

Năch pâl nđaih rlong ƀư ăp nău ƀư pâl răm ta nkual pâl nđaih Ko Tam

Di rơh lễ nkah gĭt nar Rklaih đăp mpăn Miền Nam n’hanh nar Quốc tế lao động, Dak Lak lơ wơt ăp nău mbơh uĕh đah wăng sa, năch pâl nđaih tât lĕ khách sạn, ăp nkual pâl rlưn, ntŭk pâl nđaih. Ăp rgum công nghiệp ta n’gor dôl pơk hvi wơt nuĭh pah kan; hăn dak bah dih kan tay hao jêng nâp dăng jêh geh rlău 1 rmen đôlar năm 2021. Ăp yôk vải, yôk nhãn ntơm tâm yan pĕ đah săk geh n’hanh tăch khlay, dôl nta an nău geh nuĭh ƀon lan đăp mpăn nkra njêng... Ăp nău mbơh uĕh nĕ dôl pơk luh mpŏng kâp an rdâk hao tay, hun hao wăng sa bah Dak Lak./.

                    Nuĭh rblang: Y Sưng Phê Ja