VOV4.M'nông: Jŏ jêng nău way ơm, lôch rlu tết nguyên đán, druh ndăm lam dak hôm rhơn nđơr lăp ƀư tahen tĭng ƀư nău kan huêng khlay bah neh dak. Ta n'gor Dak Lak, bơi 300 druh ndăm hŏ nchrăp hăn lăp tahen ntơm bah bôk năm mhe Nhâm Dần – năm 2022.

Tâm rơh sơch lăp tahen dja, oh Nguyễn Trung Sơn (24 năm deh, gŭ ta tổ dân phố 8, thị trấn Quảng Phú, nkuâl Cư M’gar, n'gor Dak Lak) hŏ nchih si ƀŭt dăn lăp tahen. Sơn nkoch: gâp dôl ƀư ƀĭt ndeh an du ntŭk kan ta nkuâl đah rnoh prăk khay đăp mpăn 7 rkeh prăk ăp khay. Yơn đah nău ŭch rŏng lăp ƀư tahen n'hanh nău dơn kan bah săk nơm đah ƀon tơm, neh dak, gâp manh an êng du ding ƀât nău kan wăng sa gay lăp ƀư tahen.

“Gâp dŭt rhơn n'hao êng săk rnôk dơi lăp ƀư tahen. Gâp mbra ƀư lôch jêh nău kan bah mom ndăm. Gâp gĭt rnôk lăp tahen mbra dŭt lhăt, dŭt jêr jŏt yơn gâp nsrôih ntiăr nti an dŭt uĕh gay mô roh nău mpŏng bah ăp nuĭh an gâp".

Rnôk nchih si ƀŭt dăn lăp ƀư tahen, oh ndăm Trương Thái Hoàng (25 năm deh) dôl lah cán bộ đoàn phường Ea Tam, nkual ƀon têh Buôn Ma Thuột. Hoàng hŏ lôch jêh nti ngành Kinh tế - Nhih nti Đại học Tây Nguyên, n'hanh lah du đảng viên mom. Oh dăn lăp ƀư tahen hăn mât njrăng neh dak, tĭng bôk bơ̆- du hê cán bộ tahen hŏ rlu ranh.

“Đah nău dơn kan lah du druh ndăm mom lôch nti đại học ri ân geh nău ŭch rŏng n'hanh geh nău dơn kan đah neh dak lah ân dâk lor dăn lăp ƀư tahen. Tâm rnôk hăn gŭ ƀư tahen ân tĭng ƀư jăp kỷ luật, ntŭk gŭ rêh tâm tahen gay ƀư lôch jêh uĕh nău kan dơi jao, lôch jêh uĕh nău dơn kan ơm sĭt rêh jêng nuĭh ƀon lan uĕh blău lơn".

Năm 2022, n'gor Dak Lak dơi jao sơch lăp 2.977 druh ndăm tĭng ƀư Luật Nghĩa vụ quân sự. Ăp nkuâl tâm n'gor hŏ ƀư kăp pah kan sơch lăp ƀư tahen, geh 100%. Ăp druh ndăm lăp ƀư tahen đăp mpăn di rnoh mpeh chính trị, năm deh, n'hâm suan ngăch dăng, nău  gĭt blău văn hóa. Tâm nê geh 60 nuĭh geh nti trình độ đại học - cao đẳng; 4 nuĭh lah đảng viên, rnoh hôm ƀa ƀă lah đoàn viên; druh ndăm lah nuĭh rnoi mpôl đê̆ âk rlău 50%. Đại tá Lê Văn Hùng, Groi Chỉ huy trưởng nkre ƀư Tham mưu trưởng Bộ Chỉ huy Quân sự n'gor Dak Lak an gĭt:

"Hội đồng quân sự bah n'gor hŏ rđău đă ăp nkuâl ntik hvi uĕh ăp mpôl kan chính trị lam rêh jêng kon nuĭh, gưl uỷ n'gâng kan ta ntŭk ăp gưl leo ƀư nkoch trêng, ntĭm nti mbơh gĭt jru hvi mpeh Luật nghĩa vụ quân sự tâm ban kơt ăp si ƀŭt ntĭm nti bah Bộ, bah Quân khu, Hội đồng nghĩa vụ quân sự gưl n'gor tât lĕ rngôch ăp ƀon lan di năm deh nchrăp lăp tahen. Nkre mpôl hên ƀư mbơh kloh rvah nău an rong dơm đah ăp săk nuĭh mô kuăl jă lăp ƀư tahen. Ntơm bah nê ma ƀon lan, ăp druh ndăm di năm deh nchrăp lăp ƀư tahen ƀư ăp njuat sơch lăp gay nchrăp hăn ƀư tahen".

Tât aƀaơ, lĕ rngôch ăp druh ndăm lăp ƀư tahen ta n'gor Dak Lak hŏ chuh n'gang Covid-19 n'glai 2 n'hanh du đêt hŏ chuh n'glai 3. Tĭng trong nchrăp, tâm ôi 16/2, ăp nkuâl tâm n'gor Dak Lak mbra du rơh ƀư njŭn lăp tahen, đăp mpăn lam lĕ rngôch n'hanh lah nar rgum khuh n'gôr ngăn bah mom ndăm ăp rnoi nuĭh n'gor Dak Lak./.

Nuĭh rblang: Điểu Thân