VOV4.M’nông: Đah nău mĭn hun hao, ƀư ndruh ta neh tơm nơm, âk druh ndăm ta nkuăl ach o Buôn Đôn, n’gor Dak Lak lĕ janh joi trong hăn mhe gay rdâk njêng nău kan n’hanh ndrel ntop kơl hun hao.

          Plơ̆ tay nău kan jêh ăp nar rlu tết nguyên đan Nhâm Dần, nô Hồ Thế Mỹ, ta xă Ea Nuôl, nkuăl Buôn Đôn, n’gor Dak Lak dôl nsrôih boăt nthoi đah ăp ntŭk kan tăch, ntŭk tăch chrai gay pơk hvi an luh ndơ măng tây. Rnôk aơ, rlău 10 ha măng tây bah công ty Cổ phần Thương mại dịch vụ Ndơ lŏ mir hữu cơ Việt Nguyên (yor nô Mỹ ƀư tơm) n’hanh boăt nthoi đah ƀon lan lĕ tât yan pâk. Du nar, du hê ta geh nklăp 1 tạ tât du tạ n’gul măng tây rih, đah rnoh khlay tăch bah 40 rbăn prăk let lơ tĭng ntil măng tây.

          Nkoch mpeh rnôk ndâk njêng nău kan, nô Mỹ an gĭt, bah dŭt năm 2018, nô bônh jă rnăk wâl janh phah lơi lĕ rngôch 5 sào cà phê, rgâl tăm măng tây. Nkre tăm nkre nti nău blău ơm ta ăp n’gor, nô rgum ăp nuĭh băl ndrel trong hăn gay ndâk njêng công ty, boăt nthoi ntŭk tăch. Nô Hồ Thế Mỹ nkoch:

          “Gâp mâp âk nău roh đah ntil, mpeh kỹ thuật ri gâp lĕ hăn ăp nkual tăm têh ntil. Ăp nkual neh ma tăm ăp ntil tơm jŏ năm geh sât blak ri he an tăm măng tây, rgâl nkra đah trong he mât chăm lĕ rngôch mô geh dŏng phân hóa học ri tơm măng tây ntơm hun hao. Gâp ndrel đah 3 nuĭh rdâk njêng nău kan đah công ty Việt Nguyên, hun hao dăng lơn, ndâk njêng pơk hvi ntrong kan tăm măng tây aơ. Ndơ̆ pơng tât kônh wa, jao an khoa học kỹ thuật, ntop kơl ntil, phân poh, ntop tay đah kônh wa hun hao pơng ta nkual neh Buôn Đôn aơ”.

         Nô Hồ Thế Mỹ (đah ma) nkoch mpeh mir măng tây đah nuĭh uănh nsong.

Mpŏng ŭch tâm rgop gay ntop kơl ndrel hun hao, khay 10 năm 2021, ăp druh ndăm dôl rdâk njêng nău kan ta Buôn Đôn, tă bah rmôt kan Đoàn n’hanh Hội liên hiệp druh ndăm nkuăl lĕ njêng câu lạc bộ rdâk njêng nău kan. Nô Nguyễn Văn Hải, Chủ nhiệm Câu lạc bộ an gĭt, đah nău ŭch kơl an ăp băl rdâk njêng nău kan geh săk rnglăy, câu lạc dôl tâm rgop đah ăp nuĭh, nuĭh ntuh kơl n’hanh ăp nuĭh geh âk nău blău ơm gay ntop kơl, mbơm ntĭm an druh ndăm.

          “Du khay mbra geh du bôk nău kan cà phê rdâk njêng nău kan, jă geh ăp nuĭh rblang mô lah ăp nuĭh ƀư start up nkoch mpeh nău tâm nchră đah nsum mpôl rdâk njêng nău kan. Mâp, tâm tâm rgâl nău mhe đah ăp gưl, nău kan kơt lah Jrô tuch tăm mât rong, Jrô Kinh tế-Hạ tầng mpeh ăp nău kơl ntrŭt nsôr tuch tăm, mât rong; mbơh nu nău lam hvi tât ăp băl rdâk njêng nău kan tâm ntŭk gŭ rêh. Uănh khâl ăp ntrong kan, tâm rgop ăp ntrong kan đah ăp nuĭh tăch n’hanh ăp ntŭk nkoch mbơh báo chí gay ntrôl geh ntŭk tăch an ăp ntŭk kan rdâk njêng nău kan”.

          Tĭng nô Nguyễn Quang Trung, Bí thư nkuăl đoàn Buôn Đôn, ndrel đah ndâk njêng câu lạc bộ rdâk njêng nău kan, gay mât uĕh soan druh ndăm janh mĭn, janh ƀư bah đoàn viên, druh ndăm, năm bah năp, ăp rmôt Đoàn, Hội ta nkuăl lĕ ƀư âk nău ntop kơl druh ndăm hun hao wăng sa, kơt: Rmôt ăp jrô tiăr nti, ăp nar rƀŭn mpeh ndâk njêng nău kan. Tâm rgop đah Ngân hàng chính sách xã hội nkuăl an druh ndăm manh ƀư tĭng ăp nău hun hao wăng sa. Nô Nguyễn Quang Trung lah:

Câu lạc bộ rdâk njêng nău kan nkuăl Buôn Đôn uănh nsong ăp ntrong kan rdâk njêng nău kan.

          “Mpôl hên nsrôih nta an du nuih n’hâm rdâk njêng nău kan tâm druh ndăm, nta an ăp băl dơi gĭt ăp tơm prăk gay hun hao, nta an ăp rƀŭn nchră gay an ăp băl dơi tâm rgop, gay dôh rklaih jêr jŏt tâm nău ƀư tĭng ăp start up ta ntŭk nơm. Gâp mpŏng ŭch gưl ủy, n’gâng kan ƀon lan dŭt n’hâm uănh mĭn tât ntrong kan ndâk njêng nău kan, lơn lah ntrong kan rdâk njêng nău kan druh ndăm ta ntŭk. Ăp trong ƀư nău kơl bah Chính phủ, bah n’gor ri an geh ăp nău rgum kloh na nê̆, jŏ jong lơn n’hanh nta an âk lơn an ntrong kan rdâk njêng nău kan lah nsum kơt ăp ntrong kan rdâk njêng nău kan druh ndăm lah êng bah nkuăl”.

          Nuĭh rblang: Y Sưng Phê Ja