Tĭng ƀư nău n’glêh an bah Chính phủ mpeh jao neh, jao bri, nău rêh bah ƀon lan gŭ dăch kêng bri ta nkual Tây Nguyên geh tay nău kan, nsĭt geh wăng sa đăp mpăn; bri dơi mât njrăng uĕh lơn. Yơn lah ta du đêt ntŭk, nău jao bri mô di nuĭh, ƀư bri geh rŭn in rdâk njêng nhih jay mô geh nău way.   

Wa K’Châu rnoi K’Ho (ta thôn 2, xã Lộc Nam, nkuâl Bảo Lâm, n’gor Lâm Đồng) an gĭt, rnăk păng geh săk gay dơn 25,5 ha neh bri ta khoảnh 5, tiểu khu 491, n’hanh wa Ka Phấn hŏ đăng ký n’hanh geh săk gay dơn 16,5 ha ta tiểu khu 491 đŏng. Yơn lĕ bar hê mô geh dơn du blah neh bri đêt.    

“Bri ƀon lan ri gâp geh săk yơn bu mô geh jao đêt. Ntơm nơh, ntŭk kônh K’Hân geh lah: Mon geh săk tâm jao neh bri. Gâp ký siƀŭt tâm ton. Lôch nê păng lah: Ký moh lah dơm, ay mô geh nău dơi tăm bri ôh. Jao neh jao bri ma mô gĭt ntŭk neh jao, ntŭk bri mô gĭt ơm. Ntŭk geh jao ma dĭng gĭt!”

Tĭng săk nchih rmôt rnăk dơn bri dơi Sở Nông nghiệp Phát triển Nông thôn n’gor uănh an dŏng ri kruanh rmôt lah K’Đản, ta thôn 1 n’hanh 13 rnăk ta ăp thôn 2 n’hanh 4 bah xã Lộc Nam. Ndrĭ yơn mô gĭt ndơ lơh dĭng UBND nkuâl Bảo Lâm hôm n’glêh an jao bri an wa Nguyễn Duy Minh, gŭ ta mbrô 29, trong Tô Hiệu, phường Lộc Sơn, Nkual ƀon têh Bảo Lộc ƀư nuĭh ntơh măt đŏng. N’hanh rmôt mpôl mât bri tă bah wa Minh ntơh măt dja dơn geh 6 rnăk dơm, mô di lah 14 rnăk kơt rnôk njêng trong nchrăp. Lĕ rngôch rnoh hvi neh jao lah 209 ha, tâm nê geh bri lah 93 ha, neh tăm bri mô hŏ geh bri lah 116 ha. Lĕ rngôch nuĭh dơi jao neh bri tâm rmôt dja geh hộ khẩu ta ntŭk êng, n’hanh mô di lah nuĭh rnoi mpôl  đê̆.

Bri n’hanh neh tăm bri ta aơ mbrơi mbrơi jêng mir tăm tơm jong nar, mô dơn nê ma hôm geh tâm tăch rgâl n’hanh rdâk ƀư jay đŏng. Tĭng Sở Nông nghiệp n’hanh Phát triển Nông thôn Lâm Đồng, tât khay 9 năm 2019, tâm rnoh 93 ha bri krŏng hŏ jao an mpôl dja mât, hŏ geh roh dơm 73 ha.  Wa Võ Thiên Bình, Kruanh UBND xã Lộc Nam lah rjăp,  nkô̆ bri geh lơh, neh tăm bri geh rŭn in lah tă bah jao mô di nuĭh.

          “Nău jao neh, jao bri ri tâm bah ri aơ ta xã geh du đêt nău tih. Aƀaơ nhih pah kan cảnh sát ôp ŭanh dôl ƀư kloh nkô̆ nău dja. Kruanh rđău kan mât ŭanh tâm pah kan mât njrăng bri bah đơn vị tơm bri hôm âk nău khoah, geh nău tih lah jao neh bri mô di nuĭh”.  

Nar 8/7/2022, wa Lê Văn Ba ta thôn 4, xã Lộc Phú ban saơ du mpôl 3 nuĭh lah: Nguyễn Đức Dạo, Nguyễn Đức Chung n’hanh Nguyễn Văn Dũng dôl lơh bri ta khoảnh 6, tiểu khu 438A. wa Ba geh mpôl dja lơh đah jru rmanh 12%. Viện Kiểm sát ƀon lan nkuâl Bảo Lâm hŏ ƀoi lah phong 2 hê nuĭh tih Nguyễn Đức Dạo n’hanh Nguyễn Đức Chung mpeh nău tih “Ndra ma lơh rmanh nuĭh”. Wa Lê Văn Ba dŭt nuih ăl nău 3 nuĭh lơh, yơn moh dĭng geh 2 hê nuĭh geh tĭng lah phong dơm; nău tih lơh n’hang bri n’ho bah mpôl dja mô dơi nhih pah kan dơi kan nkoch tât.

          “Nde tâm nău Ngih dak jao neh jao bri ma hŏ tăch bri, lơh n’hang bri, đah rnoh roh huach si, ndơ tâm bri dŭt âk. Gâp hŏ ban saơ nău tih, gâp hŏ lah phong. Ri Kruanh nkuâl Bảo Lâm, Nguyễn Trung Kiên n’glêh an sŏk mplơ̆ lĕ rnoh neh bah lơ nê jao an ƀan mât njrăng bri tu dak nching sial Đam B’ri mât. Yơn aƀaơ, ăp nău tih ma UBND n’gor Lâm Đồng rđău đă Ủy ban Bảo Lâm đă ntrơn du lĕ rngôch rnoh neh bah lơ nê, tăm tay bri n’hanh ƀư kloh ăp nuĭh tih gay nkra tĭng di quy định. Yơn tât aƀaơ nău nê hôm roh chuêl hêng đŏng.”  

         Ta Lâm Đồng mhe geh 8 mpôl hŏ dơi UBND ăp nkuâl jao neh jao bri đah lĕ rngôch rnoh hvi lah 2.260 ha, yơn tât aƀaơ hŏ sŏk mplơ̆ 5 mpôl. Nău dŭt nkoch lah lĕ 3 mpôl đah 99 rnăk ta nkuâl Bảo Lâm dơi jao bơi 860 ha neh bri n’hanh neh tăm bri, geh sŏk mplơ̆ da dê. Wa Võ Danh Tuyên, Groi Giám đốc Sở Nông nghiệp n’hanh Phát triển Nông thôn Lâm Đồng dơn ngăn đŏng:

        “Ta Lâm Đồng geh nău jao neh bri mô di nuĭh. Bôk năp rnôk uănh năl gĭt, ntrŏng lah di, yơn tât bah kơi ăp rnăk nê geh khân păng nde tâm trong kơl lôch nê khân păng tăch. Ri neh bri geh rŭn in, bri geh lơh n’hang. Rnôk mpôl hên ban saơ ri dăn đă sŏk mplơ̆, n’hanh hŏ sŏk mplơ̆ 5 mpôl. Ta nê geh nău dơn kan mât uănh bah cán bộ mât bri, tơm bri, kiểm lâm n’hanh n’gâng kan ta ntŭk mô hŏ ƀư lĕ n’hâm suan tâm nkô̆ nău dja”.

        Dŭt âk rơh hop, âk nău dăn đă, n’hanh nău  n’glêh an hŏ dơi n’gâng kan geh tât n’hanh UBND n’gor Lâm Đồng n’gluh an dŏng đah nău ŭch: Đă UBND ă p nkuâl sŏk mplơ̆ ăp siƀŭt n’glêh an jao neh jao bri an ƀon lan. Yơn lah I ngăn, ta ăp nkual neh dja hŏ jêng mir tăm tơm jong nar, nhih jay mpông mpêr jĭr nâp. Bri dơi jao du trong dah rŏng lêng lang jêng geh tâm pit nsêk. Nău dơn kan dja mô dơn tâm nje an mpeh nuĭh dơn bri. Gĭt dơn sŏk mplơ̆ tay ăp siƀŭt n’glêh an jao bri an mpôl ƀon lan lah rtuh lĕ nău dơn kan?