Nău nchih 1 gâl bôk năp pơk uănh tĭng trong link dja:
VOV4.M'nông: Kơt mpôl hên hŏ nkoch, âk nuĭh ƀon lan rnoi mpôl đê̆ ta n'gor Dak Lak dôl dŭt nuih ăl n'hanh rvê rnôk dơn tăch du gâl neh dơm ma roh lĕ ma neh rong an gŭ mô lah geh nuĭh tơm rvăt nkrâm si ƀŭt nău dơi kơp dơn neh bah he; mô gĭt blah neh geh bu tăch, nchăm manh đŏng lah mô. Nkô̆ nău dja an saơ, dôl geh ăp trôm blŏng tĭng ƀư ăp rêng kan tâm di mpeh tăch neh ntu, lơn lah ta nkual nuĭh ƀon lan rnoi mpôl đê̆, ntŭk kônh wa hôm mô hŏ lăng geh âk nău gĭt wât mpeh ăp nău way an bah pháp luật. Nkre, geh ăp nău mpơl an saơ, ăp nău mplư rlăm bah ăp nuĭh tơm bôk ndranh neh ta Dak Lak dôl ƀư roh đăp mpăn ta ntŭk tăch rgâl, ƀư jêr jŏt an pah kan mât uănh ngih dak n'hanh khuch tât đăp mpăn rnă njrăng ta n'gor.
Tâm rơh hao khlay ndal neh năm 2021 n'hanh ăp khay bôk năm 2022, xã Cư Suê, nkuâl Cư M’Gar kâng n'har đah nkual ƀon têh Buôn Ma Thuột rƀŏng let lơ lah ngoăy tâm ăp ntŭk hao khlay neh dŭt duh hô bah n'gor mpeh nău tăch rgâl neh ntu. Wa Đặng Văn Hoan, Kruanh UBND xã Cư Suê an gĭt, rnôk dŭt hao khlay nuĭh luh lăp grâm grâm tâm xã lăp tât ăp njônh njănh. Tâm rnôk dja, dŭt âk kônh wa ƀon lan hŏ tăch neh ntu. Yơn lah, tâm rnôk tăch rgâl nuĭh ƀon lan ta ntŭk mô gĭt wât mpeh pháp luật, hôm ntop đah mô geh nuĭh mbơh nti jêng geh nuĭh tăch neh roh lĕ neh thổ cư. Bôk năp xã hŏ tăng du đêt ƀon kơt Sút H’luốt, Sút M’Đưng mbơh mpeh nô nău dja, rnoh âk tât bar pe jât rnăk. Tĭng wa Hoan, lĕ rnôk tâm blah neh bah nuĭh ƀon lan dôl dŏng ăp rnăk dơi pă an 400m2 neh gŭ yơn mô nchih gĭt na nê̆ ntŭk mpeh rong an gŭ ta lha si ƀŭt neh. Jêng rnôk tăch neh nuĭh ƀon lan mbra jêng geh bu nde sŏk lĕ neh an rong gŭ an he n'hanh an tay neh tuch tăm an kônh wa.
“Ta xã tâm bah ri aơ nơh nô nău hao khlay neh, pŭk dŭng rnoh khlay neh jêng tât nkô̆ nău nuĭh ƀon lan rnoi mpôl đê̆ geh tâm rgâl tăch neh ntu. Yơn lah, tăch rgâl neh ri nuĭh ƀon lan mô lăng gĭt wât ntơm bah nê geh bu nde tâm nkô̆ nău neh ntu, geh 400m2 neh gŭ, lôch tăch bu hăn rgâl êng lĕ săk. Nkô̆ nău dja lơn âk lah khân păng tăch ma trong hăn công chứng êng bah dih, nuĭh ƀon lan mô geh ntĭm nti na nê̆."
Du hê kruanh rđău kan Văn phòng Đăng ký neh ntu n'gor Dak Lak an gĭt, hŏ rƀah gĭt nău lư nuĭh ƀon lan tăch neh roh lĕ neh an rong gŭ ƀư jay, mô lah geh nuĭh rvăt ndjôt lĕ si ƀŭt an dŏng neh bar pe năm mô hŏ mplơ̆ ta n'gor. Mpeh nău way, rnôk si ƀŭt hŏ dơi ƀư tĭng ăp quy định dôl dŏng aƀaơ ri nhih pah kan mât uănh ngih dak mbra ƀư ăp si ƀŭt rgâl săk tăch luh blah neh. Ăp nuĭh ƀư ndranh way rvăt neh ơm dŭt đăng hăr, lah nuĭh ƀon lan mô gĭt wât, hŏ ký tâm ăp si ƀŭt kơt tâm ton tăch rgâl, ri dơn gĭt nduih êng săk nơm dơm:
“Geh bar njuat ân ƀư. Ngoăy lah ƀư hợp đồng nghiệp vụ, kuăl lah hợp đồng gay pă an tăch luh êng blah neh nê. Bar lah rnôk lôch jêh geh trích lục hôm ri hăn công chứng gay ƀư si ƀŭt tăch rgâl ri nuĭh ƀon lan ân ký đŏng. N'hanh lor rnôk ký lah gâp tăch dah âk mét vuông neh gŭ ri nuĭh ƀon lan, nuĭh nê khân păng ân gĭt êng. Nău dja lơn âk lah tă bah nău gĭt êng, nău gĭt blău bah nuĭh ƀon lan rnôk nsing nơm an ăp nuĭh tơm ndranh hăn ƀư si ƀŭt tăch rgâl neh".
Luật sư Tạ Quang Tòng, Chủ nhiệm Mpôl Luật sư n'gor Dak Lak rblang, kônh wa ta ăp ƀon lan dôl mô tŏng geh nău gĭt wât mpeh pháp luật jêng way dơh ký tâm ăp si ƀŭt tâm ton tăch rgâl tă bah mpeh nuĭh hăn rvăt ơm nchih lơi. Tâm nê, dŭt klach rvê lah nău kônh wa ký tâm si ƀŭt nsing nơm lĕ rngôch n'hanh jao si ƀŭt an mpeh hăn rvăt ƀư si ƀŭt. Nău geh sŏk lĕ neh gŭ mô hŏ di lah tât khuch dŭt têh ơm, đah du đêt nuĭh, mbra hôm geh bu rgâl êng lĕ rngôch blah neh, kônh wa mbra jêng roh dơm ma jêr lah phong dơi. Đah du đêt nuĭh na nê̆, nuĭh ƀon lan hŏ geh si ƀŭt tâm ton nchăm lor prăk đah nkô̆ êng êng đah rnôk rgâl săk, tăch luh blah neh, rnôk tăch rgâl geh nuĭh ƀư uănh saơ, Luật sư Tạ Quang Tòng an lah, kônh wa hôm geh ntŭk nsing gay lah phong tât nhih phat dôih gay đă manh rlu ăp rơh tăch rgâl geh tât blah neh nê n'hanh đă mplơ̆ si ƀŭt tâm ton tă bah geh nău mplư rlăm. Đah ăp nuĭh ƀon lan an lah mô ký ma mpeh nuĭh hăn rvăt ký êng gay ƀư lôch jêng si ƀŭt rgâl săk, tăch luh blah neh ri geh nău mpơl mplư rlăm n'hanh nuĭh ƀon lan mbra ƀư si ƀŭt lah phong tât nhih pah kan công an gay đă ƀư ôp uănh:
“Rnôk khân păng tâm ton nsum mpeh nău tăch dah âk mét neh gŭ n'hanh hôm mât tay dah âk mét neh gŭ ri mă ndơ ma tâm ton, geh ndơ an saơ đŏng, lah tâm ton dơm ma mbung ri nuĭh gĭt, nuĭh tăng ndrel. Lah khân păng an saơ dơi ăp ndơ nê ri mbra lah phong đă n'glêh an si ƀŭt tâm ton mô geh nău khlay tă bah geh nău mplư rlăm tâm si ƀŭt tâm ton tăch rgâl. Yơn khêp geh khân păng mô đă nuĭh nsing nơm, dơn geh du ding ƀư êng dơm ri aơ lah nău mplư rlăm âk lơn, mbra jêng geh mpơl nău tih mplư rlăm.”
Wa Nguyễn Văn Hoàng, Groi Giám đốc Sở Tài nguyên n'hanh Môi trường n'gor Dak Lak an gĭt, tâm rơh hao khlay neh mhe aơ nơh hŏ geh nuĭh ƀư ndranh êng, tăch rgâl êng neh bah nuĭh ƀon lan rnoi mpôl đê̆ ta nkual meng ăp nkual ƀon têh. Nău kan dja ƀư jêng duh jêr hŏ geh ăp nău roh đăp mpăn ntŭk tăch rgâl, jêr jŏt tâm pah kan mât uănh ngih dak n'hanh khuch tât đăp mpăn rnă njrăng ta ntŭk n'hanh nău rêh jêng bah nuĭh ƀon lan. Đah ăp nuĭh ƀon lan tăch neh roh lĕ neh gŭ, wa Hoàng an lah geh nău dơn kan bah n'gâng kan tâm dâng n'hanh ăp nhih pah kan dơi kan ta ntŭk rnôk mô hŏ ƀư jăp pah kan nkoch trêng, mbơh gĭt pháp luật tât nuĭh ƀon lan, lơn lah kônh wa ta ăp ƀon lan. Sở dôl rđău đă ăp nhih pah kan rnâng kan ta nkuâl kan nsum đah n'gâng kan ta ntŭk mbơh nti an nuĭh ƀon lan ƀư si ƀŭt lah phong tât nhih phat dôih rnôk geh nău mpơl mplư rlăm mô lah ƀư si ƀŭt lah phong tât công an rnôk geh nău mpơl mplư rlăm. Nkre, đơn vị dôl nsŏng kơl an UBND n'gor gay năn ngăch rgâl di nău ngăn geh dja:
“Gay der bah nău nuĭh ƀon lan geh bu mplư rlăm mpeh neh ntu, tâm let năp tay, Sở Tài nguyên n'hanh Môi trường mbra kan nsum tay tâm ban kơt ntrŭt ntrôl UBND gưl nkuâl, thị xã, nkual ƀon têh an ƀư ăp si ƀŭt rđău đă bah UBND n'gor mpeh nău rgâl tâm ban kơt n'hao dăng pah kan mât uănh neh ntu, tâm ban kơt ntŭk tăch rgâl neh ntu ta n'gor đŏng. N'hao nău khlay kan, nău dơn kan bah ăp gưl n'gâng kan n'hanh lam trong kan chính trị rêh jêng kon nuĭh tâm nău ntrôl dăng nkoch trêng, mbơh gĭt jru ntĭm nti pháp luật mpeh neh ntu an nuĭh ƀon lan wât, njrăng lor ta năp ăp nău mplư rlăm".
Hao khlay neh ta Dak Lak tâm ban kơt ta âk n'gor tâm bah ri aơ, ndrel đah nău nsrôih uĕh lah ntrôl dăng tăch rgâl, ntrŭt ntrôl hun hao wăng sa rêh jêng kon nuĭh ta ntŭk ri hŏ têk nkre âk nău tât khuch an tay bah kơi. Nău kônh wa ta ăp ƀon lan meng nkual ƀon têh tâm rlong tăch neh an ăp nuĭh bôk tơm ndranh mô njrăng na nê̆, geh mplư rlăm, mô dơn nê geh mplư rlăm dŭt âk mbra ƀư jêng kônh wa tŭp tâm nău tâm pit jêr ma nkra lôch dŭt. Tâm n'guăk nsum mpôl bah ăp ƀon lan mbra jêng chrai lêng yor ăp ntil tăch rgâl neh ntu mô kloh rvah, âk nău ndơm rlăm bah ăp nuĭh tơm bôk ndranh. Nkô̆ nău dja, n'gâng kan ta ntŭk, ăp nhih pah kan dơi kan ăp gưl bah n'gor Dak Lak ân lor nchrăp kan lĕ n'hâm suan gay năn ngăch nking nchăng n'hanh nkra tâm di nuih n'hâm./.
Nuĭh rblang: Điểu Thân
Viết bình luận