VOV4.M'nông: Tă bah mô way mât nkra mbro, hôm geh dak sor rchoh đŏng jêng âk njăr trong ta nkual mpeh yôk yang n'gor Kon Tum aƀaơ tâm nô nău jŭr djơh hô. Ndrel đah geh ma nău tât rmoh rmanh hăn ntung trong, lah mô dơi ơm nkra bah, geh ma nău pĭch rlâm neh, nkual ƀon lan gŭ geh tăch gâl khan yơt êng tâm khay mih dak bŭk năm aơ lah nău dŭt jêr jŏt.

 Bah thôn Đăk Ga hăn tât nklang xã n'har bri Đăk Nhoong, nkuâl Đăk Glei,  nklăp 3km. Ntơm nơh trong dja hŏ dơi tuh bê tông yơn tă bah mô way geh mât nkra jêng tât aƀaơ măt trong hŏ plôk, khuch. Ơm kơt nê ma hôm gung trong sop nkăp đŏng jêng bar ding trong ntoh âk pĭch rlâm lĕ mpeh brŏng dak bah dâng n'hanh hang dak dak sor bah lơ. Nô A Cu, kruanh thôn Đăk Ga an gĭt, nău rsong hăn bah 108 rnăk ƀon lan ta Đăk Ga way geh nău klach rvê:

      “Gâl trong hăn bah thôn Đăk Ga jŭr tât xã Đăk Nhoong dŭt jêr jŏt tâm khay mih lah way geh pĭch rlâm. Dŭt klach rvê lơn lah ăp kon se hăn nti geh pĭch rlâm neh lah dŭt klach rvê”.

Njăr trong nkuâl ĐH83 jong 12km bah xã n'har bri Đăk Nhoong hăn tât nklang nkuâl Đăk Glei dôl geh tâm ban kơt nê đŏng. Ntơm nơh njăr trong dja dơi prah dak chai, yơn tă bah âk năm mô nkra jêng măt trong âk ntŭk hŏ jêng nung ndrôk, nung rpu. Klach rvê lơn lah âk njăr trong hŏ geh rlâm hang dak bah lơ brŏng jru bah dâng. Ăp ntŭk pĭch rlâm dôl nar lơn ma lăp jru tâm nklang trong n'hanh brŏng bah dâng lah tâng jru. Wa A Nang, Groi Bí thư Đảng ủy, Kruanh HĐND xã Đăk Nhoong an gĭt, lĕ ma n'gâng kan n'hanh nuĭh ƀon lan way geh nău rvê mbro nău tât rmoh rmanh hăn ntung trong n'hanh geh ma nău kol khan trong, khan yơt êng rnôk khay mih tât:

       “Lah geh mih têh bar pe tơ̆ tay đŏng brŏng dak bah dâng, hang dak bah lơ mbra geh rlâm. Âk gâl trong mô di lah ngoăy, bar ntŭk. Brŏng dak bah dâng geh pĭch rlâm hŏ bơi lĕ hôm. Mpôl hên dơn manh pla nchih mbơh njrăng lor dơm, gay kônh wa bah jŭr hăn ta nê dơm. Mpeh jong jong ân nkra bah ăp ntŭk dja lơn lah brŏng dak bah dâng".

        Nkuâl n'har bri Đăk Glei, n'gor Kon Tum aƀaơ geh 70 km trong hăn nkuâl, 51 km trong hăn tâm ƀon, hăn tât mir ba lŏ sre. Rlău ma trong nkuâl ĐH 84 mhe dơi nkra têh hvi tay ri lĕ rngôch ăp njăr trong hôm ƀa ƀă hŏ jŭr djơh hô. Nkô̆ lah trong hŏ ƀư jŏ ơm, mô way geh nkra mbro hôm geh dak sor rchoh ƀư jêng pĭch rlâm đŏng, ƀư rsong hăn, lơn lah nău nchuăn rdeng ndơ tuch tăm bah nuĭh ƀon lan mâp âk jêr jŏt. Khay mih năm aơ âk xã bah nkuâl Đăk Glei, kơt: Đăk Nhoong, Đăk Blô, Mường Hoong, Ngọc Linh… dôl dâk bah năp geh ma nău kol khan trong n'hanh nkual ƀon lan geh khan yơt êng.

Tĭng Jrô kan wăng sa n'hanh ntung trong nkuâl Đăk Glei, n'gor Kon Tum, bah năp măt, jrô kan mbra tâm rlak prăk hŏ dơi tâm pă gay nkra jê̆, manh lor ăp ntŭk khuch khat ta ăp njăr trong nkuâl mât uănh gay đăp mpăn rsong hăn n'hanh đăp mpăn hăn trong bah năp, tâm n'hanh bah kơi khay mih phŭt. Mpeh jŏ jong, jrô kan dăn đă n'gor n'hanh Trung ương mĭn uănh tâm pă tơm prăk gay ơm nkra bah, kơi nkra têh hvi tay ăp trong me hăn ta nkuâl./.

Nuĭh rblang: Điểu Thân