VOV4.M'nông: Ăp n'gor Tây Nguyên dôl lăp tâm khay mih n'hanh tĭng nău nchroh bah nhih pah kan nchroh lor trôk nar năm aơ mbra mih n'hach tât ndal, rnoh âk dak mih mbra rlău rnoh rĭng geh bah âk năm. Nău dja ƀư an âk n'gor ta Tây Nguyên rvê rnôk âk dak bât n'gâr dak geh ma nău roh đăp mpăn. Công Bắc, Phóng viên Radio nău ngơi Việt Nam geh nău nchih nkoch ngăn.

Lôch bar pe tơ̆ mih bôk năm, n'glău dak bât Đắk Sắk, nkuâl Dak Mil, n'gor Dak Nông geh rnoh âk n'gâr 7 rkeh mét khối dak, hŏ bơi bêng. Dak bât dja hŏ tă geh đang luh dak hô n'hanh hŏ dơi nkra uĕh tay đah aƀaơ 30 năm. Ntơm bah nê tât aƀaơ, dak bât mô dơi uănh nkra ăp tŏng n'hanh geh trong nkra têh hvi tay. Wa Nguyễn Trương, Giám đốc gŭ kan ta Dak Mil, Công ty thuỷ lợi Đắk Nông an gĭt, dak bât Đăk Sắk aƀaơ geh nău dŏng dŭt khlay rlău ntơm nơh, yor păng geh tât âk n'glău dak bât, thủy điện mhe ƀư bah dâng njăr dak me. Hŏ tât rnôk nkra têh uĕh tay dak bât dja gay mât đăp mpăn:

       “Lah dak bât dja geh tât khuch ri mbra khuch tât 5 xã, nkuâl Dak Mil lah 3 xã, hôm nkuâl Krông Nô lah 2 xã, mô hŏ nkoch tât njăr dak me bah dâng păng, thuỷ điện âk.”

Tâm ban kơt nê đŏng, n'glău dak bât Đắk Pin ta xã Quảng Sơn, nkuâl Dak Glong, dơi ƀư bah rlău 20 năm. N'glău dak bât dja geh rnoh âk n'gâr dak 600.000 m3 dak, dŏng tŏ an rlău 350 ha tơm tăm. Yơn lah, aƀaơ dak bât ƀư ma neh hŏ geh dak sor rchoh, geh ma nău roh đăp mpăn âk. N'hong an dak hoch ler tuh ma bê tông hŏ jŭr djơh.

Tĭng Sở Nông nghiệp – Phát triển Nông thôn n'gor Dak Nông, n'gor geh rlău 260 n'glău dak bât, tâm nê Công ty TNHH MTV mât dŏng dak bât mât uĕh rlău 250 n'glău dak bât, hôm ƀa ƀă tă bah UBND ăp nkuâl, nkual ƀon têh mât. Tât aƀaơ geh 18 dak bât hŏ khuch khat, jŭr djơh. Wa Lê Viết Thuận, Kruanh Công ty TNHH MTV mât dŏng dak bât n'gor Dak Nông an gĭt, nô nău roh đăp mpăn dôl mbơh njrăng lor lĕ rngôch tâm rnoh 250 dak bât tă bah đơn vị mât. Tâm nê, dŭt rvê lah ăp dak bât jê̆ n'hanh dah găp, dơi ƀư ơm bar pe jât năm bah năp nơh:

         “Dak bât ta n'gor Dak Nông lah dak bât jê̆ da dê n'hanh hŏ ơm jŏ rlău 20 năm hôm. Ma dak bât jŏ rlău 5 năm  let lơ bu hŏ uănh năl  hôm ri mơ gĭt dơi tâm săk  dak bât geh đang luh dak, pĭch rlâm tâm bê tông, dak sor rchoh. Lah ta ntŭk hên aơ hŏ bar pe jât năm ntŭk hŏ dơi geh uănh năl nâp uĕh. Jêng nău tât mô gĭt ôi gĭt măng ri pha lah ngăn dơm.”

         Tâm  kâng đah Dak Nông lah Dak Lak geh 785 dak bât. Aƀaơ geh rlău 300 n'glău dak bât hŏ khuch khat đŏng, âk  săk dak bât hŏ geh pĭch rlâm, dak sor rchoh lăp jru tâm săk dak bât, geh rluh rlâm, luh đang hôch tâm trôk dak bât. Wa Nguyễn Hoài Dương, Giám đốc Sở Nông nghiệp n'hanh Phát triển nông thôn Dak Lak an gĭt, tă bah prăk ngân sách mpêt đê̆ jêng n'gor mơ tâm pă tơm prăk gay nkra têh hvi tay 77 dak bât yơn lơn âk lah dak bât jê̆. Tơm prăk bah n'gor mpêt đê̆, nău nkra têh uĕh tay n'glău dak bât dăn bah trung ương ntop kơl da dê,  jêng trong nkra bôk năp gay đăp mpăn nâp uĕh an ăp dak bât tâm khay mih hôm ân nchrăp lor bah tâm dâng đŏng. Đah ăp dak bât têh jong, nău khuch khat jru, n'gor njuăl nău dăn đă tât đah Bộ Nông nghiệp n'hanh Phát triển nông thôn, Chính phủ mĭn uănh ntop kơl nkra, n'hao têh hvi tay tâm let năp tay:

       “Lôch jŏ năm dŏng ri âk dak bât hŏ jŭr djơh, khuch khat, geh ma nău roh đăp mpăn âk tâm khay mih. Aơ lah nkô̆ nău dŭt  têh, tâm rnôk nê, tơm prăk ngân sách bah n'gor dôl dŭt jêr jŏt. Dăn đă Trung ương dŭt n'hâm uănh khlay, ntuh kơl ăp tơm prăk gay nkra têh uĕh tay ăp n'glău dak bât geh ma nău roh đăp mpăn".

        Lam nkual Tây Nguyên aƀaơ geh nklăp 2.000 n'glău dak bât. Geh ma nău roh đăp mpăn ăp dak bât n'gâr dak lăp tâm khay mih hŏ dơi Bộ Nông nghiệp n'hanh Phát triển nông thôn mbơh njrăng lor âk năm aơ. Tâm rơh hăn uănh năl nâp uĕh dak bât ta Tây Nguyên mhe aơ, wa Nguyễn Văn Tỉnh, Tổng cục trưởng Tổng cục Thuỷ lợi an gĭt, ta âk n'gor, tâm khay mih dak bŭk, ta ăp n'glău dak bât mhe nkoch tât nău ndjoh dak bŭk ngăn dơm, ndjoh tĭng weh ƀư ma mô hŏ mĭn tât nkhêp geh pling dak bât. Tâm rnôk nê, lĕ rngôch ăp n'glău dak bât dôl tâm nô nău mbơh njrăng lor roh đăp mpăn da dê, lơn lah ăp n'glău dak bât dơi bât ma neh hŏ âk năm. Aơ lah nău dŭt klach rvê tâm khay mih dak bŭk n'hanh ăp n'gor Tây Nguyên ân njrăng.

       “Mpôl hên dŭt rvê ăp ntil dak bât, n'glău n'gâr dak lah n'glău jê̆ n'hanh dah găp, đah dak bât lah dak bât neh n'hanh dơi ƀư ơm jŏ năm đah ăp rnoh prăk dŏng ƀư đêt tâm ban kơt công nghệ mô đăp mpăn tŏng nâp uĕh. Ntop đah nău âk năm mô tŏng prăk dŏng gay ma nkra têh uĕh tay, n'hao nâp dak bât jêng săk dak bât mô đăp mpăn nâp uĕh".

         Bah meng rgâl duh nđik trôk nar lơn ma krit nji, nô nău mih dak bŭk jêr gĭt năl lor, tâm rnôk nê hang rhiăng dak bât ta Tây Nguyên hôm tâm nô nău geh ma nău roh đăp mpăn, mô dơn nê jêng geh pling dak bât, lơh khuch khat têh an nkual bah dâng njăr dak me. Tâm rnôk kâp prăk ngân sách bah Trung ương gay nkra, n'hao têh uĕh tay, ăp n'gor  tâm nkual ân lor nchrăp tĭng ƀư ăp trong nkra đăp mpăn n'glău dak bât ơm năl saơ ntŭk khuch djơh n'hanh ndơ̆ luh nău mbơh njrăng lor năn ngăch an nuĭh ƀon lan./.

Nuĭh rblang: Điểu Thân