VOV4.M'nông: Ntŭk rgum mbơh nău lư n'gơ neh n'hanh mbơh njrăng lor rdôl dak lêng - Viện Vật lý địa cầu, Viện Hàn lâm Khoa học n'hanh công nghệ Việt Nam mhe mbơh njrăng lor, ta nkuâl Kon Plông, n'gor Kon Tum mhe geh 4 tơ̆ n'gơ neh mbro. Tĭng nê, rơh n'gơ neh lor bôk năp geh tâm rnôk 12 mông 46 mnĭt klong măng nar 22/6, dăng 3,2 độ (geh rnoh jru n'gơ nklăp 8,1km). Lôch nê nklăp 10 mnĭt (tâm rnôk 12 mông 58 mnĭt klong măng) geh tay du rơh n'gơ neh tâl 2, dăng 2,8 độ đŏng. Rơh n'gơ neh tâl 3 geh lôch bah kơi nê nklăp 15 mnĭt (tâm rnôk 1 mông 15 mnĭt kêng ang), dăng 2,6 độ. N'hanh rơh n'gơ neh tâl 4 geh tâm rnôk 2 mông 04 mnĭt ôi, dăng 2,6 độ. Ntŭk rgum mbơh gĭt nău lư n'gơ neh n'hanh mbơh njrăng lor rdôl dak lêng an gĭt, ăp rơh n'gơ neh dja dơi dăp gưl rmoh rman trôk nar lơh gưl 0. Aƀaơ Ntŭk rgum mbơh gĭt nău lư n'gơ neh n'hanh mbơh njrăng lor rdôl dak lêng- Viện Vật lý địa cầu dôl tĭng groi nđôi tay ăp rơh n'gơ neh dja./.

Nuĭh rblang: Điểu Thân