VOV4.M’nông – Pơh lễ nkah gĭt 90 năm Nar ndâk njêng n’gor Gia Lai nchrăp ƀư bah 19/5 tât lĕ nar 25/5/2022, đah ăp nău ƀư kơt: wơt dơn n’hanh mbơh ndrăp ndơ geh ơm, di tích lịch sử văn hóa ntoh lư bah n’gor; rƀŭn nchră “Boăt nthoi Tây Nguyên” đah bôk nău “Ntrŭt hun hao lŏ mir nâp nâl nkual Tây Nguyên n’hanh boăt nthoi trong khlay ndơ lŏ mir”, “Rƀŭn nchră Ntrŭt ngăch ntuh kơl n’gor Gia Lai”; “Rgum mpla nsơ tăch rgâl ndơ n’hanh nkoch ndơ OCOP nkual Tây Nguyên-Gia Lai”. Tâm trôm ăp nău ƀư aơ, rƀŭn nchră ntrŭt ngăch ntuh kơl bah n’gor lĕ dơi nchrăp uĕh.

Rƀŭn mbơh mpeh ăp nău ƀư nkah gĭt 90 năm Nar ndâk njêng n’gor Gia Lai.

Wa Nguyễn Hữu Quế-Kruanh N’gâng kan kế hoạch Đầu tư Gia Lai an gĭt: Gay boăt nthoi Tây Nguyên n’hanh ntrŭt dơi hun hao nâp nâl, ri nău ƀư khlay bah ăp nuĭh ntuh kơl dŭt khlay. Yor nê, Gia Lai dôl nsrôih rgâl nkra sam ƀŭt hành chính, hăn ndrel đah doanh nghiệp dôh rklaih jêr jŏt, nta an ntŭk ntuh kơl tăch rgâl uĕh gay wơt ăp doanh nghiệp mhe ntuh kơl tâm n’gor.

Nŭih blang: Y Sưng Phê Ja