VOV4.M’nông: Ntŭk tăch bánh Trung thu ta Gia Lai kŏ geh nau âk ueh đah ăp ntil bánh, âk ntil ueh. Năm aơ, ăp ntŭk ê nkra leo luh tăch tâm ntŭk tăch ăp ntil bánh ntơm bah thuk tât khlay, tŏng ŭch nau ŭch bah nŭih rvăt.

            Năm aơ, ntŭk tăch bánh Trung thu geh ndâk bư tă bah ơm. Ntơm bah bôk khay 7 âm lịch, âk ntŭk tăch bánh Trung thu kơt Kinh Đô, Yến Sào Khánh Hoà, Richy...hŏ ƀư ăp ntŭk ndrơng tăch ndơ tâm ăp trong tơm bah nkuăl ƀon têh Pleiku, rgum âk mpưm nŭih năch rvăt. Ăp năm, ntil ndơ tăčh bánh rvăt tă bah dak Malaysia, Đài Loan geh mpla tăch tâm ndrơng ndơ. Yơn năm aơ, âk ntŭk tăch ndơ kơl tăch âk ntil bánh Trung thu tâm dak nơm nkra. Rnoh bánh Trung thu năm aơ geh ntơm 280 rbăn tât 480 rbăn tâm du họp bánh, ntil ndơ bánh kah ngăn geh rnoh ntơm 560 rbăn tât du rkeh 700 rbăn.

            Tĭng yuh Bùi Thị Thuý Oanh-nŭih tăch ndơ tâm ntŭk Thuý Oanh, phường Diên Hồng, nkuăl ƀon têh Pleiku, êng nau geh âk ntil mpeh ntô lir ri rnoh tăch bah bánh Trung thu năm aơ kŏ geh hao khlay đŏng yor lah ndơ dŏng nkra bánh hao khlay rđil ăp năm:

            ‘Nsing tâm năch rvăt ndơ. Kơt lah du hộp ndơ geh rnoh klay prăk ri păng êng, hôm ăp hộp ndơ thuk êng êng ri êng đŏng. Rnoh năm aơ ri lah nsum păng khlay đê̆, geh ntil rlau du rhiăng rbăn ndrel geh ndơ ri bar pe rhiăng rbăn prăk geh đŏng”.  

            Yuh Bùi Thị lành, nŭih tơm tăch bánh Trung thu Yến Sào Khánh Hoà (ta ntŭk tăch 127 Phan Đình Phùng, nkuăl ƀon têh Pleiku) mbơh, ntŭk tăch bah yuh tăch 10 ntil bánh Trung thu đah rnoh ntơm 65 rbăn tât 110 rbăn/mlâm, ntơm 148 rbăn tât 657 rbăn tâm du hộp ăp ntil, hộp nklam ndơ khlay geh rnoh ntơm du rkeh 200 rbăn tât du rkeh 700 rbăn. Kŏ tĭng yuh Lành, gĭt nau ŭch bah năch, năm aơ ntŭk tăch ndơ bah yuh Lành geh tay du đê̆ ntil bánh geh nau kah sa êng êng gay ma năch dê rvăt sa:

            ‘Năm aơ bánh đah gap ri geh tay 2 ntil bánh mhe, nê lah ndơ geh nkra đah âk ntil ndơ sa êng êng ndrel du ntil ndơ geh n’ăp ma phô mai hôm bánh ri rbăn ri geh tay nau ƀô kah bah trà đŏng”.

            N’gâng kan mât ntŭk ntu tăch rgâl bah n’gor Gia Lai hŏ rđau ăp rmôt kan mât ntŭk ntu ƀư nau kan tăch rgâl n’hao nau kan mêt uănh ndơ gay ma nkra bánh Trung thu, geh tu tơm kloh ngăn. Ndrel ma nau rklaih mhal ăp nau ê nkra geh nau tih, tăch rgâl bánh răl, mô nâp kah, mô kloh tu tơm nkra, mô geh đăp mpăn kloh kah đah ăp ntil ndơ geh dŏng tăch tâm rnôk Tết Trung thu. Wa Lê Hồng Hà, Kruanh N’gâng kan mât ntŭk ntu tăch rgâl bah n’gor Gia Lai ngơi:

            ‘Ntơm bah bôk rnôk aơ ri phung hên hŏ ƀư ân nau ntrŭnh kan mêt uănh, nkân njrăng geh tât nau kan tăch rgâl bánh trung thu 2022 gay ma njrăng rdâng nau tăch rgâl bánh mô kloh tu tơm, lơh khuch khat tât nau đăp mpăn ndơ ngêt sa bah nŭih ƀon lan. Nkre lah n’hao nau kan mêt uănh đah ăp ntil ndơ geh tât ăp ntil ndơ rvăt dŏng sa lah nsum gay ma năn saơ ndrel ma mhal rjăp đah ăp nau tih ndrel ăp ntŭk, ăp nŭih ƀư nau kan tăch rgâl tâm nkuăl gay ma đăp mpăn ân nŭih rvăt dŏng ndơ”./.      

                        Nŭih rblang: H’Thi