Tĭng kơp uănh, du hê phung pah kan dôl geh rnon prăk khay bah 30 rkeh tât 50 rkeh prăk. Wa Lê Tấn Thanh, gŭ ta xă Đăk Wer, nkuăl Dak Rlâp, n’gor Dak Nông an gĭt: Tâm khay 10/2023, wa rgŏ jă bơi 70 nuĭh kan bah n’gor: Dak Nông, Phú Yên, Bình Phước n’hanh n’gor Miền Tây hăn ƀư ndrung sŭr. Tât aƀaơ lĕ bơi 4 khay, ntŭk kan dâk hăn manh knŭng trok du gâl dŭt đêt. Ưa Thanh lĕ âk rơh ôp yơn knŭng dơn tay lah nău đă kâp.

Aƀaơ gâp mât ngêt sa an oh nô âk khay aơ, bah nar 16/10/2023 tât aƀaơ, geh du rơh mpeh Công ty Vương Anh Thắng geh manh an geh 600 rkeh, tât aƀaơ prăk nar luh n’hanh tât prăk manh ndoh ndơ nklăp 3 rmen 2 tay. Gâp geh du rơh ôp đah nuĭh tơm ntuh kơl ri khân pơng ton đah gâp nar 20/12 oh nô ƀư kơl tât pơh mbra geh prăk n’hanh ton rơh aơ ton tât râng êng tât nar aơ gâp mô hŏ geh prăk, mô dơi mât oh nô tay. Mpŏng ngih pah kan dơi kan m’hâm ƀư nta an gay gâp geh prăk trok an oh nô sĭt ƀon sa têt. Hôm lĕ rngôch ăp nău aơ phong nuĭh di nuĭh tih ri jêh tết mkra yor nar lĕ tết tât hôm, oh nô khân pơng sĭt ƀon tơm sa têt.

Tâm ban ma nĕ, nô Trần Minh Hướng (ƀon tơm Tây Ninh) ndơ̆ oh nô ta ƀon tơm hăn kan ta ntŭk mât rong sŭr. rlău 3 khay aơ, săk nô Hướng n’hanh ăp oh nô dôl geh rnon bơi 500 rkeh prăk khay.

Hăn ta aơ bơi 3 khay hôm, bôk năp ri rlău 10 nuĭh 20 nuĭh, aƀaơ oh nô sĭt lĕ hôm 8 hê, mô geh prăk, mô gĭt sŏk prăk ta ntŭk trok an oh nô sĭt ƀon. Rĭng du hê oh nô prăk khay 12 rkeh, nuĭh tơm 15 rkeh, mpŏng geh prăk gay oh nô sĭt ƀon hôm aƀaơ ri mô gĭt m’hâm ƀư gay oh nô dơi sĭt.

Wa Hồ Công Anh Tuấn, gŭ nkuăl Chư Sê, n’gor Gia Lai, dơn ndâk ƀư 6 ndrung sŭr me ta ntŭk ƀư kơt tâm ban nău nĕ đŏng.

3 khay hôm mô hŏ trok prăk an oh nô phung kan. Khlay lah mpeh nuĭh tơm ntuh kơl n’hanh nuĭh ndranh ri na nê̆ m’hâm ri gâp mô gĭt kloh. Yơn aƀaơ ôp Vương Anh Thắng (ntŭk kan ƀư) ri khân pơng lŏ nduih an nuĭh tơm ntuh kơl lah nuĭh tơm ntuh kơl ŭch an prăk. Ma aƀaơ ngên ngên gâp knŭng ký ton đah Vương Anh Thắng, ngăn ri mô gĭt nuĭh tơm ntuh kơl lah moh nuĭh. Mpŏng geh trong uĕh ngăn lah an tŏng prăk khay phung kan an oh nô ta ngai mô geh nuĭh gŭ ta aơ kan 3 khay ndăng, ta jau bu hôm e ur kon tay, aƀaơ mô geh prăk lŏ êp tết hôm bu mô geh prăk ndeh ri yô̆.

Nău nchrăp ƀư ndrung mât sur me deh kon ta thôn Cây Xoài (xă Ea H’la, nkuăl Chư Pưh, Gia Lai) dơi ntơm rdâk ƀư tâm khay 1/2023, yor Công ty TNHH MTV Phát Tài Gia Lai ƀư tơm ntuh kơl. Dĭng lĕ prăk ntuh kơl bah nău nchrăp ƀư nklăp 80 rmen prăk, Công ty TNHH Vương Anh Thắng lah ntŭk tơm ƀư.

Nău mbrơi trok prăk khay an phung pah kan ta ntŭk ƀư, dơi an lah yor Công ty TNHH MTV Phát Tài Gia Lai n’hanh ntŭk kan ndâk ƀư, Công ty TNHH Vương Anh Thắng geh âk nău wăk kol geh tât nău tih ăp nău ntrŭnh tĭng tâm ton ma ăp ding lĕ ký bah năp nĕ.

Yor mô geh nău tâm ban ŭch tâm nău kan, jêng mô geh tâm ban ŭch nsum mpeh rnoh nău kan ƀư tĭng, jêng mpeh ngân hàng mô hŏ an prăk jêng phung pah kan geh rnon prăk khay mro mrăng.

Wa Rơ Lan Hoen, Kruanh UBND xă Ia H’la an gĭt, UBND xă mhe gĭt nu nău âk phung pah kan geh rnon prăk khay. Ta năp măt, UBND xă lĕ đă rmôt công an lăp uănh nu nău n’hanh đăp mpăn rnă njrăng. Nkre mbra ôp ăp ding geh tât ngăch mkra wăk kol an nuĭh ƀon lan. Jêh nĕ geh nău mbơh tât UBND nkuăl Chư Pưh n’hanh ăp nău kan geh tât mpeh nău aơ.