VOV4.M’nông:   Gia Lai geh ndơ geh ơm têh gay hun hao ngăch n’hanh nâp nâl yơn lŏ hôm e âk nău mô tŏng, tâm nĕ ntung trong mô uĕh lah ntŭk kol khlay jêng n’gor mô hun hao. Aơ lah ngoăy tâm âk nkô̆ nău khlay dơi nkoch ta nar pah kan mhe aơ bah Thủ tướng Chính phủ đah kruanh n’gâng tơm n’gor Gia Lai. Tĭng nĕ, Gia Lai dăn đă Thủ tướng n’hanh ăp n’gâng kan, nău kan uănh mĭn tay, ntop kơl n’gor ơm ƀư trong cao tốc Pleiku-Quy Nhơn, soih trong hăn ndoh ndơ bah nkual prêh Gia Lai tât ndrâm dak lêng.

Ta nar pah kan, Bí thư N’gor ủy Gia Lai Hồ Văn Niên lĕ nkoch du đêt nău dăn đă đah Trung ương, Chính phủ geh tât trong kan ntuh kơl ndâk ƀư ntung trong n’hanh du đêt nău nchrăp ƀư khlay ta n’gor. Lơn lah, dăn đă đah Trung ương, Chính phủ tâm pă prăk ntuh kơl lvang 2026-2030 mô lah jao ăp n’gâng kan, nău kan Trung ương kơl n’gor Gia Lai joi nuĭh gay ơm ƀư bah năp năm 2030 đah nău nchră ƀư ntuh kơl trong cao tốc Pleiku-Quy Nhơn. Dăn đă ăp n’gâng kan nău kan Trung ương kơl n’gor wăch rgum prăk ODA, kơt: Nău nchrăp ƀư hun hao ntung trong nkual ƀon têh Pleiku n’hanh ăp nkual nuih n’hâm n’gor dŏng prăk manh Ngân hàng Phát triển châu Á (ADB) n’hanh nău nchrăp ƀư ntuh kơl ăp ndơ dak bât, ntung trong dŏng prăk manh Ngân hàng Thế giới (WB).

Bah năm 2020, 3 n’gor Gia Lai, Kon Tum, Bình Định lĕ ƀư sam mbơh nsum, dăn đă Thủ tướng uănh mĭn tay mbơh ƀư trong cao tốc Pleiku-Quy Nhơn, jong 160 km, đah 4 mbôr trong, hăn sŏng đah Quốc lộ 19 ơm, prăk nchrăp 56.000 rmen prăk, bah tơm prăk, prăk manh ODA n’hanh wăch rgum âk tơm prăk êng. Aơ lah mbra trong nơih ngăn gay rdêng ndơ đah ăp n’gor bah lơ Tây Nguyên, Nam Lào, Đồng Bắc Campuchia đah ndrâm dak lêng quốc tế Quy Nhơn. Gay ơm dơi dŏng ăp nău dơi hun hao bah Gia Lai, wa Hồ Văn Niên-Bí thư N’gor ủy Gia Lai dăn đă Trung ương, Chính phủ pă tơm prăk ntuh kơl lvang 2026-2030 mô lah jao an ăp n’gâng kan, nău kan Trung ương kơl n’gor Gia Lai joi nuĭh gay ơm ƀư nău nchrăp kan bah năp năm 2030.

Thủ tướng Chính phủ Phạm Minh Chính ntoh ngơi ta nar pah kan. Yôk An Khê, ntŭk kâng n’har đah n’gor Gia Lai n’hanh Bình Định.

“Mpôl hên tâm nchră đah ăp đồng chí ta Bình Định, 2 ntŭk dŭt n’hâm mbơh ƀư ndâk njêng trong cao tốc aơ. Lơn lah trong cao tốc ta nkual neh dak, Tây Nguyên mô geh du trong cao tốc. Aơ lah nău mô tŏng têh an ăp n’gor Tây Nguyên. Mpôl hên mĭn lah, kơt ntung trong, ngăn lah trong hăn mô dơi uănh mĭn ntuh kơl, ngăn lah trong cao tốc ri đah Gia Lai lah êng, Tây Nguyên lah nsum đah ăp ntŭk Duyên hải Miền trung, Đông Nam Bộ, Tây nam Bộ n’hanh ăp n’gor mpeh bắc mbra geh đêt ngăn”.

Ntoh ngơi ta nar pah kan, Thủ tướng Chính phủ Phạm Minh Chính kơp dơn n’hanh rnê ăp nău nsrôih bah Đảng bộ, n’gâng kan ƀon lan n’hanh nuĭh ƀon lan ăp rnoi mpôl đêt n’gor lĕ dơi geh tâm năm bah năp. Bah meng nĕ, Thủ tướng Chính phủ Phạm Minh Chính lĕ ntĭm ăp nău hôm e n’hanh nău mô hŏ ƀư, ăp nău rvê rgop an Gia Lai hun hao ngăch n’hanh nâp nâl, Thủ tướng lah rjăp:

“Ntung trong dôl geh đêt, dông hôm jêr, n’hanh boăt nthoi ntung trong têh aơ gay ta Tây Nguyên geh dak lêng, gay Gia Lai geh dak lêng dŭt jêr jŏt. Knŭng geh trong 19 dơm, trong 19 ri dŭt jêt, hun hao ntung trong m’hâm ƀư gay an Gia Lai boăt nthoi đah ăp n’gor kiău ma, nsing nơm hao bah tâm trôm lĕ geh yơn mô âk. Gâp đă ăp đồng chí hao dăng lơn tay nsing nơm tay n’hanh nâp nâl an he hao. Aƀaơ knŭng geh nău nsrôih bôk năp lah nsing nơm, tal 2 lah an nsrôih âk lơn tay mpeh nău ƀư nsrôih lơn săch nău têh khlay pah kan an lôch nău nĕ”.

Thủ tướng nkoch đah Gia Lai mô hŏ tâm ban đah ndơ geh, nău nơih, tâm nĕ, ntung trong, boăt nthoi ntung trong kan têh hôm e jêr jŏt, lah nău kol an dôh rklaih. Mpeh dăn đă ndâk ƀư trong cao tốc Pleiku-Quy Nhơn, Trung ương n’hanh ăp n’gâng kan nău kan mbra hăn ndrel đah ăp ntŭk. Thủ tướng chính phủ Phạm Minh Chính đă lor lah Gia Lai an mât nuih n’hâm hao êng, uănh mĭn tay mbơh ƀư tâm ban kan ndrel tâm ban:

“Jao an Gia Lai lah ngih pah kan ngih dak dơi geh mkra mĭn njêng ntuh kơl trong cao tốc bah Gia Lai tât Ƀình Định luh ndrâm dak Quy Nhơn (Bình Đinh) n’hanh sĭt Mpông n’har bri Quốc tế Lệ Thanh (Gia Lai) đah trong ƀư kan ndrel. Ăp đồng chí geh du gâl an prăk trok neh, hôm ƀa ƀă trung ương kuăl jă, joi nuĭh kan ndrel đah ăp đồng chí. Tâm ban ŭch lĕ rngôch, ƀư lơ ơm, lơ uĕh, mô geh nău knơm. Lah he sŏk prăk ngih dak ri bah kơi 2030, đê̆ đŏng bah kơi năm 2045 mô hŏ dơi geh đŏng. Yơn dŏng ptăk kan nsum ri ăp đồng chí an gĭt ntêm nkrem prăk”.

Ndrel đah ăp dăn đă mpeh ntung trong, ta nar pah kan đah Thủ tướng Chính phủ Phạm Minh Chính, Bí thư N’gor ủy Gia Lai Hồ Văn Niên nkoch tât ndơ ƀư dak bât Ia Mơr (nkuăl Chư Prông). Na nê̆, kơp tât rnôk aơ geh rlău 4.700 ha bri hon êng an rgâl, dăn đă Chính phủ mbơh an Quốc hội ta rơh rƀŭn tal 3 mpeh nu nău mbơh nău nchrăp ƀư. Ndrel đah nĕ, n’gor dăn đă Thủ tướng Chính phủ an rgâl rnoh neh cao su khĭt n’hanh mô hun hao an tăm ăp ntil tơm êng; nkre mĭn njêng geh ăp trong ƀư, nău kơl tâm di đah nu nău aƀaơ hin gay ntrôl hun hao wăng sa rêh jêng, đăp mpăn mât njrăng bri dak-rnă njrăng, trong kan rnoi mpôl, chroh rƀŭn, ndâk njêng trong chính trị nkual Tây Nguyên.

                    Nuĭh rblang: Y Sưng Phê Ja