VOV4.M’nông:   Lĕ rngôch kon hŏk ăp n’gor tâm nkual Tây Nguyên lĕ tay ngih sam ƀŭt jêh âk tŏ tăch proăt yor khuch bah srê Covid-19. Nău kan ntĭm nti ăp ntŭk dôl rgum ntĭm nti tay, đăp mpăn uĕh nâp nău way kan, nkre ntuh kơl ntop tay ndoh ndơ ngih sam ƀŭt, đăp mpăn nău ntĭm-nti geh săk rnglăy uĕh ngăn.

Tâm mpôl nuĭh âk bah năp mpông pêr ngih sam ƀŭt tiểu học Nguyễn Công Trứ, phường Tân Lập, nkual ƀon têh Buôn Ma Thuột, yuh Trương Thị Ngọc Ánh njŭn kon lăp jrô 1, đah âk nău rvê:

“Ndơ̆ kon tât ngih sam ƀŭt saơ dŭt răm n’hanh rvê. Bah meng nĕ, geh du đêt nău rvê yor kon hôm e dŭt jêt n’hanh mô dơi chuh vaccine. Mpŏng đah nău nchrăp uĕh bah ngih sam ƀŭt kon mbra dơi nti uĕh ta ngih sam ƀŭt”.

Đah ngih sam ƀŭt, ntĭm nti tâm khay hôm tay bah năm nti lah dŭt khlay, gay nâp nâl nău wât an kon hŏk, ngăn lah đah kon hŏk jrô 1 n’hanh jrô 5, jêh du năm dŭt âk khay nti ta jay. Tĭng wa Bùi Thị Hương, hiệu trưởng ngih sam ƀŭt tiểu học Nguyễn Công Trứ, gay ntĭm nti ta ngih sam ƀŭt uĕh lap, ngih sam ƀŭt dŭt uănh tât đăp mpăn ăp trong njrăng n’gang srê:

“Mpôl hên lĕ mât uănh tât lĕ rngôch nai rgum ntĭm nti tay ăp nău nti bah bôk năm nti tât aƀaơ tâm ban đah ntĭm nău mhe bah pơh nti hôm ƀa ƀă. Mĕ bơ̆ ŭch, ăp nai dŭt nsrôih gay ăp kon lôch jêh bôk nău nti bah nơm du trong uĕh ngăn”.

Kon hŏk ngih sam ƀŭt tiểu học Nguyễn Công Trứ-Buôn Ma Thuột

Đah gưl nti Mầm non, nău mô dơi tât ngih sam ƀŭt ta bơi 1 năm nti mhe rlău lah khuch dŭt têh, lơn lah kon se 5 năm deh an tiăr nti âk nkô̆ nău lor rnôk lăp jrô 1. Tâm rnoh nĕ, kon se 5 năm ta ăp ƀon lan rnoi mpôl đêt an tiăr nti đah Nău ngơi yoăn mư dơi uĕh djăt tĭng ăp nkô̆ nău nti. Yor nê, ăp ngih sam ƀŭt mầm non ta Dak Lak geh nău kan n’hao nău ngơi Yoăn an ăp oh tâm năm tât. Nai Đặng Thị Tuyến, hiệu trưởng ngih sam ƀŭt mầm non Tân Lập, nkual ƀon têh Buôn Ma Thuột, an gĭt:

“Jrô nti geh rnoi mpôl đêt dăp an du nai nuĭh yoăn n’hanh du hê nai nuĭh rnoi mpôl đêt gay rnôk ƀư ntop nău ngơi yoăn an kon se geh nău dơh lơn. Rnôk kon se dŏng nău ngơi yoăn mô blău lĕ geh nai nuĭh yoăn, rnôk kon se mô wât nău ngơi me deh ri geh nai nuĭh rnoi mpôl đêt ntop kơl gay kon se gĭt nău ngơi yoăn n’hanh gay kon se dơh lơn rnôk lăp jrô 1”.

Hôm ta nkuăl Đăk Pơ, n’gor Gia Lai lĕ pă an rlău 1,6 rmen prăk ndâk ƀư ngih wâl ndoh ndơ, năp rwăt ăp ndơ ntĭm nti gay tâm di nău ŭch nti ren bah kon hŏk. Nai Thái Thị Cẩm Linh, nai ntĭm ngoại ngữ Ngih sam ƀŭt Tiểu học Trần Phú, xă Tân An, nkuăl Đăk Pơ an gĭt, ngih sam ƀŭt dơi ntuh kơl jrô nti thông minh đah 21 măy tính, măy pơk rup n’hanh màn hình ntĭm nti thông minh. Bah nĕ tât aƀaơ, jrô nti aơ lĕ rgop tâm nău n’hao uĕh ntĭm nti bah ngih sam ƀŭt. Tă bah nĕ kơl kon hŏk ŭch lơn đah nău nti, nai ntĭm âk nău uĕh lơn an kon hŏk.

Kon hŏk ta Buôn Ma Thuột nđơr răm tâm nar plơ̆ ngih sam ƀŭt

“Gâp saơ dŭt dơh an nău ntĭm. Nău ngơi, rup uĕh kơl an nău ntĭm nti tât kon hŏk ngăch n’hanh dơh lơn. Măy dŏng dŭt đăp mpăn, mpôl hên dŏng lĕ dŭt n’hâm”.

Tâm rnôk ndoh ndơ ntĭm nti bah Ngih sam ƀŭt Tiểu học Trần Phú hôm e dŏng dŭt uĕh, ri jrô nti đah 40 măy tính ndrel màn hình, măy chiếu thông minh bah Ngih sam ƀŭt THCS Chu Văn An lĕ djơh rlău n’gul. Gay đăp mpăn an nău ntĭm n’hanh nti, kon hŏk an gŭ nsum 2 tât 3 oh dŏng du măy tính. Nai Nguyễn Cao Trí, Hiệu trưởng Ngih sam ƀŭt THCS Chu Văn An, nkuăl Đăk Pơ an gĭt:

“Rnôk ma mô geh prăk rwăt ri hôm e nkra ƀa ƀơ jêng hôm e dơi dŏng gay ntĭm an ăp oh. Yơn lah, tâm nău ăp màn hình jŏ ir ri dŏng mô uĕh ngăn”.

Ăp năm bah năp, ăp ntŭk ntĭm nti ta nkuăl Đăk Pơ, n’gor Gia Lai lĕ nchrăp ndâk ƀư trong nchrăp mât uănh, dŏng jrô nti bộ môn n’hanh ndơ ntĭm nti tâm di đah nău geh bah tĭng ntŭk, đăp mpăn mât uĕh dŭt n’hâm săk rnglăy dŏng ndơ. Tât aƀaơ, 22 ngih sam ƀŭt ăp gưl ta nkuăl Đăk Pơ, n’gor Gia Lai dơi ntuh kơl tŏng ăp ndoh ndơ, năp rwăt ndơ ntĭm nti. Wa Nguyễn Thị Như Thủy, Groi Kruanh jrô kan ntĭm nti nkuăl Đăk Pơ an gĭt: Tĭng trong nchrăp, năm 2022, nkuăl Đăk Pơ ntuh kơl rlău 1,6 rmen prăk ntop kơl ăp ngih sam ƀŭt ta ntŭk ntuh kơl ndoh ndơ, năp ndơ ntĭm nti gay rhŏ an nău ntĭm nti. Tă bah nĕ, ntơm tâm di nău kan rgâl mhe ntĭm nti tâm nu nău mhe.

Kon hŏk Ngih sam ƀŭt Tiểu học Trần Phú, xă Tân An, nkuăl Đăk Pơ, Gia Lai.

“Năm nti 2020-2021, Jrô kan lĕ ƀư hăn uănh ăp ndoh ndơ n’hanh gĭt tay nu nău, ta ăp ngih sam ƀŭt. Geh dăn đă UBND nkuăl năp n’hanh ntop prăk gay năp rwăt tay. Aƀaơ bôk năm 2022, nkuăl lĕ ntuh kơl an du ngih sam ƀŭt bah 60 tât 80 rkeh prăk gay ntop năp rwăt mhe mô lah nkra gay rhŏ an nău ntĭm n’hanh nti an ăp ngih sam ƀŭt”.

Rlău 1 năm nti đah dŭt âk khay nti trực tuyến, aƀaơ plơ̆ tay nti ta ngih sam ƀŭt, ăp ntŭk ntĭm nti ta nkual Tây Nguyên dôl ngăch đăp mpăn ƀư, mât nău nti ren, ntuh kơl ndoh ndơ, dŏng khay nti dơi tât ngih sam ƀŭt ƀư ntĭm n’hanh nti săk rnglăy gay lôch uĕh nău kan năm nti n’gluh an.

                              Nuĭh rblang: Y Sưng Phê Ja