VOV4.M'nông: Rlău n'gul năm 2022, rnoh âk geh n'gluh tơm prăk ntuh kơl ngih dak n'gor Gia Lai mhe geh bơi 23%, đêt rlău rĭng geh lam dak lah rlău 27%. Tâm nê, âk trong nchrăp kan tơm khlay bah n'gor geh ƀư mbrơi tă bah ân rgâl rnoh ntuh kơl lôch tât khuch bah hao khlay neh n'hanh hao khlay lŭ loih. N'gâng kan dơi kan ta ntŭk nsrôih nsŏng kơl an UBND n'gor mpeh pah kan n'gluh tơm prăk rdâk njêng tơm, gay tât rnoh ndơ̆ luh.

Ntơm bah kêng dŭt năm 2021, Ban mât uănh ntuh kơl rdâk njêng nkuâl Chư Păh (Gia Lai) hŏ ƀư lôch jêh ăp si ƀŭt ntuh kơl 4 trong nthoi ăp xã nkual jru ngai gay an ƀư ntơm bah bôk năm 2022. Yơn lah, rnôk lăp tâm nar ƀư ri lŭ loih hao khlay ndal. Tĭng nê, xi măng, lŭ loih, pring diezen, dak chai hao  ntơm bah 10 tât 20%, mô dơn nê geh ndơ hao khlay rlău n'gul rnoh khlay hŏ dơi uănh an dŏng bôk năp. Nău dja ƀư n'gor ân rlu ăp trong nchrăp kan ntuh kơl gay kâp ăp n'gâng kan bah n'gor ntĭm nti. Wa Đặng Thái Huy- Kruanh Ban mât ŭanh ăp trong nchrăp ntuh kơl tơm nkuâl Chư Păh an gĭt:

        “Tâm lĕ rngôch rnoh 100 rmen prăk nê, rlău lĕ rngôch rnoh ntuh kơl nklăp 10 rmen prăk. Rnôk nê, nkuâl ƀư si ƀŭt mbơh rblang UBND n'gor lah dăn nău rgop. Aƀaơ, ŭch an ƀư lah 4 njăr trong, aƀaơ nkuâl sơch 2 njăr an ƀư lor. Kêng dŭt gâl kan, lah rnoh khlay pring hŭch ri an ƀư tay kơt ơm. Lah hôm rlău rnoh đŏng ri ân đă n'gor rgâl tay trong nchrăp kan".

         Ndrel đah nău hao khlay lŭ loih, ri hao khlay neh mhe aơ ƀư nău đă ntrơn du mâp jêr jŏt đŏng, âk trong nchrăp kan rgum tơm ta Gia Lai geh ma nău ƀư mbrơi. Ntoh lư lah trong nchrăp ƀư mbluh hăn tât nkuâl Chư Sê- Chư Pưh- Chư Prông geh njăr jong 33km, lĕ rngôch rnoh ntuh kơl 320 rmen prăk. Trong nchrăp ƀư ntơm bah khay 3/2021, tât aƀaơ, tuh choih măt trong, tuh lăk ta âk gâl trong hŏ ƀư lôch. Êng gâl hăn rlău du đêt nkual ƀon lan gŭ  ta Thị trấn Nhơn Hòa, nkuâl Chư Pưh, geh kol đă ntrơn du yor nuĭh ƀon lan mô tâm ban ŭch. Wa Phạm Xuân Điệp- Giám đốc Ban mât uănh trong nchrăp kan ntuh kơl rdâk njêng n'gor Gia Lai- nuĭh tơm ntuh kơl, an gĭt:

        “Aƀaơ, hôm rlău 2km mô hŏ geh trong nchrăp đă ntrơn du bah nkuâl. UBND n'gor n'hanh ăp đơn vị, nhih pah kan geh tât hŏ rđău đă ntrôl ngăch đă ntrơn du. Mpôl hên nchrăp khay 9 ri ƀư tuh lŭ săp, ăp ntŭk bôk ntung bôk năp lôch jêh. Tât kêng dŭt khay mih, ăp đơn vị mbra rgum an tuh lăk". 

Tĭng Sở Kế hoạch n'hanh Đầu tư n'gor Gia Lai, năm 2022 lah năm an ƀư âk trong nchrăp kan mhe bah rơh ntuh kơl jong dah găp 2021-2025. Đah ăp trong nchrăp ntơm ƀư mhe,  roh âk mông nar an ƀư ăp si ƀŭt weh ƀư, uănh năl an di, tâm rlong ƀư ndranh.., ân tât kêng dŭt năm mơ ntơm dâk ƀư, jêng ăp khay bôk năm n'gluh tơm prăk geh đêt. Rnoh khlay pring, lŭ loih hao ndal hŏ ƀư jêr jŏt dŭt âk an ăp nuĭh ƀư ndranh, lơn lah ăp trong nchrăp ký ton tĭng trong rnoh khlay mô rgâl, ntơm ƀư tâm ăp năm 2020, 2021. 

        Na nê̆, năm 2022, n'gor Gia Lai geh lĕ rngôch 27 trong nchrăp ntuh kơl, đah lĕ rngôch tơm prăk ƀư rlău 3.600 rmen prăk. Kơp tât 19/7/2022, n'gor mhe n'gluh geh bơi 993 rmen prăk, tâm ban đah 22,88% (đêt rlău rnoh rĭng geh lam dak lah rlău 27%). Wa Nguyễn Hữu Quế- Giám đốc Sở Kế hoạch Đầu tư Gia Lai an gĭt, aƀaơ geh 2 trong nchrăp kan rgum tơm kol nău đă ntrơn du, 11 trong nchrăp mô hŏ ƀư lôch jêh si ƀŭt ntuh kơl. Du đêt trong nchrăp geh tât rnoh khlay lŭ loih rgoh n'gơ, ăp nuĭh tơm ntuh kơl ân dăn rgâl hao tơm prăk. N'gor hŏ njêng 4 rmôt pah kan way hăn ôp uănh, ntrŭt ntrôl ăp nkuâl, ăp ntŭk kan, dăn đă ngăch geh trong nkra droh rklaih jêr jŏt tâm ntuh kơl ngih dak. Tĭng wa Nguyễn Hữu Quế, aƀaơ ăp kŏ kol bôk năp hŏ dơi nkra bah:

       “Ăp nău tât êng geh bôk năm 2022, nklăp mô hôm geh tay đŏng ôh, ntĭt kơt rnoh khlay ndơ ƀư hŏ hŭch, hao khlay neh mô hôm geh tay đŏng; du đêt ndơ ƀư kol quy định ri hŏ dơi ăp n'gâng kan uănh an dŏng. Kơt nê̆, ntơm bah aơ tât kêng dŭt năm, nău an ƀư ntuh kơl rdâk njêng tơm n'hanh n'gluh tơm prăk ngih dak, ndơ tât khuch tât bah nău uănh lhơ bah ăp tơm nuĭh ntuh kơl n'hanh ăp ƀan mât uănh trong nchrăp kan. Mpôl hên nsrôih nsŏng kơl an UBND n'gor pah kan n'gluh tơm prăk rdâk njêng tơm ta n'gor Gia Lai tŏng đah nău ŭch geh, tât rnoh ndơ̆ luh”.

Tĭng Sở Kế hoạch n'hanh Đầu tư n'gor Gia Lai đŏng, n'gor aƀaơ geh ăp trong nchrăp tơm khlay kơt: Trong nchrăp ƀư trong hăn n'har bri jăch ndăn nkuâl Đức Cơ, n'gor Gia Lai (ntơm ƀư khay 12/2020, nchrăp ƀư lôch jêh khay 11/2022); Nchrăp ƀư trong mbluh rloh ăp nkuâl Chư Sê - Chư Pưh - Chư Prông, n'gor Gia Lai (ntơm ƀư khay 3/2021, nchrăp ƀư lôch jêh khay 12/2022; Nchrăp kơi pơk nkra têh hvi tay trong n'gor 663 (ntơm ƀư kêng dŭt khay 12/2021, nchrăp ƀư lôch jêh khay 11/2023); Nchrăp kơi pơk nkra têh hvi tay trong n'gor 664 (ntơm ƀư khay 12/2021, nchrăp ƀư lôch jêh tâm khay 11/2023).

Nuĭh rblang: Điểu Thân