Nkhêp nkah ndray 93 năm nar way ơm Mặt trận Tổ quốc Việt Nam, Kêng măng ntri (8/11), Uỷ ban Mặt trận Tổ quốc Việt Nam n’gor Gia Lai khuh n’gôr ƀư Nar tâm rnglăp ăp rnoi nuĭh ta nkual ƀon lan gŭ năm 2023 ta thôn Plei Kte lớn A, xã Ia Yeng, nkuâl Phú Thiện. Rlău 42 năm têh jêng, hun hao tât aƀaơ thôn geh 210 rnăk đah 950 nuĭh, geh 27 đảng viên.

Tâm nê, rnoh rnăk ach o hôm nklăp 6%, tâm thôn geh 3 rnoi nuĭh ndrel gŭ rêh lah Tày, Bahnar n’hanh Jarai. Kônh wa tâm thôn lơn âk rêh ma nău kan tuch tăm mât rong, tăm ba lŏ bar tơ̆ tâm du năm geh 146 ha, tơm bum blang 180 ha, tăm biăp, tuh ăp ntil 6 ha, rĭng geh tĭng bôk nuĭh nklăp 41.000.000 đ/nuĭh/năm. Ăp năm rlău aơ, ăp mpôl kan chính trị rêh jêng kon nuĭh n’hanh ƀon lan thôn Plei Kte lớn A hŏ nsrôih tĭng ƀư  ăp rơh rgŏ jă, trong leo tâm rlong rŏng dak ta ntŭk, rgum tơm lah rơh rgŏ jă “Lam ƀon lan tâm rnglăp rdâk njêng thôn ƀon mhe, nkual ƀon têh kloh rsang”; “Ƀư rgâl nău mĭn, nău  kan tâm ƀon lan rnoi mpôl đê̆ gay tĭng kơn nsan hao klaih rlău ach o”.