Wa Trần Thị Tuyết Hạnh, tâm xã Cư An, nkuăl Đăk Pơ, n’gor Gia Lai geh nau rêh jêr ngăn. Sai wa geh ji jru, ăp kon mô tŏng prăk gay ma rgop kơl an, ri ma n’hâm soan hŏ huch hô, wa êng du hê joi prăk, joi sa. Ntơm rnôk dĭt nơm geh tâm rnok geh dơi kơl an rvăt bảo hiểm y tế, wa Hạnh hŏ nsôih manh, rvăt ân lĕ ân 5 nŭih tâm rnăk vâl:

"Rnăk hên ri geh 5 nŭih, rnôk ê geh bôk nau kan kơl an ri ngih gâp rvăt tĭng du nŭih, mô tŏng prăk ma rvăt lĕ 5 nŭih ôh, yơn rnôk aơ geh nau kơl an 40% ri hôm 60% rnăk gâp nsôih pơk trong ân dơi rvăt lĕ ân 5 nŭih tâm rnăk vâl geh bảo hiểm ân tŏng ăp. Yor tâm ngih gâp ri sai gâp ji jâk jru ngăn, ji tâm 15 năm ma aơ hôm”.

Yuh Đinh Thị Bước kŏ lah ngoai tâm ăp rnăk vâl ach o tâm ƀon Pơ Nang, xã Tú An, nkuăl têh An Khê geh kơl an rvăt bảo hiểm y tế. Yuh Bước mbơh, rnăk yuh saơ rnăk vâl nơm đăp mpăn ngăn rnôm ma lĕ 6 nŭih tâm rnăk vâl kŏ geh dŏng bảo hiểm y tế 100% tă bah nau kơl an bah Ngih dak. Nau kan aơ hŏ pơk trong ân yuh bah oi nau jâk mpeh prăk kăk lah rnôk geh ji kuet. Yuh Bước nkoch: Geh kơl an bah Ngih dak, ngih gâp rvăt bảo hiểm y tế gay ma ueh ân n’gâm soan nơm. Tâm ngih, bu ranh, kon se, têh jê̆ ri kŏ geh hăn khám, săm nau ji tâm ngih dak si kŏ geh kơl an ăp nau kan mât chăm ueh mpeh n’hâm soan đŏng”.

Lvang năm 2023-2025, êng nau kơl an tă bah tơm prăk Trung ương ntrŭnh Luật Bảo hiểm y tế tĭng nau ntrŭnh mrô 48 bah Hội đồng nhân dân n’gor Gia Lai, tơm prăk n’gor kơl an nklăp 30% rnoh prăk rvăt bảo hiểm y tế đah rnăk ach o ndrel rnăk nŭih geh kon se nti rnoi mpôl đê̆, kơl an 10% đah rnoh rvăt bảo hiểm y tế tâm răk nŭih ƀon lan pah kan lŏ mir, tăm bri, mât rong kah, geh nau rêh mô lăng dăng tĭng nau ntrŭnh bah Chính phủ. Ƀư tĭng nau kan aơ, êng nkuăl têh An Khê hŏ kơl an bơi tât 16 rbăn nŭih. Wa Trịnh Duy Phước, Giám đốc Bảo hiểm xã hội nkual têh An Khê, n’gor Gia Lai mbơh, nchrăp tât rnôk lôch năm aơ, An Khê mra geh nklăp 30 rbăn nŭih geh kơl an rnoh prăk rvăt bảo hiểm y tế:

‘Jêh rnôk geh nau ntrŭnh bah HĐND n’gor, rmôt kan hŏ tâm rgop ngăn đah Đảng uỷ, UBND ăp xã, phường kŏ kơt lah ăp ntŭk kan geh tât nkoch trêng, bonh đă ƀon lan gay ma gĭt nau ntrŭnh bah Đảng ndrel Ngih dak. Bảo hiểm xã hội kŏ nsôih tâm rgop ngăn đah ăp xã, phường gay ma ƀư ăp nar tâm nchră, ăp n’ha săm ƀŭt, ăp ntŭk păng lir gay ma nkoch trêng, ngăn lah nkoch tât nau săk tam ngăn nê lah hăn nkoch ma mbung, tâm nchră mbơh gay ma ƀon lan gĭt, ơh ăp nau kol, nau tât ma ƀon lan ê kloh geh tât nau kơl an bah bảo hiểm y tế”./.