VOV4.M'nông: Ta n'gor Gia Lai, tĭm nti mầm non, lơn lah ta nkual rnoi mpôl đê̆ dăp rduăl âk nău jêr jŏt tă bah me bơ̆ mô hŏ gĭt lĕ nău khlay bah nău tiăr nti n'hanh dâl ngơi ma nău Yăn lor rnôk kon se nti tiểu học. Tâm âk năm aơ dơi tâm pă sĭt kan ta nhih nti ƀon Ia Tông, xã Ia Dêr, nơm geh nkoch trêng blău, nai ntĭm Ksor H'Nhiêm (ta nhih nti mẫu giáo 30/4- nkuâl Ia Grai) hŏ rgŏ jă geh 100% kon se nti mẫu giáo hăn tât nhih nti, nkre ƀư pơk jrô nti bán trú ta ƀon ach o.   

Bol mô ru đah nău kan mir ba, yơn ăp măng, ur sai yuh Rơ Com H'Lai (deh năm 1993, ƀon Ia Tông, xã Ia Dêr, Ia Grai) tâm pleh ndrel kon bu ur Rơ Com H’ Nanh (jrô mẫu giáo 4 năm deh) nti ăp bài răk tă bah nai Ksor H’Nhiêm njuăl. Lôch bar pe tơ̆ uănh nău ntĭm bah nai H’Nhiêm, yuh H’Lai quay tay video tĭng ntĭm nti, njuăl tay an nai uănh tay. Ntơm bah khay 9/2021 tât aƀaơ, yor nuh srê COVID-19, jêng mon H’Nanh n'hanh 37 băl jê̆ êng ƀa ƀă ta jrô nti mẫu giáo ndop, ntŭk nhih nti ƀon Ia Tông, xã Ia Dêr, nkuâl Ia Grai hôm dơn ăp tŏng mbro 5 bài nti online ăp pơh đŏng. Bol mô mâp na nê̆ nai ntĭm, yơn ma trong ntĭm nti dja, H'Nanh n'hanh ăp băl dơi tâm dâl mbro n'hanh dơi nai H’Nhiêm pơk uănh, rƀah gĭt nău lư kơt nti. Lah bôk me yuh H’Lai saơ dŭt di nuih n'hâm ntơm bah bôk năm nti tât aƀaơ, kon hŏ nti dơi âk nău mprơ mhe n'hanh dŭt mpŏng kâp ăp nău ntĭm nti bah nai tâm ăp măng:

Gâp mô hôm rvê yor geh nai ntĭm nti, mât uănh, gâp hăn kan mô hôm rvê. Kon gâp ri gĭt răk, gĭt mprơ, gĭt wât dŭt âk lơn”.

Yuh Rơ Châm H'Yúi- chi hội trưởng me bơ̆ kon se nhih nti mẫu giáo ƀon Ia Tông, xã Ia Dêr, nkuâl Ia Grai an gĭt, đah aƀaơ 3 năm bah năp nơh, ntŭk nhih nti mẫu giáo dơn geh du nduang jay hvi nklăp 50 mét vuông hŏ jŭr djơh dơm. Nkô̆ lah tă bah âk me bơ̆ tâm ƀon mĭn lah, kon se ntơm bah 3 tât 5 năm deh mô hŏ nti rplay si ƀŭt, jêng hăn nti mẫu giáo lah hăn pâl dơm. Ntơm bah năm nti 2018-2019 tât aƀaơ, nai H’Nhiêm sĭt ƀư tơm mât, ma ăp rơh  hop me bơ̆ kon se nti, hop ƀon, nai H’Nhiêm hŏ rblang ma nău Jrai kơl me bơ̆ kon se gĭt hăn nti mẫu giáo mô di lah hăn pâl dơm, ma hôm dơi tiăr nti âk nău gĭt blău mât chăm êng săk nơm, tâm dâl nău ngơi Yuăn n'hanh ƀư bên đah bảng chữ cái lor rnôk lăp nti tiểu học. Nău dja kơl kon se nuĭh Jrai nsing nơm lơn. Rnôk hŏ gĭt wât, me bơ̆ mô dơn an kon se hăn nti, ma hôm tâm rgŏ jă rvăt gạch, kơl luh kan ƀư mpông mpêr, tuh bê tông n'hanh ƀư ntưm n'hâm an jâng gung nhih nti kloh uĕh an kon se. yuh Rơ Châm H'Yúi an gĭt:

“Ntơm nơh nhih nti mô hŏ uĕh kơt aƀaơ ôh, aƀaơ ăp nai ntĭm nkrơ̆ yông uĕh, geh ăp tŏng ndơ dŏng nti, kon se dŭt ŭch ngăn. Ntơm nơh mô hŏ geh jâng gung pâl kơt aơ ôh, jâng gung neh môi dơm, kon se luh pâl djơh uk ngăn. Yơn ntơm bah rnôk geh nai Nhiêm tât đah ƀon Tong ri jrô nti, jâng gung nhih nti kloh uĕh, kon se pâl rlưn mô hôm djơh uk đŏng ôh. Mpôl hên dŭt rhơn n'hanh lah uĕh nai Nhiêm yor hŏ ntĭm nti an kon gâp tâm ban kơt lĕ rngôch ăp kon se nti ta aơ đŏng".

Wa Đỗ Thị Nga- Hiệu trưởng Nhih nti Mẫu giáo 30/4, xã Ia Dêr, nkuâl Ia Grai an gĭt, ntơm bah năm 2018 let năp, ta nhih nti ƀon Ia Tông dơn geh ta nâm 10 kon se ntơm bah 3 tât 5 năm deh hăn nti dơm. Yơn ntơm bah năm nti 2019-2020 tât aƀaơ, jrô nti hŏ geh tŏng 38 kon se di năm nti mẫu giáo hăn nti. N'hâm suan dja lơn âk mpeh nai nti Ksor H’Nhiêm. Bah meng pah kan rgŏ jă, nkoch trêng, nai H’Nhiêm hôm di rnoh nai ntĭm blău gưl nkuâl, gưl n'gor tâm âk năm nti mbro đŏng. Nău dŭt khlay, nai H’Nhiêm way uănh khlay tâm dâl nău ngơi Yăn, yơn tâm ăp nău pâl rlưn nai ntĭm ndop nkre, nkoch n'hơ an kon se săk uĕh văn hoá way ơm bah nuĭh Jrai, ntĭt kơt chĭng gong, ndơ uh goh, bok ao nsoh way ơm.

“Lơn lah, nai H’Nhiêm dŭt dêh rŏng kon se nti, dŭt mbleh, way gơm rah rơch đah ăp kon se nti. Tâm ăp năm nti rlău aơ, nai ntĭm lah nuĭh n'gâng tơm bah nhih nti, di rnoh nai ntĭm gưl n'gor, gưl nkuâl, lah nuĭh leo lor mpeh nuih n'hâm uĕh n'hanh nsrôih tâm nău way kan. Ntơm bah năm nai H’Nhiêm sĭt pah kan, săk blău nău ngơi Yăn, săk blău hao nti jrô 1 dơi nhih nti tiểu học dŭt kơp dơn".  

Nai Ksor H’Nhiêm nkoch, săk nơm geh du nău ŭch rŏng têh lah ăp me bơ̆ kon se nti nuĭh Jrai nar lơn ma uănh khlay lơn tât nău nti ren bah oh kon, kơl oh kon he mbrơi geh nău rêh uĕh lơn bah gung trong kơt nti:

“Gâp saơ ta aơ krit jêr ngăn, geh dŭt đêt kon se hăn nti. Saơ kơt nê gâp rngot ngăn, gâp ŭch rŏng oh kon nuĭh rnoi mpôl đê̆ hăn nti, gĭt rplay si ƀŭt, gĭt nău ngơi Yăn. Geh ăp me bơ̆ mô an oh kon hăn nti yor rnăk wâl jêr jŏt, jêng gâp ân hăn rgŏ jă, kơl gay ăp kon se dơi hăn nti, gay ăp kon se nti blău, gĭt wât âk lơn."

Ăp nău nsrôih mô gŭ rlu ntĭm nti kon se bah Ksor H’Nhiêm mô dơn geh me bơ̆ n'hanh kon se nti ta nhih nti mẫu giáo ƀon Ia Tông, xã Ia Dêr, nkuâl Ia Grai nchih nkah, ma mhe aơ nơh, n'gâng kan ntĭm nti n'gor Gia Lai dăn đă Bộ Giáo dục n'hanh Đào tạo nkhôm rnê pă an săk ntơ Nai ntĭm nti ntĭt leo ntoh lư năm nti 2020-2021../.

Nuĭh rblang: Điểu Thân