VOV4.M’nông: Lơ 29/3, nkuăl Chư Sê, n’gor Gia Lai ƀư nau leo tâp 2 nting tahen khĭt kăl e (ê gĭt năl moh), geh joi saơ trâm mir bah du rnăk vâl tâm thôn Phú Cường, xã Ia Pal. Jêh rnôk nau leo tâp geh ƀư tâm UBND xãIa Pal, nau leo tâp 2 nting tahen khĭt ơm kăl e geh ƀư tâm môch tâp bah nkuăl Chư Sê. Tâm nau khuh n’gôr, rđau kan gưl uỷ, n’gâng kan tâm nkuăl, rmôt tahen ndrle ƀon lan tâm nkuăl hŏ leo nkah, mpoh khtup ntoh nau nkah khlay ngăn đah nau roh hoach nting mham bah ăp tahen đah nau kan ndâk njêng ndrel mât neh dak.

Bah năp nê, lơ 26/3, UBND xã Ia Pal ndơn geh nau mơh bah ƀon lan saơ 2 nting tahen tâm rnôk rnăk vâl uih neh tâm neh rnăk vâl tâm thôn Phú Cường, xã Ia Pal gay ma ndâk ngih. Jêh rnôk ndơn nau mbơh, n’gâng kan nkuăl Chư Sê hŏ tât tâm ntŭk, ƀư nau rgum leo sŏk 2 nting. Uănh ăp ntil ndơ geh rgum saơ bah ƀon lan, ndrel nau kan geh joi, ƀư nau kan bah ăp ntŭk kan ƀư nau uănh năl, ri aơ lah nting bah tahen khĭt tâm rnôk tâm lơh mprơh Mỹ kơl neh dak, nkre ƀư nau sŏk uănh năl nting tahen gay ma năl AND tĭng nau ntrŭnh ƀư./.

Nŭih rblang: H’Thi