Rnâng kan n’gor uỷ Gia Lai lĕ geh dơn ngoăy nău mbơh tơih âk nău kơl kan ueh êng tĭng Nghị quyết mbrô 72 bâh n’gâng kan Chính trị gay ma n’hao nău mât uănh, mât chăm n’hanh n’hao nă kan săk soan ƀon lan. Tâm nĕ dŭt nkah ngăn lah nău nchrăp ntuh kơl bơi tât 300 rmen prăk an ntuk kân dak si ta nkual n’har bri, nkual jêr jŏt bâh n’gor Gia Lai. N’gor Gia Lai nchrăp an lor ntuh kơl rdâk njêng, n’hao mhe n’hanh rvăt năp ndơ dŏng 24 ngih dak si ta xã ta nkual n’har bri, nkual jêr jŏt. Ăp ntil ndơ dŏng geh pơk hvi rmôt ntŭk kan têh, rdâk njêng mhe ta nkual uănh năl ueh rup, uănh năl mham, siêu âm, pă bôk năp, ntŭk trih dak ntŭk kan dak si n’hanh ăp nău kan êng. Lĕ rnoh prăk nchrăp ƀư an bôk nău kan aơ klâp ma 288 rmen prăk, tâm nĕ geh 216 rmen prăk an nkra mhe, pơk hvi ntŭk kan ntung trong n’hanh klâp ma 72 rmen prăk rvăt năp ăp ntil ndơ máy siêu âm, ndơ dŏng xét nghiệm tơm khlăy, ndơ mât săm ndal n’hanh njrăng nău ntưp kaman. Ndrel đah ntuh kơl ndơ dŏng, n’gor Gia Lai lĕ geh mbơh dăn đă mbơh tơih kơl an uănh năl săk soan ăp rơh kan mô sŏk prăk an ƀon lan ta 12 xã n’har bri, gôl dak n’hanh dŭt jêr jŏt.