VOV4.M'nông: Hôm nklăp 1 khay tay đŏng lah tât rơh thi THPT gưl neh dak 2022. N'gâng kan ntĭm nti n'gor Gia Lai dôl nsrôih n'hao dăng hăn ôp uănh, groi nđôi, đăp mpăn rơh thi THPT gưl neh dak 2022 ƀư đăp mpăn, răp jăp. Râng rơh thi THPT gưl neh dak năm aơ, lam n'gor Gia Lai  geh rlău 14.100 nuĭh đăng ký râng thi; tâm nê geh bơi 13.000 nuĭh nti phổ thông, 384 nuĭh nti giáo dục thường xuyên, hôm ƀa ƀă lah nuĭh râng thi êng bah dih.

Tâm lĕ rngôch rnoh nuĭh đăng ký râng thi geh rlău 13.000  nuĭh đăng ký uănh năl sơch lăp nti đại học, cao đẳng. Nsing ta rnoh âk nuĭh râng thi, n'gor Gia Lai hŏ nchrăp 40 ntŭk thi ngăn (hao 1 jrô thi rđĭl đah năm 2021) đah 623 jrô thi, rgum 2400 cán bộ, nai ntĭm, nuĭh kan râng na nê̆ tâm ăp ƀan bah hội đồng thi. Aƀaơ, sở  hŏ  rđău đă ăp nhih nti ƀư lôch jêh bôk nău kan ntĭm nti phổ thông tĭng di trong nchrăp. Ndrel đah nê, ăp nhih nti tâm pă ntil kon se nti gay geh ăp trong ôn tập dŭt geh nău tam, kơl ăp kon se nsing nơm lăp tâm rơh thi./.

Nuĭh rblang: Điểu Thân