Aƀaơ,  ta n’gor Gia Lai geh 1049 ntŭk ntĭm nti. Ƀư tĭng Nghị quyết 29, n’gor lĕ n’huch 83 ntŭk kan ntĭm nti đah 10 năm ba năp, 80% rnoh cán bộ mât uănh, nai nti geh ntĭm nti tay n’hanh rlău đah nău mpŏng ntrŭnh mbơh.

 Ndrel đah nĕ, trong kan ntĭm n’hanh nti, trong kan thi, uănh nđôi n’hanh ănl nău geh ntĭm nti geh rgâl mhe, nău pah kan mĭn uănh khoa học, ntrŭt đă kon hoc, sinh viên đah nău mĭn ntơm njêng nău kan geh uănh khlăy lơn. 99,6% rnoh kon hoc rnoi đê̆ ƀư lôch bôk nău kan nti tiểu học, ndơ̆ nău ngơi Jarai n’hanh Bahnar lăp ntĭm nti. Yơn lah, đah nău ơm geh ta ntŭk n’gor gôl yôk, 46% rnoh nuĭh lah ƀon lan rnoi đê̆ , rnoh ƀon lan gŭ nchrah nchrai ta ăp nkual njônh ngai...ƀư an nău ƀư tĭng Nghị quyết 29 mâp âk nău jêr, nău mô dơi. Bôk nău kan ntĭm nti phổ thông geh ntơm ƀư dŏng bâh năm 2020-2021 ê hŏ geh mât đăp mpăn nău ngăch ngluh mbơh nău kan, n’gor dôl mô tŏng tât rlău 4.500 nai nti, nuĭh kan. Nău nglăp ngih nti jrô nti dŭt jêr, nău kan ntĭm nti pah kan ê hŏ geh tâm di đah nău lăp kan ndrel.