VOV4.M’nông: Pơh bah năp, ta nkual Tây Nguyên, rnoh nuĭh ntưp Covid-19 na nao hao ngăch. Ăp ntŭk tâm nkual lĕ tâm di ngăch tâm trong kan săm ji n’hanh ƀư ntĭm nti. Nău aơ nkre kơl nuĭh ji n’gơch geh nău mĭn uĕh lơn, n’hŭch âk an ăp ngih dak si, nkre đăp mpăn tâm trong kan ntĭm n’hanh nti.

          Jêh test ngăch ta ngih dak si phường Yên Thế, yuh Bùi Thị Như Hoa ta mrô 79 trong Lê Văn Sỹ, nkual ƀon têh Pleuku, Gia Lai geh ntưp đah Covid-19. Yuh Hoa lĕ dơi chuh 3 nglai vaccine njrăng Covid-19, mô geh saơ siăk, duh jêng lĕ đă nkhah êng, săm ta jay. Ăp nar, yuh mât uănh êng săk soan, n’hao ngăch dăng n’hanh uănh duh săk, mbơh an cán bộ dak si phường. Jêh kuăl điện thoại, yuh Hoa an gĭt, nơm saơ săm ta jay kơt aơ dŭt uĕh:

         “Ăp nar, gâp lăp ngơi zalo đah cán bộ nai dak si. Gâp mô geh saơ nău, jêng gâp n’hao dăng soan đah ngêt sa tŏng ăp ndơ kah, ngêt âk cam, âk dak, ntop dak điện giải, n’hao dăng soan chŏl nău ji. Gâp săm êng ta jay, lah hăn ngih dak si dơh ntưp rlơ̆ tay, mô lah hao mbăn. Jêng gâp saơ nău săm ta jay ri dŭt uĕh n’hanh tâm di”.

F0 ta jă xă Diên Phú, Pleiku

Nai dak si Lê Thiện Thanh-Groi Kruanh Ngih dak si nkual ƀon têh Pleiku, an gĭt, bah n’gul khay 2 tât aƀaơ, n’gor lĕ geh rlău 600 F0 n’gơch săm ta jay. Aƀaơ hin, knŭng geh bah dâng 1/5 rnoh nuĭh ji tâm nar, dŭt âk lah nuĭh ranh, nuĭh geh ji ơm lăp ngih dak si. Wa Thanh an gĭt, tâm nău đêt đah nuĭh kan, ăp ngih dak si xă, phường dôl đă cán bộ tâm rgop đah ăp rmôt Covid-19 ntŭk gŭ rêh uănh nđôi săk soan nuĭh ji; đăp mpăn ngăch săm, njŭn nuĭh ji tât ngih dak si lah geh nău rgâl mbăn.

          “Rmôt nai dak si ta 1 phường ri knŭng bah 5 tât 6 nuĭh kan dak si, ƀư dŭt âk kan, ăp nar an kuăl ăp F0, mkra ăp nuĭh ji geh nău duh, siăk, jêr nsôr, jêng mpôl hên hôm e ndâk ƀư geh 3 rmôt săm ngăch hăn ăp ntŭk, gay nchrăp moh ntŭk geh âk ir ri ntop tâm du đêt nar. Rnôk geh ăp ngih dak si đăp mpăn ri rhoăt lơi, hăn ngih dak si êng”.

          Ta nkual ƀon têh Buôn Ma Thuột, n’gor Dak Lak, ta năp nu nău F0 tâm ngih sam ƀŭt hao ngăch, âk ngih sam ƀŭt ngăch tâm di nău rgâl mhe, rgâl trong ntĭm nti bah ta ngih sam ƀŭt an rgâl trực tuyến. Đah kơt dŏng ntrong ƀư “2 tâm 1”, nkre ta ngih sam ƀŭt nkre trực tuyến lah nsrôih đăp mpăn nău mĭn nai, kon hŏk bah năp nău F0 tâm ngih sam ƀŭt hao ngăch.

Mhe hăn nti ta ngih sam ƀŭt geh du pơh, rnoh nuĭh ntưp Covid-19 hao ngăch tâm ngih sam ƀŭt, UBND nkual ƀon têh Buôn Ma Thuôt geh sam ƀŭt đă ăp ntŭk ntĭm nti mầm non, tiểu học n’hanh kon hŏk jrô 6 rgâl an nti trực tuyến. Rnăk wâl yuh Trần Thị Đông ta phường Tân Thành, nkual ƀon têh Buôn Ma Thuột geh 2 hê kon plơ̆ tay nti trực tuyến. Yuh Đông ŭch kơl nău ntrŭnh ngăch aơ.

          “Aƀaơ srê kơt nĕ ri gâp kơl nău nti online yơn mpŏng ŭch êp tât srê dơi uănh nđôi ri ăp oh dơi tât ngih sam ƀŭt yor nău trêng ntĭm bah ngih sam ƀŭt mbra uĕh lơn, ri me bơ̆ mbra đăp mpăn lơn”.

Cán bộ dak si phường Yên Thế sŏk ndơ uănh năl srê an kon hŏk

Ta năp nu nău rnoh nuĭh F0 ntoh nar lơ âk tâm ngih sam ƀŭt, knŭng tâm 1 pơh, nkual ƀon têh Buôn Ma Thuột kơp dơn rlău 40 nuĭh ntưp lah nai n’hanh rlău 430 nuĭh lah kon hŏk. Jrô kan ntĭm nti nkual ƀon têh lĕ tâm ôp tâm nchră đah UBND nkual ƀon têh an rlu tât ngih sam ƀŭt đah kon hŏk lĕ rngôch ăp jrô, knŭng geh jrô 9 n’hanh 12. Yơn lah, tĭng kơp dơn, ta jrô 9 n’hanh 12 bah âk ngih sam ƀŭt, ăp nsưng nti nsoih kon hŏk ntoh nar lơ âk. Aƀaơ jrô 9 bah ngih sam ƀŭt THCS Lạc Long Quân hôm e nti ta ngih sam ƀŭt đah nklăp 50% dĭng lĕ kon hŏk, rnoh kon hŏk ƀa ƀă an nti online. Ngih sam ƀŭt lĕ geh 38F0 lah nai, n’hanh kon hŏk. Wa Phan Thanh Thủy, Hiệu trưởng Ngih sam ƀŭt THCS Lạc Long Quân, nkual ƀon têh Buôn Ma Thuột, Dak Lak an gĭt:

“Dŭt âk ăp F0 hao ngăch ta ngih sam ƀŭt lah ta ăp ntŭk gŭ, mpôl hên lĕ ôp đah ăp ntŭk gŭ geh mât kon hŏk rnôk geh ntoh F0 gay dăn đă geh trong mbơh đah ngih pah kan dơi kan gay njrăng an ăp mon đăp mpăn tât nti”.

Jrô 9 A, ngih sam ƀŭt Lạc Long Quân, nkual ƀon têh Buôn Ma Thuột nkre nti trực tuyến nkre nti ta ngih sam ƀŭt.

Tĭng wa Mai Thị Hồng Hà, Kruanh jrô kan ntĭm nti nkual ƀon têh Buôn Ma Thuột, Dak Lak, srê Covid-19 ta Dak Lak geh jêr jŏt tay đah hang rbăn nuĭh nưp du nar. Ta ăp ngih sam ƀŭt, bôl nău ntoh nuĭh ji lĕ geh nău nchrăp lor yơn rnoh F0 hao âk lĕ khuch têh tât nău mĭn bah nai, kon hŏk, me bơ̆. Nkre njrăng n’gang srê Covid-19, nkre ntĭm nti săk rnglăy, nkre đăp mpăn nău mĭn an kon hŏk, me bơ̆, n’hanh nai lah nău rƀŏng bôk năp bah ăp ngih sam ƀŭt aƀaơ hin.

“Rnoh F0 mô knŭng tâm kon hŏk n’hanh nai ntoh jêng khuch tât uĕh ntĭm n’hanh nti, ri mpôl hên ntĭm ăp ngih sam ƀŭt uănh nău mbơh nuĭh ntưp, lơn lah tâm nai gay ntop kơl ngăch, nău kan tĭng jăp nu nău sam ƀŭt ntĭm rđău ăp ngih sam ƀŭt ƀư tĭng uĕh đăp mpăn uĕh ntĭm n’hanh nti, lôch jêh nău kan năm nti 2021-2022”.

          Nuĭh rblang: Y Sưng Phê Ja