Ndrĭ lah hŏ lĕ n’gul năm 2023. Tâm pơh dja ăp n’gor ta nkual Tây Nguyên hŏ ƀư tâm nchră gay ŭanh năl nô nău tĭng ƀư nău dơn pah kan 6 khay bôk năm, n’gluh nău kan rgum tơm 6 khay kêng dŭt năm 2023. Phóng viên Radio nău ngơi Việt Nam nchih nkoch nău kan dja ta 2 n’gor Gia Lai n’hanh Kon Tum.

      Tĭng nău mbơh ta Tâm nchră Ban Chấp hành Đảng bộ n’gor Gia Lai, tâl 12 (pơk hvi), rnoh ngăch hun hao wăng sa bah Gia Lai 6 khay aơ tât 5,54% rđĭl đah ndrel khay dja năm 2022. Ăp rnoh tât geh mpeh sŏk prăk ngân sách, ƀư njêng công nghiệp, tât 48,7 n’hanh 44,6%; rnoh doanh nghiệp đăng ký plơ̆ kan tay n’hanh rnoh âk trong nchrăp ntuh kơl hao  âk; nău kan pâl nđaih săk ntơr tay.

   Yơn  lah, âk nkuâl ta n’gor Gia Lai nha hôm mâp âk jêr jŏt tâm sŏk prăk dŏng neh jêng tât mô tŏng prăk dŏng an ăp nău kan ntuh kơl; jêr an ƀư tăm bri yor nău kan aƀaơ mô hŏ geh nău ntrŭt nsôr, mbrơi an ƀư dŏng neh; rnoh ngăch an ƀư ăp bôk nău kan gưl neh dak mbrơi, ntit kơt bôk nău  kan hun hao wăng sa – rêh jêng kon nuĭh nkual rnoi mpôl đê̆ n’hanh mpeh yôk yang. Êng trong kan ntuh kơl, lĕ khay 6/2023, n’gor mhe n’gluh geh bơi 600 rmen prăk tâm lĕ rngôch tơm prăk 4.178 rmen prăk ntuh kơl bah năm, geh tât rnoh 13,85%. Lah trong kan ma Ủy ban nhân dân n’gor Gia Lai n’hanh ăp n’gâng kan bah n’gor rgum an nkra lor tâm let năp tay. UBND n’gor Gia  Lai hŏ njêng 3 rmôt pah kan gay n’hao dăng hăn ôp uănh, ntrŭt ntrôl, nkra ăp nkô̆ nău ntoh luh. Wa Đinh Hữu Hoà- Groi Giám đốc mât uănh Sở Kế hoạch n’hanh Đầu tư n’gor Gia Lai an gĭt:

         “Ăp n’gâng kan râng uănh năl di tay, uănh năl tay bản vẽ ƀư, nsrôih rhuăt glêh mông nar uănh năl di tay gay mbơh rblang trong nchrăp kan, đăp mpăn. Tâl prăm lah Sở Tài nguyên Môi trường ân hao mbơh rblang đă UBND n’gor droh rklaih tơm neh dŏng an trong nchrăp kan. Hôm đah ăp rmôt pah kan, ân ntrôl ngăch ra tay ăp tŏng, kan nsum đah ăp nkuâl hao mbơh rblang nhih pah kan geh nău dơi kan nkra gay mhâm ƀư ntrôl ngăch rnoh tât kan”.

Tâm pơh đŏng, HĐND n’gor Kon Tum ƀư Rơh hop tâl 5 gay tâm nchră, uănh năl nô nău wăng sa – rêh jêng kon nuĭh 6 khay bôk  năm, ntrŏng trong rƀŏng, nău dơn kan rgum tơm 6 khay kêng dŭt năm năm 2023 n’hanh n’glêh an ăp nkô̆ mpeh nău dơi kan. Tĭng nê, 6 khay bôk năm rnoh ngăch hun hao lĕ rngôch ndơ geh ƀư tâm n’gor geh tât 6,8% rđĭl đah ndrel khay dja năm bah năp nơh, dâk tâl 22/63 n’gor, nkual ƀon têh lam dak n’hanh dŭt âk nkual Tây Nguyên. Tâm nê nkual công nghiệp n’hanh rdâk njêng 10,88%; tuch tăm, si gle n’hanh tui ka hao 5,65%; rhŏ dŏng hao 5,31%.

        Bol Kon Tum geh rnoh hun hao dŭt ngăch nkual Tây Nguyên, yơn hôm đêt rđĭl đah rnoh ŭch tât hao 10% ma n’gor n’gluh tâm năm aơ. Bah meng nê 6 khay bôk năm sŏk geh ngân sách nchroh geh bơi 1.840 rmen prăk dơn tât bơi 41% trong nchrăp dơm; pah kan đă ntrơn du rong an ntŭk ƀư ăp trong nchrăp kan têh khlay hôm mâp âk jêr jŏt…

        Lah ntơm pơk rơh hop, wa Dương Văn Trang, Ủy viên Trung ương Đảng, Bí thư Tỉnh ủy, Kruanh HĐND n’gor Kon Tum an lah, ân geh trong ƀư lĕ n’hâm suan lơn gay nkra bah ăp mpăng đêt, rbăn lhơ, lơn lah nău way nău phiăn neh dak mô hŏ lhăt jăp; der, tâm nje, klach nău dơn kan bah du đêt cán bộ, công chức tâm ƀư nău kan ngih dak…gay rgop ƀư lôch jêh geh nău dơi ăp rnoh tât kan, rnoh tât hun hao wăng sa – rêh jêng kon nuĭh năm 2023:

“Ăp nuĭh đại biểu HĐND n’gor rgum rblang na nê̆, uănh năl di, sŏng dăng mpeh nău hŏ dơi geh, ăp mpăng đêt, jêr jŏt tâm nău tĭng ƀư ăp rnoh tât kan wăng sa – rêh jêng kon nuĭh n’hanh nău dơi tât hun hao bah lĕ ma năm 2023, lơn lah nău wăch rgum ntuh kơl, n’gluh tơm prăk ntuh kơl n’hanh an ƀư ăp rnoh tât kan gưl neh dak. Ƀư kloh nkô̆ uănh lhơ lĕ ma tâm nău n’gluh an dŏng siƀŭt jêng ngăn ngăn ăp trong nchrăp bah Trung ương n’hanh pah kan an ƀư, leo tĭng ƀư ta ăp gưl, ăp n’gâng kan”.

Ta rơh hop tâl 5, HĐND n’gor Kon Tum Khoá XII, năm kan 2021-2026 hŏ mĭn uănh, n’glêh an đah 32 nkô̆ UBND n’gor mbơh rblang ta rơh hop, tâm nê geh du đêt trong kơl khlay, kơt: rnoh âk ntop kơl gay tĭng ƀư bôk nău kan tâm pă ntŭk ƀon lan gŭ ăp nkual geh trôk nar lơh, dŭt jêr jŏt mha êng, n’har bri, ƀon lan dah rŏng ntrơn du, nkual bri mât dŏng mha êng ta n’gor; tâm pă tơm prăk ntop kơl hun hao hợp tác xã; rgâl di trong nchrăp tĭng ƀư ăp rnoh tât kan gưl neh dak năm 2022, 2023 n’hanh nchrăp trong tâm pă ntuh kơl năm 2024./.