VOV4.M’nông:   Gia Lai dôl tâm yan wai hô, duh nar jŏ jong lĕ ƀư âk rnoh neh bri geh ŭnh sa âk. Gay njrăng n’gang ŭnh sa bri, ăp ntŭk lĕ ndâk ƀư n’hanh mbơh âk trong njrăng rdâng.

Nsum mpôl ƀon Ngăng, xă Chư Don, nkuăl Chư Pưh dơi jao an, mât uănbh rlău 600 ha bri bah Ban mât uănh bri nchăng n’gang phŭt sial Nam Phú Nhơn. Aƀaơ, duh nar jŏ jong ƀư âk lôk bri ta aơ dơh ŭnh sa. Gay njrăng n’gang, ƀon Ngăng lĕ pă ăp rnăk hăn uănh nđôi bri ƀa ƀơ, ƀư trong koăih su nja si. Nô Gru, ngoăy tâm âk rnăk dơi jao an mât njrăng bri ta ƀon Ngăng, xă Chư Don, nkuăl Chư Pưh an gĭt:

“Lah rnăk dơi dơn jao an mât njrăng bri, aƀaơ ta ƀon gâp geh 22 rnăk dơi jao an rlău 600 ha bri. Hăn ƀư bri đah kônh wa ri ntrŭt đă ăp nuĭh an mât njrăng bri, mô phah bri sŏk si, mô su bri ƀư mir. Yan wai ri gâp đah kônh wa ƀa ƀơ muih koăih nja si gay njrăng n’gang ŭnh sa bri”.

Ban mât uănh bri Nchăng n’gang phŭt sial Nam Phú Nhơn dôl mât uănh rlău 15.000 ha bri. Bah bôk yan wai dâl, ntŭk kan lĕ pă cán bộ, nuĭh kan ƀa ƀơ hăn uănh nđôi, tĭng ntŭk, nchrăp ndâk ƀư trong 4 ta ntŭk, nkre ndâk njêng  ăp rmôt, mpôl njrăng n’gang ŭnh sa bri.

Ƀon lan Ngăng su ndŏk nja njrăng n’gang ŭnh sa bri

Wa Nguyễn Văn Tường, Kruanh Ban mât uănh bri njrăng n’gang phŭt sial Nam Phú Nhơn, nkuăl Chư Pưh an gĭt, rnoh neh bri bah ntŭk kan gĭt nu nău ta 2 ntŭk lah nkuăl Chư Sê n’hanh nkuăl Chư Pưh. Aƀaơ ntŭk kan lĕ mbơh ƀư trong an njrăng rdâng đah ŭnh sa bri. Tâm nĕ geh du gưl soan têh mpeh kônh wa tâm nău kơl ntŭk kan koăi rwach n’hanh su nja geh uănh nđôi njrăng n’gang ŭnh sa bri.

“Uănh nsum rnoh jao an kônh wa dơi mât njrăng uĕh, kônh wa geh tay prăk rĭng du khay rnăk râng dơn jao an du khay sŏk geh bơi du rkeh prăk. Oh nô nsrôih ntrŭt đă ndrel rlet rlău jêr jŏt gay nsrôih jêh nău kan. Geh trong tâm rgop đah kiểm lâm, n’gâng kan ƀon lan gưl xă, Ban mât uănh bri ăp gưl rnôk geh nu nău ndal, geh trong nchrăp lvang, gưl tâm khay gay geh trong nchrăp ndrel hăn uănh nđôi gay geh trong ntop kơl Ban mât uănh bri”.

Chư Pưh aƀaơ geh rlău 20 rbăn ha bri, tâm nĕ nkual âk ngăn geh ŭnh sa dơi năl pă uănh ta 6 xă geh: Ia Hla, Ia Hrú, Ia Phang, Ia Le, Ia Blứ, Chư Don. Wa Phạm Văn Đạo, hạt trương Hạt kiểm lâm nkuăl Chư Pưh an gĭt, bah bôk yan wai, ntŭk kan lĕ ƀư trong nchrăp ntrŭt ntĭm Ban ntĭm rđău njrăng n’gang puh nset ŭnh sa gưl nkuăl, xă, ndâk ƀư trong ntrŭt đă ta ntŭk, ndâk njêng ăp rmôt njrăng n’gang ŭnh sa bri. Ƀư kí 2400 n’ha sam ƀŭt tâm ton, phăt 800 rup nkoch đah ăp rnăk rêh êp bri... Bah nĕ nkoch trêng ntrŭt đă nuĭh ƀon lan n’hao nău wât njrăng n’gang ŭnh sa bri. Wa Phạm Văn Đạo, Hạt trưởng Hạt kiểm lâm nkuăl Chư Pưh, an gĭt:

“Hạt lĕ hăn uănh nđôi ăp ntŭk n’hanh lĕ ƀư nău mbơh njuăl an UBND nkuăl, N’gâng kan tuch tăm mât rong n’hanh hun hao ƀon lan lĕ hăn uănh nđôi n’hanh uănh lah trong njrăng n’gang ŭnh sa bri bah nkuăl Chư Pưh dŭt uĕh, nchrăp uĕh. Uănh nsum tâm năm mhe rlău nkuăl Chư Pưh mô an geh ŭnh sa bri yơn nău aơ mô dơi thơ tha yor nu nău trôk nar geh âk nău rgâl ndal. Nău aơ hạt mbra pă nuĭh kan kâp uănh njrăng n’gang ŭnh sa bri tâm yan wai, mpŏng năm aơ mbra mât uĕh săk rnglăy kơt năm e”.

                              Nuĭh rblang: Y Sưng Phê Ja