VOV4.M'nông: Tâm rnôk dja Gia Lai hôm dôl tâm nklang khay wai, âk ntŭk dôl geh nău nchroh ŭnh sa bri klach rvê. Gay nking nchăng n'hanh bah ir tât rnoh ŭnh sa bri, mpôl kan dơi kan bah n'gor Gia Lai hŏ kan nsum lhăt đah ăp nuĭh tơm bri lor nchrăp njrăng, n'gang ŭnh sa bri tĭng trong rƀŏng "4 ta ntŭk".

         Rmôt rnăk wa Phạm Đăng Ngọc, gŭ ta thị trấn Kon Dơng, nkuâl Mang Yang dôl dơn mât njrăng 250 ha bri mpeh nkual bri tăm tu dak nching sial Mang Yang, ngoăy tâm ăp ntŭk geh ma nău ŭnh sa bri hô. Tâm rnôk dja, rlău ma pah kan mât njrăng, rmôt rnăk bah wa Ngọc hôm way kan nsum ndrel đah mpôl kan dơi kan lăp tâm bri hăn tĭng groi nđôi n'hanh su lor pih rêp gay nking nchăng ŭnh sa bri ơm bah ngai. Rlău ma nê , rmôt rnăk bah wa Ngọc hôm lor nchrăp nkoch trêng, rgŏ jă nuĭh ƀon lan mô muĭh kăl bri, su bri ƀư mir ba dăch kêng meng bri.

          "Tĭng ƀư nău kan dơn mât njrăng bri ri mpôl hên hŏ njêng rmôt way tâm pleh lăp tâm bri hăn rsong uănh, kâp njrăng ŭnh tâm khay wai. Bah meng nê way hăn ndrel cán bộ Ƀan mât njrăng hăn treng nđôi ta ăp trong n'har ma lha paih rŭng ri kuaih kloh tay lôch nê su mô an geh ŭnh trĕ lam tâm khay kro phang".

        Wa Nguyễn Văn Hùng, Kruanh Ƀan mât njrăng bri tu dak nching sial Mang Yang an gĭt, đơn vị way kan nsum lhăt đah ăp n'gâng kan bah n'gor n'hao âk tơ̆ hăn rsong uănh, nkra rmal ăp nău tih luật Lâm nghiệp. Tâm pă mpôl kan gŭ kâp ndăng măng nar gay tăng geh nău lư ŭnh sa bri bah tâm dâng, ntơm bah nê ngăch hăn puh n'hât nkhêp nău geh.

        “Ƀan mât uănh bri tu dak Mang Yang hŏ rgum lĕ rngôch mpôl kan hăn rsong uănh rnôk khay wai kro phang dja. Ndrel đah ăp rnăk dơn mât, kônh wa ƀon lan ký ton mô ndjôt ŭnh long lăp tâm bri ơm, mô an geh ŭnh ƀoh lăp tâm bri. Ndrel đah nê mpôl hên tĭng ƀư ăp nău kan mât bri, su lor pih rêp an kloh aih ndơ dơh ŭnh sa tâm khay kro phang".

        Nkuâl Mang Yang aƀaơ geh rlău 47.000 ha bri, tâm nê, rlău 40.000 ha bri krŏng n'hanh rlău 7.400 ha bri tăm. Lôch uănh năl, lam nkuâl geh rlău 6.000 ha bri lơn âk lah bri krŏng mpeh 6 nkual geh ma nău ŭnh sa hô lah: Ayun, H’Ra, Đăk DJrăng, Đê Ar, Đăk Trôi, Kon Chiêng.

        Wa Trần Tất Đắc, Groi hạt trưởng Hạt kiểm lâm nkuâl Mang Yang an gĭt, gay lor nchrăp njrăng n'gang ŭnh sa bri, ntơm bah bôk khay wai, n'gor hŏ dăp rgum ăp tŏng Ƀan rđău đă njrăng, n'gang ŭnh sa bri gưl xã, tĭng nê hŏ njêng ăp rmôt njrăng, n'gang ŭnh sa bri đah trong rƀŏng 4 ta ntŭk.

        “ Hạt kiểm lâm lah nhih pah kan rnâng kan hŏ kan nsum đah nhih pah kan công an nkuâl, hạt kiểm lâm n'hanh ăp nhih pah kan dơi kan bah nkuâl, jrô kan tuch tăm gay hăn rsong uănh ăp nuĭh tơm bri n'hanh ăp xã. Hạt kiểm lâm hŏ hăn uănh năl n'hanh n'hao dăng pah kan nkoch trêng ta rlău 12 xã, thị trấn, ndrel đah 4 công ty Ƀan mât uănh bri tu dak nching sial, Bri mât neh dak Kon Ka Kinh hŏ an ƀư pah kan nkoch trêng, rgŏ jă pah kan mât njrăng bri, pah kan njrăng n'gang ŭnh sa bri".

        Gia Lai aƀaơ geh rlău 226.000 ha bri dôl geh ma nău ŭnh sa, yơn lah, tâm rnoh dja mhe geh du n'gul rnoh neh dơi ntuh kơl ăp ndơ dŏng njrăng n'gang ŭnh sa bri, puh n'hât ŭnh sa bri. Yor kơt nê̆, pah kan njrăng n'gang ŭnh sa bri ta n'gor ntơm bah aơ tât kêng dŭt khay wai way dơi ăp mpôl kan dơi kan nsrôih tĭng ƀư gay rdâng lơh ta năp nău tât mbra geh. Wa Trương Văn Nam, Kruanh Jrô kan mât njrăng bri n'hanh Mât ndray mpô mpa bri, Chi cục Kiểm lâm n'gor Gia Lai, lah:

       “Chi cục kiểm lâm hŏ rđău đă lĕ n'hâm suan ăp hạt kiểm lâm n'hanh ăp nuĭh tơm bri tĭng ƀư jăp pah kan njrăng n'gang ŭnh sa bri 24/24. Hŏ ƀư dơi nklăp 250km trong n'har nking ŭnh trĕ tâm ban đah 700ha muĭh su lor gay hŭch bah ŭnh sa. Rlău ma nê Chi cục kiểm lâm way mbơh ntŭk ŭnh sa tât tĭng mbrô điện thoại bah tĭng nuĭh hạt kiểm lâm, kiểm lâm ta ntŭk, mpôl way mât uănh nău kan gay mhâm ƀư mhe ntoh ŭnh sa ri ban saơ n'hanh puh n'hât dĭl”.

Nuĭh rblang: Điểu Thân