VOV4.N’nông: Rơh rlau aơ, ndăn rnôk mô gĭt rbăng ndrel nau rêh jêr jŏt bah kônh wa rnoi mpôl đê̆ tâm xã Chư Dang Ya, nkuăl Chư Păh, n’gor Gia Lai, du đê̆ nŭih hŏ rlăm gay ma in sŏk nau dơi dŏng neh. Ngăn lah, âk nau tih knŭng geh s aơ rnôk ăp nŭih ƀư săm ƀŭt ntrơn dŏng neh âk nŭih tal pe mô lah ƀư săm ƀŭt manh prăk ngân hàng, ri ma lơi âk nau khuch.

Muh măt dŭt rngot, yuh Kưm (1978, tâm ƀon Xoá, xã Chư Dang Ya, nkuăl Chư Păh, n’gor Gia Lai) mbơh, păng dôl ma rvê yor lah mir 5 sào cà phê geh bu in. Yuh Kưm nkoch, năm 2018, yor ŭch ma prăk ƀư kan, ur sai yuh ân ma nŭih ndrel ƀon lah wa Vũ Thị Hằng manh neh tâm 10 năm, đah rnoh 100 rkeh. Tâm rnôk aơ, wa Hằng ân ma ur sao păng ký du đê̆ n’ha săm ƀŭt ân manh neh. Ntôn lah jêh 10 năm mra dơi geh plơ̆ ƀư tay, yơn tât khay 1/2022, rnôk cán bộ Văn phòng Đăng ký neh ntu nkuăl Chư Păh tât uănh, ri mơ gĭt lah neh păng hŏ ân ma wa Hằng ntơm bah khay 8/2009, rnôk aơ nŭih aơ dôl ma ƀư săm ƀŭt tăch ân nŭih tal pe:

‘Kŏ mĭn âk, ji bôk ngăn, mĭn tât mô hăk bĭch. Gâm ân bu manh, ma lŏ jêng ƀư ân dơm ma păng nê mô gĭt mhâm nau ma ƀư ôh. Bu kuăl oh hên, me mbơ̆ gâp tât lăn nglau ty, ƀư tay bìa ma gâp mô gĭt ôh. Păng lah dôl ma kâp mplơ̆ bìa ân ma gâp. Lah ma Hằng nê ma mplơ̆ ân ma gâp ri gâp mra hăn phong păng tât ngih xã”.

Tâm ƀon Xoá, rnăk nô Chang (deh năm 1981) kŏ rvê ngăn yor neh rlau 300m vuông dôl rêh. Nkô̆ lah năm 2020, rnăk păng hŏ jao săm ƀŭt kơp dơn dŏng neh, đă wa Hằng kơl manh prăk ngân hàng. Ntơm bah nê tât rnôk aơ, wa Chang ê geh ndơn prăk manh, ma săm ƀŭt ân dŏng neh kŏ roh nkre. Tât khay 2/2022, rnôk geh bu hăn tât ngih sŏk 140 rkeh prăk, ri ur sai yuh mơ gĭt lah săm ƀŭt dŏng neh bah khân păng geh wa Hằng nê leo hăn manh prăk:

“Bu hăn sŏk prăk ta hên, bu đă hên trok 140 rkeh prăk mơ dĭng dơi sŏk săm ƀŭt kơp dơn dŏng neh. Gâp lah gâp mô geh hăn manh ôh rnoh prăk aơ. Jêh ri gâp hăn ngih Hằng ri Hằng lah păng nơm ndơn nau tih nê yor Hằng nơm sŏk, gay ma joi prăk trok ân ma bu, jêh ri sŏk nsĭt săm ƀŭt dŏng neh. Gâp rvê ngăn, mô dơi sa, mô hăk bĭch. Gâp mbơh ma kruanh thôn, ê geh mbơh tât ngih xã ôh”.

Wa Hoàng Anh Tuệ-Giám đốc ntŭk ƀư nau kan Đăng ký neh nti nkuăl Chư Păh, n’gor Gia Lai mbơh, tâm năm 2021, wa Vũ Thị Hằng hŏ âk tơ̆ ƀư nau jao nau dơi dŏng neh ndrel ăp neh aơ kŏ mô geh kloh tu tơm. Bôk năm 2022, wa Hằng lŏ ƀư săm ƀŭt ndơn manh prăk ngân hàng ndrel ntrơn ăp neh aơ ân ma nŭih tal pe. Ndơn saơ geh nau mô tâm ban, ri rmôt kan hăn kơp uănh 4 nŭih tâm xã Chư Dang Ya ri lĕ ma 4 rnăk aơ kŏ mô geh tăch neh ân păng. Tĭng wa Hoàng Anh Tuệ, ndơn saơ nau aơ dôl ma khuch tât nau geh jêng bah ƀon lan, ri ma mrnôt kan geh nau mbơh đă UBND xã ân geh ntô̆ n’hao nuih n’hâm kan tâm nau kơl an nŭih ƀon lan rnoi mpôl đê̆ ƀư ăp nau kan mpeh neh ntu:

‘Đah ăp xã tâm nkuăl rnoi mpôl đê̆ ri ăp cán bộ công chức tư pháp xã ân geh n’hao nau dơi, nau kan. Rnôk ƀư ăp nau dơi ân nŭih ƀon lan ri đă ân geh răk ân 2 ding djăt, ân geh nau ntrơn ƀư tăch đŏng lah mô, lah mô ri ân geh nkah aơ lah neh ntu bu êng đŏng lah mô. Nŭih tâm tâm ƀon lan djăt nau ngơi yuăn mô gĭt ân ri ân geh cán bôk tâm xã blau nau ngơi yuăn gay ma rblang jêng nau ngơi rnoi mpôl đê̆ ân ma bu gĭt”.

Wa Nguyễn Văn Nội-Kruanh UBND xã Chư Dang Ya, nkuăl Chư Păh mbơh, rnôk aơ, n’gâng kan tâm nkuăl ndrel ăp rmôt kan dôl ma nsôih kơp, uănh, năl nau kan ntrơn rgâl nau dơi dŏng neh tâm nkuăl tâm rơh êp aơ, nkre tâm rgop nsum gay ma nkoch trêng ân ƀon lan gĭt kloh lơn tâm nau ƀư ăp nau kan tăch rgâl mpeh neh ntu:

‘Rnôk geh saơ nau kan aơ, phung hên hŏ rđau ân công an ndrel ăp ntŭk kan rmôt kan tât ăp rnăk nê, tât ăp ƀon lan, gay ma bonh đă ăp rnăk vâl der lơi ăp nau kan geh bu rlăm kơt nê”.

Jêh rnôk n’gâng kan gĭt nu nau, rnôk aơ UBND nkuăl Chư Păh, n’gor Gia Lai hŏ đă ăp rmôt kan ân geh nsrŭng ƀư ăp nau kan gay ma công an lăp ƀư nau kan mêt uănh, ƀư kloh ăp nau ntrơn rgâl, tăch dŏng neh mô tâm di, geh khuch tât ƀon lan rnoi rmpôl đê̆ tâm xã Chư Dang Ya./.

Nŭih rblang: H’Thi