VOV4.M’nông- Năm nti mhe 2022-2023, n’gâng kan ntĭm nti n’gor Gia Lai dôl mô tŏng rlău 3700 kon hoc. Ta năp nău jêr aơ, âk trong kan ngăch ndal geh ăp ntŭk kan ntĭm nti mbơh tơih gay ma mât đăp mpăn nău nti n’hanh ntĭm.

        Tâm năm nti mhe aơ, ngih nti Mầm non Hoa Hồng, nkuăl ƀon têh Pleiku dăn vơt 850 kon hoc an rlău 22 rmôt jrô nti. Nai nti Trần Thị Thủy, Hiệu trưởng ngih nti mầm non Hoa Hồng an gĭt, ngih nti dôl mô tŏng 15 biên chế an năm nti mhe jêng dŭt mĭn rvê ngăn.

        “Aƀaơ ngih nti mhe kanŭng pă dăp tŏng an 22 nai nti mât đăp mpăn tŏng 1 nai nti du jrô nti, hôm e lah an kon hoc rlău 5 năm deh, hôm e lah rnoh kon hoc ngih nti bâh 3 tât 4 năm deh rĭ aƀaơ rnoh nai nti dôl mô tŏng âk. Mpôl hên lĕ dăn đah ntŭk kan ntĭm n’hanh nti n’hanh UBND nkuăl bon têh lah lôch khai giảng an geh mât tŏng nai nti gay ma ƀư ăp nău mât chăm nti n’hanh nti an oh kon se.

       Wa Phạm Văn Đại- kruanh ntŭk kan ntĭm n’hanh nti nkuăl Ia Grai an gĭt: Lam nkuăl aƀaơ geh 46 ngih nti đah rlău 1.200 cán bộ, nai nti n’hanh nuĭh kan. Tâm rnôk aƀaơ, nkuăl Ia Grai dôl mô tŏng bơi tât 300 nai nti, nuĭh kan. Ƀư tĭng nău ntrŭnh bâh bôk nău kan ntĭm nti phổ thông lĕ rngôch năm 2018, năm nti 2022-2023 mbra lah năm bôk năp môn nti Tiếng Anh n’hanh Tin học jêng môn nti an geh nti bâh jrô 3 ta gâl tiểu học, ndơn an săch kơt ntơm nơh. Nău ngăn aơ ƀư an nkuăl ơm mô tŏng âk nai nti geh mâp âk nău jêr jŏt tay rnôk ê hŏ tŏng rnoh nai nti ntĭm nti 2 môn aơ.

        “Aƀaơ nău jêr bâh n’gâng kan ntĭm nti nkuăl Ia Grai lah ƀư tĭng bôk nău kan sƀ giáo khoa mhe đah môn anh văn jrô 2 n’hanh tin học jrô 3 aƀaơ lah mô tŏng nai nti. Đah lĕ rnoh nai nti anh văn hôm mô tŏng dŭt đê̆ tâm du ngih nti lah 5 ngih nti ê hŏ geh nai nti anh văn n’hanh 8 ngih nti ê hŏ geh nai nti Tin học jêng lah dŭt jêr ngăn”.

        Tâm năm nti aơ đŏng, nkuăl ƀon têh Pleiku mô tŏng rlău 600 biên chế nai nti ta ăp gâl nti. Wa Nguyễn Đình Thức- kruanh ntŭk kan ntĭm nti nkuăl ƀon têh Pleiku an gĭt, gay ma mât đăp mpăn nău nti n’hanh ntĭm, n’gâng kan ntĭm nti rgum uănh khlăy tât nău pă dăp, mât đăp mpăn tay mpôl nai nti ta ăp ngih nti. Nkre la, bâh nău kan biên chế pă an, leo kan tâm ton đah nai nti, nuĭh kan hôm e mô tŏng.

        “ Ntŭk kan lĕ pah kan đah ăp ngih nti gay ma uănh năl tay ăp ngih nti jrô nti n’hanh pă nai nti ta ăp ngih nti. Ta năp nău mô tŏng nai nti rnoh âk kơt nĕ rĭ lĕ geh tâm mbơh rgâl nău đah ăp ngih nti pă dăp tay ngih nti jrô nti, rgum du jrô nti gay ma nti nsum lah dơi geh ƀư. Ntŭk kan ntĭm nti lĕ dăn đă ăp gâl kan geh nău dơi uănh n’hêl bâh nău mĭn ăp nău ntrŭnh bâh n’gâng kan, bâh ngih dak gay ma pă tŏng rnoh nai nti tâm ban kơt lah nuĭh kan an ăp ngih nti gay ma mbơh tơih nău ntĭm nti”.

       Wa Lê Duy Định -Giám đốc ntŭk kan ntĭm nti n’gor Gia Lai an gĭt: ntŭk kan ntĭm n’hanh nti dôl tâm rgop đah ntŭk kan Sở nội vụ pah kan đah ăp ntŭk gay ma uănh kơp, mbơh nău tât UBND n’gor ntrŭnh nău pă ndrel đah dăp uănh, leo ƀư tay ngih nti,  rgum nti nsum ta ăp ntŭk ngih nti, n’hao rnoh kon hoc tâm du jrô nti tĭng âk nău ntrŭnh mbơh ăp gâl nti. Lôch geh ƀư lôch ăp nkô̆ nău kơp uănh tay nău mô tŏng, tŏng nai nti ta ăp ntŭk gay ma ƀư pă an 1.244 nău mpŏng kan ma ngih nti Trung ương pă an.

        “ Đah ăp gâl nti tiểu học an geh tât 35 kon hoc/jrô nti, hôm đah ăp jrô nti trung học cơ sở lah an geh tât 45 kon hoc/jrô nti. Ăp nkuăl ƀư tĭng nău uănh tĭng ăp ntŭk ngih nti tâm ban kơt mât đăp mpăn rnoh kon hoc ta jrô nti kơt nĕ mbra geh ƀư bah ir mô tŏng nai nti. Rnôk geh ntop tay du hê biên chế nai nti, ntop tay nău dŏng nglăp tay ăp ngih nti tâm ban kơt pă dăp rnoh kon hoc ta jrô nti rĭ n’gâng kan ntĭm nti ta Gia Lai mbra geh tŏng nai nti, klâp ma nău dơi ntĭm nti bâh n’gor mbra ueh lơn.

Nuĭh rblang: Thị Đoắt