VOV4.M’nông:   Đah rlău 10 năm râng trong kan Hội, yuh Nông Thị Lành-Groi Chi hội bu ur ƀon Ograng (xă Ia Pếch, nkuăl Ia Grai, n’gor Gia Lai lĕ geh âk nău rgop an ăp ntrong leo ta ƀon lan. Lơn lah đah nuih n’hâm tâm yô̆ tâm rŏng yuh lĕ krêp dêh nuĭh ƀon lan ta ntŭk, ndrel ty ntop kơl an ăp rnăk ach o, rnăk geh naư rêh jêr jŏt.

Chôt srê Covid-19 lăp tât ƀon Ograng ƀư âk rnăk jêr jŏt lơ ma ka ƀah mô tŏng. Wa Phạm Thị Lam lah ngoăy tâm rnoh nĕ rnôk rnăk wâl geh nuĭh an nkhah êng, nkre roh nuĭh kan nkre hoach tay ăp prăk dŏng êng. Wa Lam nkoch, tâm rnôk jêr jŏt âk, rnăk wâl lĕ dơi dơn nău kơl ngăch bah yuh Nông Thị Lành:

“Jay gâp geh ji, kon hăn kan ngai sĭt khân pơng an hăn nkhah êng ri gâp njê ngăn, tâm rnăk wâl lĕ mô geh sa hôm, ma hôm an trok 1,6 rkeh prăk. Gâp mư lah đah kon đah ăp kônh rnôk kon lĕ nkhah êng mê̆ mư geh prăk. Đă yơ Lành kơl jêng lĕ rgop geh prăk kơl rnăk wâl”.

Yuh Nông Thị Lành (ao ônh) tât khâl n’hanh ntrŭt nsôr rnăk yuh Tạ Thị Hồng Hạnh geh naư rêh jêr jŏt

Mô knŭng kơl ăp nuĭh bu ur tâm chi hội ƀon Ograng, yuh Nông Thị Lành ndrel du đêt oh yuh tâm ban chấp hành hôm pơk hvi mpang ty kơl oh yuh jêr jŏt ta ăp thôn kiău ma. Tâm rnoh nĕ geh rnăk yuh Tạ Thị Hồng Hạnh ta ƀon Sát Tâu, xă Ia Pếch. Yô̆ an nău rêh ach o bah rnăk wâl yuh Hạnh, lŏ an săm ji mô blău bah an sai, yuh Nông Thị Lành lĕ kuăl jă ăp nuĭh kơl rlău 4 rkeh prăk măt kơl yuh Hạnh năp du gâl nău rêh. Rnôk nuĭh sai roh yor mâp ji, yuh Lành lĕ tât kơl nău kan khĭt ôm, ƀa ƀơ chop khâl, ntrŭt đă yuh Hạnh rlet rlău jêr jŏt:

“Ăp tơ̆ jêr jŏt yuh Lành an mì tôm, du đêt ndơ n’hanh ntrŭt nsôr, ta xă geh bôk nău kan ri yuh kơl lor đŏng, kuăl jă tâm ƀon an gâp ndơ aơ ndơ êng kơt kho ao, mì tôm, phe. Yuh Lành kơl âk đŏng, lah uĕh yuh âk ngăn yor ăp rnôk jêr jŏt ri rmôt bu ur n’hanh xă tât ôp khâl”.

Ta bôk ndeh măy ơm, yuh Nônh Thị Lành hăn ăp ntŭk ăp trong gay kơl ăp oh jêt, nuĭh ranh geh nău rêh jêr jŏt. Bah kơi nău gơih, dŭt n’hâm tâm nău kan, đêt nuĭh gĭt yuh Nông Thị Lành dôl an săm ji, đah âk tơ̆ xă trị. Bôl geh tâm săk nơm mbak jâk kop ji, yơh yuh Lành mô mĭn, răm rhơn, kơl an ăp nuĭh nău rêh hôm e jêr jŏt.

“Knŭng mpŏng ŭch ăp nuĭh kơl mro nău kan bah gâp. Du nar nĕ mpŏng an nuh srê mbra lĕ gay kônh wa dơi plơ̆ tay nău đăp mpăn. He knŭng ŭch m’hâm ƀư he ngăch dăng, mpŏng an lĕ rngôch ăp nuĭh dơi ngăch dăng, mpŏng geh ăp nuĭh lŏng bôk tôr kơl an nău kan bah gâp ăp rnôk gâp kuăl jă an ăp nuĭh jêr jŏt gay nsrôih kơl an geh prăk kơl an kônh wa”.

\

Yuh Lành rgŏ jă ăp nuĭh lŏng bôk tôr an ăp ndơ ân nuĭh ƀon lan nkhah êng ta ntŭk.

Tĭng UBND xă Ia Pếch, tâm năm 2021, yuh Nông Thị Lành lĕ tâm rgop đah ăp ban nsum mpôl nău kan an rhiăng nklâm ndơ geh ăp ndơ dŏng, ndrôm sam ƀŭt an ăp rnăk jêr jŏt, ăp mon kon hŏk ta xă geh nău rêh jêr jŏt, kon se kon đơi... Wa Phạm Thị Kim Tuyến, Groi kruanh UBND xă Ia Pếch uănh lah: Yuh Nông Thị Lành du hê cán bộ ta ntŭk ngăch blău đah ăp ntil. Nău ntoh lư bah yuh Lành lah dŭt gơih, dŭt n’hâm đah nău kan, hăn jru đah ƀon lan.

“Đah nău kan bah nơm ta thôn, ƀon, rlău ma nău kan nkoch trêng rgŏ jă, ntop kơl chuh dak si, saơ nău nkhah êng bah kônh wa ŏk r’ah jêr jŏt pơng hăn rgŏ jă. Đah mpeh xă uănh lah prêh, geh âk trong rnê nkhôm, ntrŭt nsôr đah yơ Nông Thị Lành. Êng đah yơ Nông Thị Lành lah ntrong leo gay nkoch trêng an ăp nuĭh saơ nuih n’hâm kan bah nuĭh ƀon lan tâm trong kan njrăng n’gang srê, lơn lah tâm ntrong leo kơl nuĭh, ntop kơl n’gâng kan ta ntŭk, kơl an ăp nău kan, hăn lor tâm ăp ntrong leo. Yuh dŭt gơih, lĕ nău kan n’hanh gơih dŭt n’hâm n’hanh geh dŭt âk nău kan đă rnê rhơn”.

Đah ăp ndơ dơi geh, âk năm bah năp, yuh Nông Thị Lành lĕ dơi ăp n’gâng kan kan n’hanh rmôt kan an âk sam ƀŭt rnê rhơn n’hanh bằng khen. Đah nuih n’hâm răm rhơn, rah rơih, dăch dêh n’hanh ŭch yô̆ rŏng, tâm pă, tâm kơl ăp nuĭh, jêng yuh Nông Thị Lành dơi ăp nuĭh ŭch rŏng, rnê ryơk./.

                              Nuĭh rblang: Y Sưng Phê Ja