VOV4.M’nông: Tâm kêng măng 16/5, ta Văn Miếu-Quốc Tử Giám Hà Nội, Groi Kruanh dak Võ Thị Ánh Xuân hŏ jă Tổng thống Hy Lạp Katerina Sakellaropoulou tât mâp nchră nau. Groi Kruanh dak Võ Thị Ánh Xuân rhơn ăp nau ueh lăng tâm rơh tâm nchră đah Tổng thống ndrel Kruanh dak Nguyễn Xuân Phúc, rnơm tâm rơh khâl mra geh nau dơi ueh, rgop nau ntrŭt dăng nau tâm boh đah Việt Nam ndrel Hy Lạp lŏ geh hun hao ueh, lăp tâm nau jru. Mbơh đah Tổng thống Hy Lạp mpeh Văn Miếu-Quốc Tử Giám, Groi Kruanh dak mbơh aơ lah ntŭk nkah ơm ueh ngăn bah Việt Nam, ntoh nau ơm gơih nti, ryơk nai nti, dŏng nŭih gĭt blau bah rnoi mpôl Việt Nam rlet rlau ma rbăn năm ma aơ. Tâm nau ueh lăng, dăch dơh, Groi kruanh dak Võ Thị Ánh Xuân jă Tổng thống Hy Lạp tât tâm nkoch bri tĭng nau vay bah nŭih Việt đah nau ƀư ngêt ăp ntil trà ntoh lư ngăn bah Việt Nam, uănh nsoh ao jong ndrel uănh ăp nau njroh mprơ ơm ueh ngăn bah Việt Nam./.

Nŭih rblang: H’Thi