VOV4.M’nông: Di nar kon se lam ntur neh (1/6) ndrel khay kơl an kon se năm 2022, Groi Kruanh dak Võ Thị Ánh Xuân hŏ tât khâl ăp kon se dôl săm ji ung thư tâm Ngih dak si K (ta Tân Triều, Hà Nội). Ôp khâl ndrel pă nklâm ndơ ân ăp kon se, ăp rnăk kon se dôl săm tâm ngih dak si K Tân Triều, Groi Kruanh dak Võ Thị Ánh Xuân tâm pă nau kơl an, nau ŭch rŏng đah ăp kon se, ăp nŭih dôl geh săm ta aơ. Di nar kon se lam ntur neh, Groi Kruanh dak njoăl nau ôp khâl n’hâm soan tât ăp nŭih ji, ngăn lah kon se, ŭch ăp nŭih geh nau ji nsôih săm, ơm bah ndrel geh sĭt ma rvăt vâl. Groi Kruanh dak rhơn rnôk ăp ntil ndơ dŏng tâm ngih dak si nar lơn ma ueh nâp lơn gay ma kơl an nŭih ji, nkre rnê prêh ăp nau nsôih mô rlu bah rmôt nai dak si gay âk nŭih ji ung thư, ngăn lah bu ur, kon se, bu ur bŭn geh nau dơi ntoch jong tay nau rêh./.

Nŭih rblang: H’Thi