Ôi 29/6, Groi Kruanh dak Võ Thị Ánh Xuân khâl n’hanh pah kan ta n’gor Cao Bằng; khâl, an ndơ rnăk dơi kơl, nuĭh geh soan ta nkuăl Hà Quảng. Groi Kruanh dak Võ Thị Ánh Xuân ndrel mpôl pah kan lĕ tât mpoh nhang, an nkao đền thờ Kruanh Hồ Chí Minh n’hanh tăm tơm si nkah ndrăy ta Nkual di tích Ngih dak Pác Bó (xă Trường Hà, nkuăl Hà Quảng).

Tâm rơh pah kan, Groi Kruanh dak lĕ an 20 mlâm jay an rnăk ach o; an 50 nklâm ndơ an rnăk dơi kơl n’hanh 200 kon hŏk geh nău rêh jêr jŏt hao nti nsơm ta nkuăl Hà Quảng. Djôt dơn ăp nău nsrôih n’hanh săk rnglăy mbơh ƀư wăng sa rêh jêng bah Hà Quảng kơt bah n’gor Cao Bằng dơi geh tâm năm bah năp, Groi Kruanh dak Võ Thị Ánh Xuân lah ƀon lan an mât tay rgŏ jă ăp nuĭh gay uănh mĭn mât chăm nău rêh nuĭh ƀon lan, mât nău way ơm ƀon tơm cách mạng, mât uĕh nău geh, nău dơh ơm geh, gay wăch rgum ntuh kơl, hun hao wăng sa, n’hao nău rêh nuĭh ƀon lan.