VOV4.M’nông – Măng 8/9, Groi Kruanh dak, Kruanh Hội đồng Tơm prăk nkrem ntop kơl kon se Việt Nam Võ Thị Ánh Xuân ndrel mpôl pah kan bah Trung ương lĕ râng Măng rgum bŏng khay n’hanh an ndơ kon hŏk Ngih sam ƀŭt Phổ thông dân tộc nội trú trung học cơ sở nkuăl Văn Yên, n’gor Yên Bái ndrel ntoh măt ăp oh geh nău rêh jêr jŏt, kon hŏk koet nte ta lam nkuăl, ndrel râng ăp nău ƀư răm Tết Trung thu kơt uănh nsong, ƀư ngăn “ntŭk ntô văn hóa kon se”, uănh njroh lân...

Groi Kruanh dak Võ Thị Ánh Xuân n’hanh kruanh n’gor Yên Bái an ndơ ăp mon kon se

Nkhêp di Tết Trung thu năm 2022, Groi Kruanh dak Võ Thị Ánh Xuan lĕ an 400 rkeh prăk an kon se geh nău rêh jêr jŏt bah n’gor Yên Bái; an 20 nklâm prăk kơn hăn nti an kon hŏk Ngih sam ƀŭt Phổ thông dân tộc nội trú trung học cơ sở nkuăl Văn Yên.

Groi Kruanh dak Võ Thị Ánh Xuân răm ndrel đah ăp mon kon se.

Tơm prăk nkrem kon se Việt Nam an 100 nklâm prăk kơl hăn nti n’hanh 30 bôk ndeh wah jâng an kon hŏk ngih sam ƀŭt. Rmôt kan koet nte n’hanh kon se kon đơi Việt Nam an ndơ an 50 kon hŏk. Tơm prăk ntop kơl kon se n’gor an 20 nklâm ndơ an kon hŏk geh nău rêh jêr jŏt, kon hŏk koet nte ta lam nkuăl.

Nuĭh rblang: Y Sưng Phê Ja