VOV4.M'nông: Nar 7/6, ta Nhih pah kan Kruanh dak, Groi Kruanh dak Võ Thị Ánh Xuân wơt mpôl ntơh măt nuĭh geh n'hâm suan n'gor Đồng Nai nkhêp geh mpôl hăn khâl Thủ đô Hà Nội n'hanh lăp Lăng chop Wa. N'gor Đồng Nai aƀaơ geh rlău 52 rbăn nuĭh geh n'hâm suan đah cách mạng n'hanh rnăk wâl nuĭh geh n'hâm suan. Tâm nê geh 1 rbăn 141 Me Việt Nam dăng janh. Nkoch bri đah mpôl ntơh măt lah nuĭh geh n'hâm suan đah cách mạng n'gor Đồng Nai, Groi kruanh dak Võ Thị Ánh Xuân rhơn rnê ăp nău nsrôih bah n'gor Đồng Nai tâm trong kơl an nuĭh geh n'hâm suan; đă n'gor Đồng Nai rgum tay lam rêh jêng kon nuĭh râng ntop kơl nuĭh geh n'hâm suan n'hao geh mpeh drăp ndơ n'hanh nuih n'hâm; lơn lah tâm ăp trong kan rdâk njêng, nkra jay gŭ. Groi kruanh dak mpŏng nuĭh geh n'hâm suan đah cách mạng n'gor Đồng Nai mât uĕh tay nău way ơm rŏng dak, râng nkoch trêng an ƀon lan ta ntŭk tĭng jăp ăp trong kơl bah Đảng, pháp luật bah Ngih dak, rdâk njêng ƀon tơm nar lơn ma gĭt blău, ndrŏng uĕh./.

Nuĭh rblang: Điểu Thân