Ta rơh tâm mâp, mpôl đại biểu Quốc hội n’gor Hậu Giang ;ĕ mbơh tơih nău nchrăp kan bôk nău kan rơh rƀŭn nchră tal 5, Quốc hội khóa 15, nkô̆ nău ơh nău, dăn đă bâh ƀon lan. Lôch nĕ, âk ƀon lan ntoh ngơi tâm rgop nău njoăl nău ŭch, nău rŏng, ăp nău kŏ văk ta ntŭk tât đại biểu Quốc hội.

Ntoh ngơi ta rơh tâm mâp, groi kruanh rnâng kan Quốc hội Trần Thanh Mẫn, mpơl nău ŭch nsrôih rhơn rnôk n’gor Hậu Giang geh njoat hun hao ueh mhe tâm pe khay bôk năm aơ, rnôk hun hao wăng sa geh 12,67% leo bôk năp ta lam dak. Tâm let năp tay, groi kruanh rnâng kan Quốc hội Trần Thanh Mẫn dăn đă Hậu Giang an geh nsrôih mbơh tơih ƀư tĭng Nghị quyết Đại hội 13 bâh Đảng, Nghị quyết Đại hội Đảng bộ n’gor Hậu Giang tal 15, an geh mât uănh ntĭm nti hun hao rnoh nuĭh kan gay ma kơl an nău hun hao ta ntuĭk, rdâk njêng trong kan chính trị kloh ueh, nâp dăng an tâm di đah nău ŭch ta rơh mhe.