Ta nar wơt, Groi Thủ tướng Trần Lưu Quang nkoch nău răm rhơn tâm boh kan ndrel Việt Nam-Australia lơ hun hao têh dăng, hăn jru, ngăn ngên ta âk ntil nău, lơn lah, tăch rgâl 2 ding hao jêng âk, geh 16,1 rmen đôlar tâm năm 2022, hao rlău 30 tơ̆ nkôp đah năm 2021, ndơ̆  Australia jêng dak tăch rgâl têh tal 10 bah Việt Nam n’hanh Việt Nam lah dak tăch rgâl têh tal 7 bah Australia.

Groi Thủ tướng đă 2 ding tâm rgop rjăp gay ƀư uĕh ăp nău kan nkah gĭt 50 năm ndâk njêng tâm boh Việt Nam-Australia tâm năm 2023, tâm nĕ geh nău nchrăp uĕh an ăp nău ƀư tâm rgâl rmôt đah 2 dak tâm năm tât. Tĭng n’gâng tơm tâm boh ăp ding uĕh lăng, 2 kruanh rđău kan lah rjăp nău khlay bah nău tâm rnglăp, đăp mpăn, kan ndrel tâm nkual n’hanh ta lam ntŭr neh; ryơk Hiến chương Liên Hợp quốc n’hah luật pháp lam ntŭr neh.