VOV4.M'nông: Kêng măng 13/6 ta Nhih pah kan Chính phủ, Bí thư Trung ương Đảng, Groi Thủ tướng Lê Minh Khái, Kruanh Ƀan rđău đă mât rnoh khlay ndơ hŏ ƀư tơm rơh hop đah ăp n'gâng kan mpeh mât rnoh khlay du đêt ntil ndơ dŏng sa khlay. N'glôch jêh ta rơh hop, Groi Thủ tướng Lê Minh Khái lah rjăp, tâm 5 khay bôk năm, mpet jâk hao khlay ndơ âk. Nkô̆ lah tă bah ăp dak dŏng trong kan prăk kaih mƀơk lhoi.

Bah meng nê, lôch bah nuh srê COVID-19 dơi mât kân, ăp nău kan ƀư njêng tăch rgâl plơ̆ tay kơt ơm, jêng nău ŭch geh dŏng ndơ âk. Tâm rnôk nê, Chính phủ, Thủ tướng Chính phủ n'hanh ăp n'gâng kan, ăp n'gor hŏ an ƀư âk trong nkra uĕh, geh nău tam. Năl tâm let năp tay, mpet jâk hao khlay ndơ hôm âk đŏng. Lơn lah rnoh khlay pring xăng hao mbro ƀư tât hao khlay du đêt ntil ndơ dŏng sa khlay. Jêng pah kan mât rnoh khlay bah Chính phủ ntơm bah aơ tât kêng dŭt năm jêr jŏt đŏng. Đah mât uănh rnoh khlay du đêt ntil ndơ dŏng sa khlay "grêt dăch" đah nău rêh nuĭh ƀon lan, Groi Thủ tướng dăn đă ăp n'gâng kan ntơm bah aơ tât kêng dŭt năm, ân tĭng groi nđôi nău tât bah  ntŭk tăch rgâl, n'hao  dăng pah kan nchroh ơm, gay geh trong nkra ngăch ngăr, đăp mpăn tŏng geh ndơ rhŏ dŏng an nău kan, nkret njêng, dŏng sa kơt rnoh hŏ ndơ̆ luh./.

Nuĭh rblang: Điểu Thân