VOV4.M'nông: Ta năp nô nău ăp nar mhe aơ, rnoh khlay du đêt ndơ dŏng tâm dak hao, tă bah rnoh khlay pring xăng lam ntŭr neh hao, nar 14/3 ta Nhih pah kan Chính phủ, Bí thư Trung ương Đảng, Groi Thủ tướng Lê Minh Khái ƀư tơm rơh hop đah du đêt n'gâng kan, ăp n'gor mpeh pah kan mât rnoh khlay ndơ dŏng khlay, kơt pring xăng, ndơ nkret njêng, lŭ loih, phân poh, ndơ tuch tăm, ndơ dŏng săm ji. Lah ta rơh hop, Groi Thủ tướng Lê Minh Khái lah rjăp, nău mât kân lhăt ăp ndơ tăch geh tât khuch bah rnoh khlay pring xăng lah dŭt ngăch gay năn nkra nău nde hao rnoh khlay tâm di. Groi Thủ tướng lah rjăp, đah ăp ndơ ngih dak n'glêh an rnoh khlay, ta năp măt tâm rnôk aƀaơ mô mĭn uănh n'hao rnoh khlay, lơn lah ăp ndơ rhŏ dŏng nsum. Êng đah ăp ndơ ngih dak mô n'glêh an rnoh khlay, Groi Thủ tướng đă mât kân lhăt ăp ndơ ƀư jêng hao rnoh khlay; ôp uănh lhăt ăp nuĭh geh nău mpơl mha êng, ăp ndơ khuch têh tât nău rêh bah ƀon lan, lơn lah nuĭh ach o. Nkra rmal lhăt ăp nuĭh nkrâm ndơ tăch gay nde joi sa mô geh nău way./.

Nuĭh rblang: Điểu Thân