VOV4.Mnông-Nar 6/4, ta ntŭk kan Chính phủ, groi Thủ tướng Lê Văn Thành rƀŭn nchră trực tuyến rnâng kan ntĭm leo ngih dak nchrăp nău kan cảng hàng không lam ntur neh Long Thành. Tĭng nău mbơh tơih bâh tơm ntuh kơl, lôch ƀư lôch nău kan săch nuĭh ntuh kơl n’hanh ký tâm ton pah kan nar 16/3/2022, Tổng tông ty Cảng hàng không Việt Nam ACV, lĕ geh ntơm ƀư nău kan jrŏng jay, kuih jrŏng ngih ga vơt năch. Lôch rlău 1 khay pah kan, nău kan ƀư lĕ lôch lĕ rngôch ăp ntŭk khoan tâp jrŏng, tât lĕ khay 3 geh 2,5 rkeh khối kuĭh dăp rlău 500 rbăn khối đah nău nchrăp. Mpeh rnoh prăk, tât aƀaơ Tổng công ty cảng hàng không Việt Nam ACV lĕ nchrăp đor lor 36 rbăn rmen prăk nchrăp ƀư nău kan. Ta rơh rƀŭn nchră, ăp đại biểu an lah nău ngăch ntron ntŭk ƀon lan, pă ntŭk pah kan tâm ba năp nơh geh âk nău rgâl tât ndal, yơn lah hôm nha mbrơi đah nău nchrăp ƀư jêr tâm nău pah kan. Groi Thủ tướng Lê Văn Thành lah na nê̆ nkô̆ mpŏng kan, an geh ƀư dơi, sa nkra nău kan ta năm 2025, nău ueh an geh an lor bôk năp n’hanh hăn ndrel đah ăp trong kan ƀa ƀơ, mbro gay ma njrăng mpŭng lir, roh rui, mô ueh tâm nău nchrăp kan.

Nuĭh rblang: Thị Đoắt