Kêng măng 18/9, ta Hà Nội, Groi Thủ tướng Rnâng kan Nguyễn Hoà Bình, Kruanh Hội đồng mbơh nchră nau năm 2024 ƀư tơm nar rƀŭn uănh săm ƀŭt, rnoh moh săk đă ân luh năm gŭ ndrung năm 2024. Rmôt kan mbơh nchră nau ân luh năm gŭ ndrung năm 2024 hŏ rƀŭn săch rnoh moh săk gay đă Kruanh dak ân luh lor năm gŭ ndrung ân ăp nŭih geh tŏng nau dơi ân luh rnôk di nkah 79 năm nar Quốc khánh dak CHXHCN Việt Nam ndrel 70 năm nar Rklaih Thủ đô. Ntơm năm 2009 tât rnôk aơ, Kruanh dak CNXHCN Việt Nam hŏ 9 tŏ ký nau ntrŭnh ân luh lor năm gŭ ndrung đah rlau 92 rbăn nŭih gŭ ndrung tâm rnôk gŭ hŏ geh nau kan, ntĭm nti, nchiăr nti ueh gay sĭt ma rnăk vâl, ƀon lan ƀư nŭih ueh ân nau rêh.

Gay nau kan săch ân geh đăp mpăn, tâm di pháp luật, tŏng nkô̆ nau, nau đă bah rơh ân săch tĭng nau ntrŭnh bah Đảng ndrel nau ntrŭnh bah Kruanh dak, Groi Thủ tướng rnâng kan Chính phủ Nguyễn Hoà Bình đă ăp ntŭk n'gâng kan ân geh rgum mêt uănh, mbơh kloh, rjăp, nkah njrăng ngăn, săk nâp ăp nŭih, tâm dăch ma dơi, nau geh tĭng nau ntrŭnh bah Luật ân luh năm gŭ ndrung lor ndrel nau ntrŭnh bah Kruanh dak./.