Nkhêp di pah kan ta Dak Lak, lơ 15/9, Groi Thủ tướng rnâng kan Chính phủ Nguyễn Hòa Bình lĕ tât khâl ngih sam ƀŭt Tiểu học, Trung học cơ sở, Trung học phổ thông Hoàng Việt, ta nkual ƀon têh Buôn Ma Thuột. Tâm trôm ngih sam ƀŭt têh hvi bơi 11 ha, ngih sam ƀŭt Hoàng Việt dơi năp ngih wâl mhe, rlău 400 cán bộ, nai n’hanh nuĭh pah kan ngih sam ƀŭt dôl ntĭm nti, mât uănh nklăp 3.400 kon hŏk bah gưl tiểu học tât trung học phổ thông tât bah rlău 20 n’gor, nkual ƀon têh lam dak.

Ntoh ngơi ta nar pah kan, Groi thủ thướng uănh lah prêh trong uănh pah kan bah n’gor Dak Lak ƀư tĭng nău ntrŭnh bah Đảng, Ngih dak mpeh ntuh kơl an ntĭm nti, mpŏng kruanh n’gor, nău kan ntĭm nti kơt nai n’hanh kon hŏk ngih sam ƀŭt Hoàng Việt mât uĕh tay ăp săk rnglăy dơi geh, mô rlu n’hao uĕh ntĭm nti lĕ rngôch an kon hŏk. Di rơh aơ, Groi Thủ tướng rnâng kan Chính phủ Nguyễn Hòa Bình lĕ an ndơ nkah ndrăy n’hanh ndơ trung thu an kon hŏk bah ngih sam ƀŭt Hoàng Việt. Ta năp nĕ, măng 14/9, Groi Thủ tướng Nguyễn Hòa Bình lĕ râng bôk nău ƀư Trung thu “Lồng đèn mpŏng ang nău rŏng” ta Dak Lak, an 1.700 nklâm ndơ geh prăk kơl hăn nti, ndeh wah jâng n’hanh ndơ trung thu an ăp oh kon se geh nău rêh jêr jŏt.