Ôi nar 4/9, ta n’glah chruh Tân Hội, nkuâl Đức Trọng, n’gor Lâm Đồng, Groi Thủ tướng Chính phủ Trần Hồng Hà ndrel mpôl pah kan hŏ hăn uănh na nê̆ trong cao tốc Tân Phú- Liên Khương (mpeh ăp ntŭk nchrăp ƀư trong cao tốc Tân Phú – Bảo Lộc n’hanh Bảo Lộc – Liên Khương).

Ta rơh hăn uănh, kruanh n’gor Lâm Đồng n’hanh ntơh măt Tập đoàn Đèo Cả (đơn vị dăn ntuh kơl ƀư trong) nkoch ăp jêr jŏt, kŏ kol tâm nău an ƀư siƀŭt ntuh kơl ăp trong cao tốc. Tĭng nê, lĕ 2 trong nchrăp aƀaơ mâp du đêt jêr jŏt mpeh tơm prăk, trong tâm pă nsĭt geh wăng sa, rgâl êng tĭng gâl trong rƀŏng hăn ndrel ăp nău rgâl mpeh rnoh hvi neh bri rgâl an ƀư trong, nău tâm rdăp dăp rgum loih kông. Tĭng bôk nău kan bah mpôl  hăn pah kan, Groi Thủ tướng Trần Hồng Hà ndrel nuĭh ntơh măt ăp n’gâng kan geh tât mbra pah kan đah kruanh rđău kan Tỉnh ủy, UBND n’gor Lâm Đồng gay nkra ăp jêr jŏt, kŏ kol bah trong nchrăp ƀư trong cao tốc gâl Tân Phú - Bảo Lộc, Bảo Lộc - Liên Khương n’hanh nchrăp ƀư trong cao tốc Nha Trang - Đà Lạt.