Nău nchrăp ƀư trong ndeh hăn ngăch Tân Phú-Bảo Lộc jong 66km, têh 4 mbôr ndeh, dĭng lĕ rnoh prăk ntuh kơl 17.200 rmen prăk tĭng trong kan ndrel nsum. Tĭng nău ntrŭnh ntuh kơl dơi uănh an, gưl prăk Ngih dak râng nău nchrăp ƀư lah 6.500 rmen prăk (geh bơi 38%), hôm ƀa ƀă prăk bah nuĭh ntuh kơl n’hanh prăk rgŏ jă êng. Nthoi nău nchrăp ƀư aơ lah nău nchrăp ƀư trong ndeh hăn ngăch Bảo Lộc-Liên Khương, jong 73,6km, dĭng lĕ rnoh ntuh kơl 19.521 rmen prăk. Tâm nĕ, prăk ngih dak 7.761 rmen prăk (geh bơi 39%), hôm ƀa ƀă lah prăk bah ăp nuĭh ntuh kơl n’hanh tơm prăk rgŏ jă êng.

Tĭng wa Trần Hồng Thái, Kruanh UBND n’gor Lâm Đồng, yor tơm prăk Ngih dak râng ăp nău nchrăp ƀư đêt, mô kơt tĭng trong tâm pă gưl n’hŭch nău geh jêng nău uĕh bah nău nchrăp ƀư mô âk, n’hŭch nău uĕh đah nuĭh ntuh kơl n’hanh ăp rmôt an manh prăk. Bah meng nĕ, lĕ 2 nău nchrăp ƀư kol da dê dăp rgum sroh ôp, joi ƀư, nkret njêng n’hanh dŏng khoáng sản tĭng nău ntrŭnh 866, lơ 18/7/2023 bah Thủ tướng Chính phủ. Wa Trần Hồng Thái, lah:

Lĕ 2 nău nchrăp ƀư geh âk wăk kol tâm ban, ndơ ƀư nău kan bah 2 nău nchrăp ƀư dơi n’gor Lâm Đồng nsrôih ƀư tĭng n’hanh tâm nău dơi mbơh ƀư ơm lah dơh nău ntrŭnh, n’hanh dơi ƀư tâm năm 2024 gay tât năm 2025 lah năm ndăn. Tal 2, trong hăn ngăch ri jong mô rgâl yơn geh nău rgâl yor nkô̆ nău vĭ vĕ. Yơn lah, yor aơ mô di ntil ndơ ƀư nchâp đă an rgâl nău ntrŭnh ntuh kơl, knŭng lah rgâl tĭng gưl jêng dŭt ŭch mât nâm ơm nău ntrŭnh ntuh kơl.

Gay dôh rklaih ăp jêr jŏt, wăk kol aơ, n’gor Lâm Đồng dăn đă Thủ tướng Chính phủ uănh mĭn tay ntop tơm prăk ngih dak an ăp nău nchrăp ƀư rnoh prăk 3.332 rmen prăk, tâm nĕ 2.410 rmen prăk an lvang Tân Phú-Bảo Lộc n’hanh 922 rmen prăk an lvang Bảo Lộc-Liên Khương. Nkre, an nău nchrăp ƀư trong hăn ngăch Tân Phú-Bảo Lộc dơi kơt tĭng trong ƀư tâm pă nău geh hŭch, tĭng nău ntrŭnh ta Điều 82 Luật Ntuh kơl tĭng trong ƀư kan ndrel nsum.

Ntoh ngơi ta nar pah kan, Groi Thủ tướng Chính phủ Trần Hồng Hà mĭn lah mô dơi hao prăk ngih dak ta 2 nău nchrăp ƀư aơ. Yơn lah, gay mkra nău prăk kaih, Groi Thủ tướng Chính phủ đă ăp n’gâng kan, nău kan geh tât geh sam ƀŭt tâm ôp tâm nchră đah Thủ tướng Chính phủ gay dôh rklaih wăk kol tâm nău rgŏ jă tơm prăk manh bah ngân hàng. Yor tĭng nău ntrŭnh aƀaơ, rnoh prăk nuĭh tơm dŏng bah nuĭh ntuh kơl mô tŏng 20% dĭng lĕ prăk ntuh kơl bah nău nchrăp ƀư ri mô tŏng dơi manh.

Gâp dăn đă mpeh chính phủ ri N’gâng kan prăk kaih an geh mĭn njêng gay mbơh an Thủ tướng chính phủ uănh mĭn gay an nghị quyết bah Chính phủ mô lah nkra nghị định 78, nar mbơh ƀư nău aơ lơ ơm lơ uĕh. Yor ăp nău kơl Ngih dak rgâl âk, mô geh tâm ban ŭch n’hanh geh nău mâp tâm ntuh kơl, n’ăp ăp nuĭh ntuh kơl kơt ăp ngân hàng hăn ndrel an geh sam ƀŭt tâm ôp tâm nchră an thủ tướng Chính phủ gay geh ntĭm rđău gay he ƀư nău aơ tâm di ngăn, gay mât an ăp nău ton bah mpeh Ngih dak.

Mpeh nău ăp nău nchrăp ƀư trong hăn ngăch geh âk dăp rgum khoảng sán, Groi Thủ tướng Trần Hồng Hà đă n’gor Lâm Đồng n’hanh ăp nuĭh ntuh kơl mbơh đah ăp ngih pah kan mât uănh ngih dak gay geh trong ntĭm ƀư tĭng ăp trong mkra tâm di.

Ta năp nĕ, ta nar pah kan, kruanh UBND n’gor Khánh Hoa lĕ mbơh nu nău mĭn njêng di nău nchrăp ƀư trong hăn ngăch Nha Trang-Đà Lạt. Tĭng nĕ, nău nchrăp ƀư trong jong rlău 80km, têh 4 mbôr ndeh, ngăch hăn 80 tât 100km/h. Dĭng lĕ rnoh ntuh kơl nău nchrăp ƀư lah 25.000 rmen prăk, tĭng trong ƀư kan ndrel nsum PPP, tâm ton BOT geh nău ntoh kơl bah ngih dak, đah rnoh prăk dăn đă lah 70% tơm prăk Ngih dak, hôm ƀa ƀă bah nuĭh ntuh kơl; năm trok prăk lah 26 năm 9 khay. Nău nchrăp ƀư geh dĭng lĕ rnoh neh 627ha, tâm nĕ geh 409ha bri krŏng, bri njrăng n’gang phŭt sial n’hanh neh tuch tăm. Jêh rnôk kơt dŏng ăp trong mkra kỹ thuật kơt ntung, mpêr n’gar... mbra n’hŭch geh 125 ha rnoh neh bri geh khuch.

Đah nău nchrăp ƀư trong hăn ngăch aơ, Groi Thủ tướng Chính phủ Trần Hồng Hà đă 2 n’gor Khánh Hòa n’hanh Lâm Đồng, Nuĭh ntuh kơl Tập đoàn Sơn Hải n’hanh ăp n’gâng kan nău kan geh tât an hăn ndrel, rgum mĭn njêng, ndâk ƀư lôch jêh ăp trong ƀư kỹ thuật, nău tâm di, ngăn lah an mĭn kơp na nê̆ trong ƀư mpeh prăk kaih.