Dŭt kêng măng 6/9, rmôt hăn kan bah Groi Thủ tướng Trần Hồng Hà mêt uănh nau kan njrăng, rdâng phŭt mrô 3 tâm nkuăl ƀon têh Hải Phòng. Groi Thủ tướng Trần Hồng Hà đă nkuăl ƀon têh Hải Phòng mât nau njrăng rdâng phŭt, mbơh nau tât ƀa ƀơ mpeh ntrong hăn bah phŭt, mô dơi thơ tha. Groi Thủ tướng lah rjăp, bol ma Nkuăl ƀon têh Hải Phòng hŏ geh nau nchrăp gay ma rdâng đah phŭt, yơn lah, hôm nchrăp nau tât êng kơt roh điện, dak hao, tâm mâp ngơi, tâm nchră nau kan bah ăp rmôt gay rklaih nau tât.

Tĭng n’gâng kan mât njrăng n’gar dak, N’gâng kan tuch tăm ndrel Hun hao ƀon lan, rdâng đah phŭt mrô 3, kơp tât kêng măng 6/9, ăp n’gor, nkuăl ƀon têh, geh: Quảng Ninh, Hải Phòng, Thái Bình, Nam Định, Ninh Bình hŏ ntrơn du 37.188 nŭih tâm ăp ntŭk mât rong tui ka tâm măt dak, tâm ăp ngih mô nâp êp dak lêng, nkuăl rđŭng, roh nau đăp mpăn gay hăn tât ntŭk đăp mpăn. Rmôt tahen biên phòng tâm dak lêng hŏ tât kơp, ntĭm ân rlau 51 rbăn bôk tàu đah 220 nŭih gĭt geh phŭt mrô 3 gay nchrăp der, tât rnôk aơ dĭng lĕ duk mpan hŏ der. Ăp n’gor, nkuăl ƀon têh ntơm bah Quảng Ninh tât Nghệ An ndrel Quảng Bình ƀư ueh nau kan mô ân tâm dak lêng ntơm lơ 6/9./.