Kêng măng 18/7, Groi Thủ tướng Trần Hồng Hà, Kruanh ntŭk kan ntoh măt dak si lam ntur neh WHO ta Việt Nam, wa Angela Pratt. Groi Thủ tướng Trần Hồng Hà rhơn tâm năm kan mhe bah wa Angela Pratt ta Việt Nam ndrel rnê prêh nau rđau kan bah Ntŭk kan dak si lam ntur neh tâm rnôk lam ntur neh dôl ma rdâng đah âk nau kan ntul rlong ndrel srê ji. Tâm nê, nau nsôih bah WHO rgop nau kơl an ân Việt Nam geh nau dơi tâm nau rdâng đah srê Covid-19 ndrel plŏ jêng ngoai tâm âk dak ơm pơk mpông jêh bah srê. Tâm nchră mpeh nau ndơn geh dŏng ăp ntil dak si, sinh phẩm, vắc xin geh rnoh nâp, rnoh tăch tâm di.

Groi Thủ tướng Trần Hồng Hà đă ntŭk kan dak si lam ntur neh lŏ kơl an ngăn tâm nau nsrôih ân Việt Nam, ngăn lah ăp ntil vắc xin hôm mô tŏng tâm nau kan chuh n’gang pơk hvi. Wa Angela Pratt lah rjăp, WHO ndrel Chính phủ Việt Nam hŏ geh âk nau tâm boh rjăp, săk tâm tâm âk năm, aơ lah nau kan khlay gay 2 ding geh nau lŏ rklaih nau jêr tâm nau kan dak si rnôk aơ. Rơh tât, WHO mra lŏ tâm rgop ngăn đah N’gâng kan dak si gay ma n’hao nau geh pă dŏng vắc xin ân nau kan chuh n’gang pơk hvi./.